رەسەي پرەزيدەنتى ۆلاديمير پۋتين "رەسەي فەدەراتسياسىنىڭ قارجىلىق تۇراقتىلىعىن قامتاماسىز ەتۋ ءۇشىن ەكونوميكالىق سيپاتتاعى قوسىمشا ۋاقىتشا شارالار تۋرالى" جارلىققا قول قويدى. بۇل تۋرالى كرەمل ءباسپاسوز قىزمەتى مالىمدەدى، - دەپ حابارلايدى “ادىرنا” ۇلتتىق پورتالى.
Tengrinews.kz سايتىنىڭ مالىمەتىنشە، جارلىققا سايكەس 2 ناۋرىزدان باستاپ رەسەيدەن ورتالىق بانكتىڭ باعامى بويىنشا 10 مىڭ اقش دوللارىنان اساتىن ۆاليۋتانى نەمەسە "شەتەل ۆاليۋتاسىنداعى اقشا قۇرالدارىن" الىپ كەتۋگە تىيىم سالىنادى.
ودان بولەك، پرەزيدەنت رەزيدەنتتەر ءۇشىن رۋبلدىك نەسيەلەر بەرۋ، سونداي-اق رەسەيگە قارسى سانكتسيالار ورناتقان مەملەكەتتەرمەن بايلانىستى شەتەلدىك تۇلعالارعا باعالى قاعازدار مەن جىلجىمايتىن مۇلىك ساتۋ بويىنشا مامىلەلەر جاساسۋدىڭ ەرەكشە ءتارتىبىن ەنگىزۋ تۋرالى شەشىم قابىلدادى.
بۇل شارا شەتەلدىك تۇلعالاردىڭ باقىلاۋىنداعى ادامدارعا دا قولدانىلادى، "ولاردىڭ تىركەلگەن جەرىنە نەمەسە ولاردىڭ شارۋاشىلىق قىزمەتتى باسىم جۇرگىزۋ ورنىنا قاراماستان".
بۇل وپەراتسيالاردى جۇرگىزۋ ءۇشىن شەتەلدىك ينۆەستيتسيالار جونىندەگى ۇكىمەتتىك كوميسسيانىڭ رۇقساتىن الۋ قاجەت بولادى، ال جىلجىمايتىن مۇلىكپەن جانە باعالى قاعازدارمەن مامىلەلەر قارجى مينيسترلىگى كەلىسىمى بويىنشا ورالىق بانك رۇقساتتارىنىڭ نەگىزىندە ۇيىمداستىرىلعان ساۋدا-ساتتىقتاردا جاسالۋى مۇمكىن.
سونداي-اق، كوميسسيا 28 اقپانداعى جارلىققا تولىق تىيىم سالعان مامىلەلەرگە رۇقسات بەرە الادى: رەزيدەنت ەمەستەرگە ۆاليۋتالىق نەسيە بەرۋ جانە شەتەلدەگى شوتتارىنا ۆاليۋتا اۋدارۋ.
قۇجاتتا بۇل قادامدار "اقش پەن وعان قوسىلعان شەت مەملەكەتتەر مەن حالىقارالىق ۇيىمداردىڭ دوستىق ەمەس جانە حالىقارالىق قۇقىققا قايشى ارەكەتتەرىنەن" تۋىندايتىنى كورسەتىلگەن. ولار ۇلتتىق مۇددەلەردى قورعاۋعا باعىتتالعان.
“ادىرنا” ۇلتتىق پورتالى
Басқалармен бөлісе отырыңыз
