2014 جىلى كوكتەمدە ءپۋتيننىڭ قىرىمدى باسىپ الىپ ءساتى ەدى. لۋگانسك، دونەتسك قالالارى دا باسقىنشىلىققا ۇشىراپ جاتقان - تىن.
كيەۆتە ايعاي - شۋ، ۋكراين ساياسي ەليتاسى بيلىككە ورنىعىپ تا ۇلگەرمەگەن..
يانۋكوۆيچ كەشە عانا قاشىپ شىققان تۇس.
ياتسەنيۋك — پرەمەر، تۋرچينوۆ — ۋاقىتشا ەل پرەزيدەنتى.
سىرتتان جاۋ كەلدى، ۋكراينا اڭتارىلىپ، قاتتى ساسىپ وتىرعان قيىن زامان ەدى ول كەز.
سودان ياتسەنيۋك پەن تۋرچينوۆ پارمەن بەرىپ لۆوۆ پەن يۆانو - فرانكوۆششينادان ۋكراين قارۋلى كۇشتەرىنىڭ بولىمشەلەرىنىڭ داربازا قاقپالارى سىقىرلاي ايقارا اشىلىپ، ول ارادان سوۆەتتىڭ ەسكى تانكىلەرى ءىلبىپ شىعىپ امالسىز كۇنشىعىسقا بەتالدى.
سول كەزدەگى ۆيدەولاردى ءبارىمىز جەلىدەن ءبىر ادامداي قارادىق قوي. سونداعى ۋكرايندىق تانكىلەر ءبىر جۇرسە ءجۇز تۇرىپ سىناتىن سوۆەتتىڭ ەسكى توت باسقان تت تانكىلەرى ەدى، سالدىرلاپ كەتىپ بارا جاتاتىن.
سول تانكىلەردى جولاي ۋكراين تۇرعىندارى رۋھتانا قارسى الىپ ءوز اسكەرىن "سلاۆا ۋكراينە!" دەپ جىگەرلەندىرىپ جاتتى.
ءبىر ۆيدەولاردا 9 - 10 جاسارلىق ۋكرايندىق بالانىڭ "سلاۆا ۋكراينە!" دەپ جاساۋراعان ءجۇزى ەسىمدە قالىپتى.
(سول بالانىڭ قازىر قولىنا قارۋ الىپ سوعىسىپ جۇرگەنىنە سەنىمدىمىن).
ول كەزدە بۇنداي سيۋجەتتەردى كورىپ وتىرىپ ۋكرايندىقتاردى قاتتى ايايتىنمىن.
سول سوعىسقا ۋكراين جالاڭقول پاتريوتتارى دا جان - جاقتان اعىلدى. ولار دونباسقا بارعان بەتتە دەرەۋ ءوز قولدارىمەن اسكەري باتالوندارىن قۇرىپ جاتتى. قولدارىندا دۇرىس قارۋى دا جوق، ءبىر ۆينتوۆكا ەكى پاترون، ۇستەرىندە وبمۋنديروۆانيە دە جوق، ساربازداردىڭ ازىقتارىن دا جەرلىك تۇرعىندار تاسىپ جۇرەتىن.
ولاردىڭ تەك "ەلدى قورعايمىز" دەگەن ادال نيەتتەرى عانا بولاتىن. باسقا دانەڭەلەرى دە جوق. تاجىريبەسى دە بولمادى.
سول تاجىريبەسىز ساربازداردىڭ كوبى يلوۆايسك، دەبالتسەۆو، ۆولنوۆاحا دەگەن جەرلەردە وققا ۇشتى، مىڭداپ قىرىلدى.
سول تۇستا سوعىسقا ساقاداي ساي رەسەيلىك كادروۆىي اسكەريلەر شيكىوكپە ۋكراين پاتريوتتارىن كەكىلىكتەي اتقىلاپ قىرىپ سالدى، كوبى شەيىت كەتتى.
ودان سوڭ بيلىككە ەندى كەلگەن پوروشەنكو امالسىز "مينسك كەلىسىمىنە" وتىرۋعا ءماجبۇر بولدى.
قازىرگى، ياعني 8 جىلدان سوڭعى مىنا سوعىستا ۋكراين اسكەرى مۇلدەم وزگەرىپ كەتكەن ەكەن.
ۋكراينا 8 جىلىن بەكەر جوعالتپاعان ەكەن.
قازىرگى ۋكراين اسكەرى — قارسىلاسىنىڭ ايبارىنان قايمىقپاي ونىمەن تەڭ دارەجەدە قيان - كەسكى شايقاستار جۇرگىزىپ وتىرعان ءبىر كۇشتى اسكەرگە اينالىپتى.
حالقى دا باقايشاعىنا شەيىن ۇلتشىل، مەملەكەتشىل، ناعىز پاتريوت ەكەندىگىن كورسەتتى.
قىسقاسى، رەسەي ۋكراينانى باعىندىرا المايدى. ءتىپتى ولار كيەۆتى باسىپ السا دا، ورىستىڭ ونىسىنان تۇك شىقپايدى.
كەزىندە گروزنىيدى باعىندىرعان سوڭ ول ارادا ورىس ءۇشىن سوعىس بىتپەگەن ەدى.
ساۋەگەيسىگەنىم ەمەس، بىراق بۇل جەردە دە سولاي بولادى.
ەگەر تاراپتار كەنەت سىلق ەتىپ قانداي دا ءبىر ورتاق كەلىسىمدەرمەن توقتاماسا، ۋكراين جاعى ەندى قارقىن الا بەرەدى.
جاز كەلە جاتىر.. جەر قارا كۇن جىلىدا ۋكراين ورمانى كوكتەگەندە ۋكراين ساربازدارى ءار بۇتانىڭ تۇبىنەن سايتانداي ساپ ەتە قالىپ ورىس اسكەري كولونناسىن قورشاپ تۇرىپ قىرىپ سالىپ ءوز سوعىسىن جۇرگىزە بەرەدى.
ۋكراينادا قارۋ دا جەتەدى، ارتىندا الار جاردەمى دە كوپ.
"ۇيالعان تەك تۇرماس" دەمەكشى پۋتين رەسەيدە تاعى موبيليزاتسيا جاريالاۋى مۇمكىن، ۋكرايناعا تاعى اسكەرىن توگەر، بىراق مەنىڭشە ودان تۇك شىقپايدى.
ادەتتە كەز كەلگەن سوعىستا شابۋىلداۋشى اسكەر العى شەپكە الدىمەن تەك ۇزدىكتەرىن سالادى. پۋتين ولاردى ۋجە سالدى، ءبىر تاڭعالارلىعى - تۇتقىنداعى اش جالاڭاش، ءۇستى جىرتىق جىگىتتەر ءپۋتيننىڭ ۇزدىكتەرى ەكەن.
پۋتين ۋكراينادا دا ءوز ۇزدىكتەرىن الدىعا سالىپ، ول اسكەرى سۋعا تۇسكەن تاۋىقتىڭ كەبىن كيدى.
اسكەري تەحنيكاسىنىڭ جارتىسى توبىلعىداي تۇتىندەدى.
مىناداي سۇمدىقتاردان سوڭ ءپۋتيننىڭ كەيىنگى كەلەتىن جاۋىنگەرلەرىنىڭ دە ءجۇنى جىعىلىپ، ءۇرپيىپ - ءتۇرپيىپ كەلىپ سوعىسىپ ماندىتا قويمايدى.
ال بەرگى بەتتەگى ۋكراين ساربازدارى ول كەزدە ناعىز جانالعىش ماشينەگە اينالادى. ول ەندى ولسە دە بەرىسپەيدى.
ۋكراين اسكەرى قازىر — قان مەن تەردىڭ كەرمەك ءدامىن سەزگەن، جاۋىن سوعىپ ۇيرەنگەن، ورىس اسكەرىن مىڭداپ تۇتقىنداپ، ۇشاقتارىن قۇلاتۋدى مەڭگەرگەن تاجىريبەلى اسكەر.
رەسەيدىڭ ايلار بويى، جىلدار بويى سوعىس جۇرگىزەتىن مۇمكىندىگى دە جوق. سالدەن سوڭ كوپ ۇزاتپاي ءوزى دە سىر بەرەدى.
سول كەزدە تالاپتى ۋجە ۋكراين جاعى قويادى دەپ ويلايمىن.
سوندىقتان، سوعىستىڭ العاشقى كۇندەرىندە جازعانىمدى تاعى جازامىن.
ۋكراينا جەڭەدى.
