بۇگىن شىمكەنت قالاسىنداعى ەتنواۋىل تاريحي كەشەنىندە 1 ناۋرىز – العىس ايتۋ كۇنىنە وراي مەرەكەلىك ءىس-شارا ۇيىمداستىرىلدى. مەرەكەلىك ءىس-شاراعا مادەنيەت جانە ونەر مەكەمەلەرىنىڭ، قالالىق توتەنشە جاعدايلار قىزمەتىنىڭ، پوليتسيا دەپارتامەنتىنىڭ قىزمەتكەرلەرى مەن ساربازدار، ۇستازدار مەن دارىگەرلەر، ەتنومادەني بىرلەستىك وكىلدەرى جانە جوعارى وقۋ ورىندارىنىڭ ەرىكتى جاستارى اتسالىستى.
–بۇل مەرەكە ءتۇرلى تاريحي كەزەڭدەر مەن وقيعالاردىڭ سالدارىنان قازاق جەرىنە قونىس اۋدارعان ەتنوس وكىلدەرىنىڭ مەملەكەت قۇراۋشى قازاق حالقىنا قۇرمەت كورسەتەتىن، قامقورلىعى مەن مەيىرباندىعى ءۇشىن العىس ايتاتىن كۇنى. بىراق، بۇگىندە مەرەكەنىڭ اۋقىمى مۇنىمەن دە شەكتەلمەيدى. ءبىز بۇل كۇنى اق جاۋلىقتى انالارىمىزعا، اق ساقالدى قاريالارىمىزعا، اينالاسىنداعى ادامداردىڭ يگىلىگى مەن ەلدىڭ دامۋى ءۇشىن تىنباي ەڭبەك ەتىپ جۇرگەن ازاماتتارىمىزعا العىس ايتۋدى، ريزاشىلىعمىزدى ءبىلدىرۋدى داستۇرگە اينالدىرىپ كەلە جاتىرمىز، – دەدى شىڭعىس جۇمابەكۇلى.
ايتا كەتەيىك، مەرەكە كۇنىنە وراي قالا كوشەلەرى بەزەندىرىلۋىمەن قاتار، «شىمقالا» ەتنواۋىلىندا كوكتەم بەلگىسى بايشەشەك گۇلىنىڭ، بەيبىتشىلىك پەن مەيىرىمدىلىك قۇسى قارلىعاشتىڭ الىپ بەينەلەرى جاسالىپ، قالا تۇرعىندارىنا ەرەكشە كوڭىل سىيلادى. سونىمەن قاتار، قالامىزداعى 15 ءىرى ساۋدا – ويىن-ساۋىق ورتالىعى مەن قالالىق ساياباقتاردا، اۋەجاي، تەمىر جول ۆوكزالى، بازارلار مەن ستۋدەتتەر كوپ تۇراتىن شاعىن اۋدانداردا 1 ميلليون قۇرت پەن 1 ميلليون باۋىرساق تاراتىلدى. ەستەرىڭىزگە سالساق، بىلتىر دا قالا تۇرعىندارىنا 1 ميلليون قۇرت تاراتىلعان بولاتىن.
