ۋكراينانىڭ چەرنيگوۆ وبلىسىنداعى پريلۋكي قالاسىندا كوپقاباتتى تۇرعىن ۇيگە زىمىران ءتۇسىپ، بەس قاباتتى عيماراتتىڭ ءبىر بولىگى وپىرىلىپ قۇلادى. سونىڭ سالدارىنان كەمىندە 18 ادام قازا تاپتى. بۇل تۋرالى 7 قازاندا BBC جازدى، دەپ حابارلايدى «ادىرنا» ءتىلشىسى.
قۇرباندار اراسىندا كيەۆ پەن باسقا قالالاردىڭ تۇرعىندارى دا بار. رەسەي تاراپى 7 قازانعا قاراعان ءتۇنى ۋكرايناداعى زىمىراندار مەن دروندار وندىرىسىنە قاتىسى بار كاسىپورىندارعا جاپپاي سوققى جاسالعانىن مالىمدەدى.
ۋكراينا پرەزيدەنتى ۆلاديمير زەلەنسكيدىڭ ايتۋىنشا، رەسەي اسكەرى كيەۆ پەن ۋكراينانىڭ 12 وبلىسىنا 70 زىمىران مەن كوپتەگەن ۇشقىشسىز ۇشۋ اپپاراتىن باعىتتاعان. ونىڭ ىشىندە بالليستيكالىق زىمىراندار دا كوپ بولعان.
«تەك ولاردىڭ ءبىر بولىگىن عانا اتىپ ءتۇسىرۋ مۇمكىن بولدى. رەسەيدىڭ بالليستيكالىق زىمىراندارى ءالى دە ەڭ ۇلكەن قاۋىپ بولىپ وتىر»، – دەدى زەلەنسكي.
ۋكراينا اۋە كۇشتەرى بەس بالليستيكالىق زىمىراننىڭ، سونداي-اق 39 قاناتتى زىمىران مەن 117 دروننىڭ، ونىڭ ىشىندە رەاكتيۆتى اپپاراتتاردىڭ جويىلعانىن حابارلادى.
رەسەي قورعانىس مينيسترلىگى پريلۋكيدى قوسا العاندا بىرنەشە نىسانعا زىمىراندار مەن دروندار ارقىلى جاپپاي سوققى جاسالعانىن راستادى. ەڭ كوپ ادام شىعىنى ءدال وسى قالادا تىركەلگەن.
چەرنيگوۆ وبلىستىق پروكۋراتۋراسىنىڭ مالىمەتىنشە، پريلۋكيگە تاڭەرتەڭ قاناتتى زىمىراندارمەن شابۋىل جاسالعان. رەسەي قورعانىس مينيسترلىگى سوققىنىڭ نىساناسى رەتىندە «پلاستماسس-پريلۋكي» زاۋىتىن اتادى. ۆەدومستۆونىڭ مالىمدەۋىنشە، وندا ۋكراينالىق FP-5 «فلامينگو» قاناتتى زىمىراندارىنا ارنالعان بولشەكتەر ءوندىرىلىپ، ساقتالعان.
الايدا پروكۋراتۋرا دەرەگىنە سايكەس، زىمىران تۇرعىن ۇيگە ءتيىپ، بەس قاباتتى عيماراتتىڭ ەكى كىرەبەرىس بولىگى قيراعان. قۇتقارۋشىلار مەن پوليتسيا 18 ادامنىڭ، سونىڭ ىشىندە ءتورت بالانىڭ قازا تاپقانىن، تاعى 55 ادامنىڭ جارالانعانىن حابارلادى. قالاداعى باسقا تۇرعىن ۇيلەر، بالالار شىعارماشىلىق ورتالىعى، كاسىپورىندار مەن اۆتوكولىكتەر دە زاقىمدانعان.
پريلۋكيدە ءۇش كۇندىك ازا تۇتۋ جاريالاندى. قۇتقارۋشىلار ۇيىندىلەردى تازالاپ جاتقان كەزدە وبلىس ورتالىعىنا تاعى ءبىر زىمىراندىق سوققى جاسالىپ، اكىمشىلىك عيماراتتا ءورت شىققان.
پولتاۆا وبلىسىنداعى كرەمەنچۋك قالاسىندا دا تۇرعىن اۋدان شابۋىلعا ۇشىرادى. جاريالانعان كادرلارعا قاراعاندا، زىمىران توعىز قاباتتى ءۇش ءۇيدىڭ جانىنداعى اۋلاعا تۇسكەن. سالدارىنان 72 جاستاعى ايەل مەن 40 جاستاعى ەر ادام قازا تاۋىپ، 40-تان استام ادام جاراقات العان.
رەسەي قورعانىس مينيسترلىگى كرەمەنچۋكتاعى كراز اۆتوموبيل زاۋىتىنا دا سوققى جاسالعانىن مالىمدەدى. ۆەدومستۆو بۇل كاسىپورىن «فلامينگو» زىمىراندارىنا ارنالعان ۇشىرۋ قوندىرعىلارىنىڭ ارنايى شاسسيلەرىن وندىرەدى دەپ سانايدى.
ۋكراينا مادەنيەت مينيسترلىگىنىڭ مالىمەتىنشە، تاعى ءبىر زىمىراننىڭ سىنىقتارى كيەۆتەگى دوۆجەنكو اتىنداعى ۇلتتىق كينوستۋديانىڭ ەكى پاۆيلونىنىڭ شاتىرىن تەسىپ وتكەن. كەلتىرىلگەن شىعىن كولەمى ازىرگە انىقتالماعان.
ۋكراينا بيلىگى كيەۆ وبلىسىندا ءۇش وندىرىستىك-قويما عيماراتىنىڭ، ءبىر جۇك كولىگى مەن تىركەمەنىڭ زاقىمدانعانىن حابارلادى. ادام شىعىنى بولماعان.
كيروۆوگراد وبلىسىنداعى الەكساندريا قالاسىندا دا شابۋىل سالدارىنان ەكى ادام قازا تاۋىپ، ۇشەۋى جارالانعان. تاعى ءبىر ادام ءىز-ءتۇزسىز جوعالعان. قۇتقارۋشىلاردىڭ ايتۋىنشا، ونەركاسىپتىك نىساندا 2 مىڭ شارشى مەتر اۋماقتى قامتىعان ءورت شىققان.
دنەپر قالاسىندا ونەركاسىپ كاسىپورنىنا سوققى جاسالعان. قالا اكىمى بوريس فيلاتوۆتىڭ مالىمەتىنشە، شابۋىلدان كەيىن 16 كوپقاباتتى تۇرعىن ءۇي زاقىمدانىپ، شامامەن 500 تەرەزە سىنعان.
بۇعان دەيىن ۆلاديمير زەلەنسكي رەسەيدىڭ اۋقىمدى شابۋىل دايىنداپ جاتقانىن ەسكەرتىپ، تۇرعىنداردى اۋە دابىلى سيگنالدارىنا مۇقيات بولۋعا شاقىرعان ەدى.
7 قازان كۇنى تاڭەرتەڭ ۋكراينا ماسكەۋگە جاپپاي درون شابۋىلىن جاساپ، كەشكە سوچي ماڭىنداعى قارا تەڭىزدە مۇناي تاسيتىن تانكەرگە سوققى بەرگەن ەدى.
ماسكەۋ وبلىسىنىڭ گۋبەرناتورى اندرەي ۆوروبەۆ ەكى ادامنىڭ قازا تاپقانىن، ون ادامنىڭ جارالانعانىن جانە شامامەن 50 ءۇيدىڭ زاقىمدانعانىن حابارلاعان. ونىڭ ايتۋىنشا، ماسكەۋ ماڭىندا ءبىر تۇندە 185 ۋكراينالىق درون اتىپ تۇسىرىلگەن. رەسەي قورعانىس مينيسترلىگى بولسا ەل اۋماعىندا جالپى سانى 868 ۇشقىشسىز اپپاراتتىڭ جويىلعانىن مالىمدەگەن.
زەلەنسكي ماسكەۋگە جاسالعان شابۋىلعا پىكىر بىلدىرمەگەنىمەن، سوچي ماڭىنداعى تانكەرگە تەڭىز دروندارى ارقىلى جاسالعان سوققىنى جاناما تۇردە راستادى. ول الەۋمەتتىك جەلىدە ءىرى ءورتتىڭ ۆيدەوسىن جاريالادى.
بۇعان دەيىنگى ءىرى شابۋىلدار الماسۋى 25 قىركۇيەكتە بولعان ەدى. سودان بەرى تاراپتار ءبىر-ءبىرىنىڭ اسكەري جانە ينفراقۇرىلىمدىق نىساندارىنا سوققىلار جاساۋدى جالعاستىرىپ كەلەدى. اقش ۇسىنعان «ەنەرگەتيكالىق ءبىتىم» باستاماسى ازىرگە ناتيجە بەرگەن جوق.
“پوليمەتالل” كومپانياسىنىڭ ديرەكتورى جۇمىس بولمەسىنە ءپۋتيننىڭ سۋرەتى مەن رەسەيدىڭ تۋىن قويىپ قويعان
