كولىك اپاتى ءجيى بولاتىن الماتى-بىشكەك تراسساسىندا ءتيىستى جول بەلگىلەرى ورناتىلماعان. بۇعان دەيىن مىڭباەۆ جانە قاسىمبەك اۋىلىنىڭ تۇرعىندارى كۇرە جول بويىندا ادام ءولىمى كوبەيدى دەپ نارازىلىق بىلدىرگەن ەدى. ويتكەنى ءدال وسى ماڭنان سوڭعى ءبىر اپتانىڭ ىشىندە ەكى ادامدى كولىك قاعىپ قازا تاپقان.
وسىدان كەيىن «جول اكتيۆتەرى ۇلتتىق ساپا ورتالىعى» الماتى وبلىستىق فيليالىنىڭ ماماندارى ارنايى رەيدكە شىقتى.
تەكسەرۋ بارىسىندا الماتى-بىشكەك-تاشكەنت-تەرمەز باعىتىنداعى تاس جولدىڭ 60-شى شاقىرىمىندا «جاياۋ جۇرگىنشىلەر وتكەلى» دەگەن بەلگىنىڭ جوقتىعى انىقتالدى. سونداي-اق كۇرە جولدى كەسىپ وتەتىن جۇرگىنشىلەرگە ارنالعان «تارعىل» جولاقتىڭ بوياۋى ءوشىپ قالعان.
وسىنىڭ كەسىرىنەن جوعارى جىلدامدىقپەن جۇيىتكىگەن جۇرگىزۋشىلەر جاياۋلاردى كورمەي قالادى ەكەن. بۇدان بولەك، جول ساپاسىنا جاۋاپتى ماماندار ءدال وسى تاس جولدىڭ 44-ءشى شاقىرىمىندا دا «جاياۋلار وتكەلى» دەگەن بەلگىنىڭ جوقتىعىن جانە بىرنەشە جەردە جول بەلگىلەرىنىڭ تالاپقا ساي ورناتىلماعانىن انىقتادى.
وسى كەمشىلىكتەردى جويۋ ءۇشىن «قازاۆتوجول» مەكەمەسىنە ارنايى حات جولداندى.
جەرگىلىكتى تۇرعىندار «ءولىم جولى» اتاپ كەتكەن بۇل ماڭعا جەر ءۇستى وتكەلى سالىناتىن بولدى. ونىڭ جۇمىسىنا رەسپۋبليكالىق بيۋدجەتتەن 180 ميلليون تەڭگە بولىنگەن. قۇرىلىس جۇمىستارى 2022 جىلدىڭ قاراشا ايىندا اياقتالادى دەپ جوسپارلانۋدا.
”ادىرنا” ۇلتتىق پورتالى
