Búgin Shymkent qalasyndaǵy Etnoaýyl tarıhı kesheninde 1 naýryz – Alǵys aıtý kúnine oraı merekelik is-shara uıymdastyryldy. Merekelik is-sharaǵa mádenıet jáne óner mekemeleriniń, qalalyq tótenshe jaǵdaılar qyzmetiniń, polıııa departamentiniń qyzmetkerleri men sarbazdar, ustazdar men dárigerler, etnomádenı birlestik ókilderi jáne joǵary oqý oryndarynyń erikti jastary atsalysty.
–Bul mereke túrli tarıhı kezeńder men oqıǵalardyń saldarynan qazaq jerine qonys aýdarǵan etnos ókilderiniń memleket quraýshy qazaq halqyna qurmet kórsetetin, qamqorlyǵy men meıirbandyǵy úshin alǵys aıtatyn kúni. Biraq, búginde merekeniń aýqymy munymen de shektelmeıdi. Biz bul kúni aq jaýlyqty analarymyzǵa, aq saqaldy qarııalarymyzǵa, aınalasyndaǵy adamdardyń ıgiligi men eldiń damýy úshin tynbaı eńbek etip júrgen azamattarymyzǵa alǵys aıtýdy, rızashylyǵmyzdy bildirýdi dástúrge aınaldyryp kele jatyrmyz, – dedi Shyńǵys Jumabekuly.
Aıta keteıik, mereke kúnine oraı qala kósheleri bezendirilýimen qatar, «Shymqala» etnoaýylynda kóktem belgisi báısheshek gúliniń, beıbitshilik pen meıirimdilik qusy qarlyǵashtyń alyp beıneleri jasalyp, qala turǵyndaryna erekshe kóńil syılady. Sonymen qatar, qalamyzdaǵy 15 iri saýda – oıyn-saýyq ortalyǵy men qalalyq saıabaqtarda, áýejaı, temir jol vokzaly, bazarlar men stýdetter kóp turatyn shaǵyn aýdandarda 1 mıllıon qurt pen 1 mıllıon baýyrsaq taratyldy. Esterińizge salsaq, byltyr da qala turǵyndaryna 1 mıllıon qurt taratylǵan bolatyn.
