بۇۇ ۋكرايناداعى بەيبىت تۇرعىندار اراسىندا قانشا ادام قايتىس بولعانىن ايتتى ، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
بۇۇ جوعارعى كوميسسارىنىڭ ادام قۇقىقتارى جونىندەگى باسقارماسى (بۇۇ اقجكب) Twitter-دەگى رەسمي پاراقشاسىندا 24 اقپاندا سوعىس باستالعاننان بەرى ۋكراينادا كەمىندە 227 بەيبىت تۇرعىن قازا تاۋىپ، 525 ادام جاراقات العانىن ايتتى.
"2022 جىلى 24 اقپاندا تاڭعى ساعات 4-تەن رەسەي فەدەراتسياسى ۋكرايناعا قارسى سوعىس قيمىلدارىن باستاعان كەزدەن بەرى 2022 جىلى 1 ناۋرىز ءتۇن ورتاسىنا دەيىن ۋكراينادا 752 ادام قايتىس بولدى نەمەسە جاراقات الدى. سونىڭ ىشىندە 227 ادام قايتىس بولدى (31 ەر ادام، 25 ايەل، 6 ۇل جانە 3 قىز، سونداي-اق، جىنىسى ءالى انىقتالماعان 6 بالا جانە 156 ەرەسەك) جانە 525 جارالى (42 ەر ادام، 33 ايەل، 7 قىز جانە 2 ۇل، سونداي-اق، جىنىسى ءالى انىقتالماعان 19 بالا جانە 422 ەرەسەك)", - دەلىنگەن قۇجاتتا.
بەيبىت تۇرعىندار اراسىندا قازا تاپقان نەمەسە جاراقات العان جاعدايلاردىڭ سەبەبى اۋىر ارتيللەريادان، رەاكتيۆ زىمىرانداردان جانە اۋە سوققىلارىنان، جارىلعىش قۇرىلعىلاردان بولعان.
بۇۇ اقجكب ناقتى سان الدەقايدا جوعارى دەپ سانايدى، بۇل اقپارات قوسىمشا راستالۋى قاجەت. سوعىس قيمىلدارى جالعاسىپ جاتقان كەيبىر جەرلەردەن اقپارات الۋ قيىن.
“ادىرنا” ۇلتتىق پورتالى
