Kólik apaty jıi bolatyn Almaty-Bishkek trassasynda tıisti jol belgileri ornatylmaǵan. Buǵan deıin Myńbaev jáne Qasymbek aýylynyń turǵyndary kúre jol boıynda adam ólimi kóbeıdi dep narazylyq bildirgen edi. Óıtkeni dál osy mańnan sońǵy bir aptanyń ishinde eki adamdy kólik qaǵyp qaza tapqan.
Osydan keıin «Jol aktıvteri ulttyq sapa ortalyǵy» Almaty oblystyq fılıalynyń mamandary arnaıy reıdke shyqty.
Tekserý barysynda Almaty-Bishkek-Táshkent-Termez baǵytyndaǵy tas joldyń 60-shy shaqyrymynda «jaıaý júrginshiler ótkeli» degen belginiń joqtyǵy anyqtaldy. Sondaı-aq kúre joldy kesip ótetin júrginshilerge arnalǵan «tarǵyl» jolaqtyń boıaýy óship qalǵan.
Osynyń kesirinen joǵary jyldamdyqpen júıitkigen júrgizýshiler jaıaýlardy kórmeı qalady eken. Budan bólek, jol sapasyna jaýapty mamandar dál osy tas joldyń 44-shi shaqyrymynda da «jaıaýlar ótkeli» degen belginiń joqtyǵyn jáne birneshe jerde jol belgileriniń talapqa saı ornatylmaǵanyn anyqtady.
Osy kemshilikterdi joıý úshin «QazAvtoJol» mekemesine arnaıy hat joldandy.
Jergilikti turǵyndar «ólim joly» atap ketken bul mańǵa jer ústi ótkeli salynatyn boldy. Onyń jumysyna respýblıkalyq bıýdjetten 180 mıllıon teńge bólingen. Qurylys jumystary 2022 jyldyń qarasha aıynda aıaqtalady dep josparlanýda.
”Adyrna” ulttyq portaly
