رەسەي پرەزيدەنتى ۆلاديمير پۋتين ۋكرايناعا قارسى سوعىسقا باسقا ەلدەردى، اتاپ ايتقاندا ۇجىمدىق قاۋىپسىزدىك شارت ۇيىمىنا (ۇقشۇ) مۇشە مەملەكەتتەردى تارتقىسى كەلەدى، دەپ جازادى "ادىرنا" ۇلتتىق پورتالى orda.kz-كە سىلتەمە جاساپ.
بۇل تۋرالى تەلەمارافون ەفيرىندە ۇلتتىق قاۋىپسىزدىك جانە قورعانىس كەڭەسىنىڭ حاتشىسى الەكسەي دانيلوۆ مالىمدەدى.
– ءبىزدىڭ بارلاۋ مىناداي مالىمەتتەردى ۇسىنادى: پۋتين شىنىمەن دە ۇقشۇ ەلدەرىن وزىنە تارتقىسى كەلەدى: قىرعىزدار، وزبەكتەر جانە باسقا ۇلتتار. ەگەر ءبىز بۇل تۋرالى ايتساق، بۇل مۇلدەم قابىلدانبايدى. قازىر ولار قيىر شىعىستان ادام جيناپ جاتىر دەگەن اقپارات بار. ۋدمۋرتتار مەن ياكۋتتار قازىردىڭ وزىندە ەرىكسىز جينالىپ جاتىر. ويتكەنى سوعىسقىسى كەلەتىندەر ونشا كوپ ەمەس، – دەدى دانيلوۆ.
ۇقشۇ-عا مۇشە مەملەكەتتەر – رەسەي، بەلارۋس، قازاقستان، ارمەنيا، قىرعىزستان جانە تاجىكستان.
ەسكە سالساق، رەسەي پرەزيدەنتى ۆلاديمير پۋتين دونباس رەسپۋبليكالارى باسشىلارىنىڭ ۇندەۋىنە جاۋاپ رەتىندە ارنايى اسكەري وپەراتسيا جۇرگىزۋ تۋرالى شەشىم قابىلداپ، ۋكرايناعا قارسى سوعىس جاريالادى. الايدا رەسەي باسشىسى ماسكەۋدىڭ جوسپارىندا ۋكراينا اۋماقتارىن باسىپ الۋ جوق ەكەنىن ايتقان بولاتىن.
2 ناۋرىز كۇنى تاڭەرتەڭگى جاعداي بويىنشا رەسەي اسكەرى 5840 ادامنان ايىرىلدى. سونداي-اق 60-تان استام ۇشاق پەن تىكۇشاق، 862 برونەترانسپورتەر، 85 ارتيللەريالىق جۇيە جانە باسقا دا كوپتەگەن تەحنيكا جويىلدى. 28 اقپانداعى جاعداي بويىنشا 352 بەيبىت تۇرعىن، ونىڭ ىشىندە 16 بالا قازا تاۋىپ، 2040 ادام جاراقات الدى.
ۋكراينا پرەزيدەنتى ۆلاديمير زەلەنسكي رەسەي اسكەرىنىڭ شابۋىلدىڭ العاشقى ساعاتتارىنان باستاپ ازاماتتىق ينفراقۇرىلىمعا سوققى بەرىپ جاتقانىن ايتتى. پرەزيدەنتتىڭ ايتۋىنشا، رەسەي باسقىنشى اسكەرلەرىنىڭ ۋكرايناداعى ارەكەتتەرىندە گەنوتسيد بەلگىلەرى بار.
27 اقپاندا ۋكراينا «باسقىنشىلىقتى اقتاۋ ءۇشىن گەنوتسيد ۇعىمىن بۇرمالاعانى ءۇشىن رەسەيدى جاۋاپقا تارتۋدى» تالاپ ەتىپ، حالىقارالىق سوتقا رەسەيگە قارسى شاعىم ءتۇسىردى. رەسەيدىڭ ۋكرايناعا باسىپ كىرۋىنە قاتىستى تەرگەۋدى حالىقارالىق قىلمىستىق سوتتىڭ پروكۋرورى كارىم حاننىڭ ءوزى باستادى.
"ادىرنا" ۇلتتىق پورتالى
