رەسەي پرەزيدەنتىنىڭ ءباسپاسوز حاتشىسى دميتري پەسكوۆ بۇرىنعى كولىك ءمينيسترى رومان ستاروۆويتتىڭ وتستاۆكاعا كەتۋ سەبەپتەرىنە تۇسىنىكتەمە بەرە وتىرىپ، پرەزيدەنت جارلىعىنا سەنىم جوعالتۋ تۋرالى ەشقانداي تۇجىرىم جوق دەپ مالىمدەدى. بۇل تۋرالى ريا نوۆوستي جازدى، دەپ حابارلايدى "ادىرنا".
دۇيسەنبى كۇنى رەسەي پرەزيدەنتى ۆلاديمير پۋتين رومان ستاروۆويتتى كولىك ءمينيسترى قىزمەتىنەن بوساتۋ تۋرالى جارلىققا قول قويدى. ستاروۆويت بۇل قىزمەتتە 2024 جىلعى مامىردان باستاپ باسقارعان ەدى. سونىمەن قاتار، پرەزيدەنت جارلىقپەن اندرەي نيكيتيندى كولىك ءمينيسترىنىڭ مىندەتىن اتقارۋشى ەتىپ تاعايىندادى.
«ەگەر سەنىم جوعالسا، وندا ول تۋرا كورسەتىلەدى. بىراق، وزدەرىڭىز كورىپ وتىرعانداي، مۇنداي فورمۋليروۆكا قولدانىلعان جوق»، — دەدى پەسكوۆ جۋرناليستەردىڭ «ستاروۆويتتىڭ وتستاۆكاسى پرەزيدەنتتىڭ سەنىمىنەن ايىرىلۋىنا بايلانىستى بولدى ما؟» دەگەن سۇراعىنا جاۋاپ بەرە وتىرىپ.
مەملەكەت باسشىسىنىڭ ءباسپاسوز حاتشىسى جارلىقتىڭ جازباشا ماتىنىندە دە «سەنىمنەن ايىرىلدى» دەگەن ءسوز تىركەسى جوق ەكەنىن اتاپ ءوتتى.
«تاعى دا قايتالاپ ايتامىن: جارلىقتا “سەنىمنەن ايىرىلدى” دەگەن ءسوز جوق، جازباشا قۇجاتتا مۇنداي تۇجىرىم قولدانىلماعان. بۇل – مەملەكەت باسشىسىنىڭ شەشىمى، مەنىڭ بۇعان قوسارىم جوق»، — دەدى پەسكوۆ.
ايتا كەتسەك، بۇعان دەيىن رەسەيدە جۇمىسىنان بوساتىلعان كولىك ءمينيسترى
رومان ستاروۆويتتىڭ ءولى تابىلعانى تۋرالى حابارلادىق.
رومان ستاروۆويتتىڭ دەنەسى ودينتسوۆو قالالىق وكرۋگىنەن تابىلعان. اقپاراتتارعا سايكەس، وعان وق تيگەن، ءمايىتتىڭ قاسىندا قارۋ جاتقان.
