2016 جىلعى 11 مامىردا قىزمەتتەس ارىپتەسىمىز، قارۋلاس دوسىمىز، باۋىرىمىز، جارقىن ازامات تالقىباەۆ اباي بولاتۇلى بار بولعانى 36 جاسىندا دۇنيەدەن وزدى. قىرشىن كەتكەن جاستىڭ ءولىمى جانىمىزعا باتتى، قابىرعامىزدى قايىستىردى.
ەش اۋىرماي-سىرقاماي، ءومىردىڭ ءاربىر ساتىنەن ءلاززات الىپ، جارقىلداپ جۇرەتىن جاننىڭ ءولىمى اۋىر ەكەن.
ابايدىڭ قىرشىن جاسى كەز-كەلگەن ادامنىڭ تۇيسىگىنە ءولىم مەن ءومىر تۋرالى وي قوزعاپ، «وسى وتكەرگەن عۇمىرىمدا قانداي جاقسى ءىس اتقاردىم» دەگەن ويعا شومۋىنا تۇرتكى بولادى، ءولىم جاس پەن قارتقا، جامان مەن جاقسىعا قاراماي جالماي بەرەتىن تاجال ەكەنىنە كوز جەتكىزەدى ەكەن.
اباي باۋىرىم تۋرالى جازۋىما سەبەپ بولعان باتىر بابامىز ب.مومىشۇلىنىڭ مىناۋ ءبىر سوزدەرى بولدى: «ءبىزدىڭ جازۋشىلارىمىز، عىلىمي قىزمەتكەرلەرىمىز جاس ۇرپاقتى تاربيەلەۋ ماقساتىندا شىندىقتى جازۋى كەرەك.
قازىرگە دەيىن بىردە-ءبىر اسكەري ەسىم حالىق ەسىندە قالۋ ءۇشىن قانى مەن جانىن بەرگەن جىگىتتەردىڭ جالىندى ەسىمدەرى سالقىنقاندىلىقتان سوققان سامالمەن ءوشىپ بارا جاتقانداي. ەرلەردى جازا الماساق، جازىق بىزدە.
ال اركىمنىڭ ءوزى كورگەن ەسىل ەردى جىرلاپ، ءوزى بىلەتىن تۇلعانى بايانداعانى ءجون. ءبىر ەردىڭ ىستەگەن ءىسى جۇزگە ۇلگى، مىڭعا ونەگە بولادى».
اباي باۋىرىم از عانا عۇمىرىندا سوعىستا ەرلىك كورسەتپەسە دە، بەيبىت اسكەري ومىردە كەز-كەلگەننىڭ قول جەتپەيتىن جەتىستىكتەرگە جەتىپ، جاستارعا عانا ەمەس، ۇلكەندەرگە دە ۇلگى بولاتىنداي سانالى ءىس قالدىردى.
ول قاراپايىم ءومىر ءسۇردى: ەشكىمنىڭ الدىنا شىعىپ، ونى باسىپ وزامىن دەگەن جوق نەمەسە اتىن شىعارىپ تانىمال بولعىسى كەلمەدى.
ول قۇر قول وتىرا المايتىن، جان-جاقتى ءوسىپ، ساۋاتىن اشىپ، دامۋدى قالايتىن، الدىنا قويعان ماقسات-ارماندارى كوپ ازامات ەدى.
ول تەك وزىندىك الەمى بار، سول الەمىمەن قاتاڭ جارعىلىق اسكەري ومىردە ەرەكشەلەنەتىن تۇلعا بولا ءبىلدى.
ونىڭ الەمى ادەمىلىككە، اسەمدىككە، ادەپتىلىك پەن جان-جاقتى ساۋاتتىلىققا، تالعامپازدىققا، مەيىرىمدىلىككە، قاراپايىمدىلىققا، ادالدىققا تولى ەدى.
ونىڭ جىرلاپ ايتۋعا بولاتىنداي ەرلىگى - سول الەمىن بولاشاق شەكاراشى-وفيتسەرلەردىڭ بويىنا دارىتىپ، ولاردى يگى ىستەرگە تاربيەلەي ءبىلۋى.
11 جىل ىشىندەگى قر ۇقك شەكارا اكادەمياسىنداعى اسكەري-پەداگوگيكالىق قىزمەتىندە اباي باۋىرىم تاربيەلەگەن جاس وفيتسەرلەر ەلىمىزدىڭ تۇكپىر-تۇكپىرىندە تىنىشتىعىمىزدى قورعاپ، شەبىمىزدى كۇزەتۋدە. وسى ءبىر قايعىلى وقيعا ۇستازىنىڭ سۇيىسپەنشىلىگىنە بولەنگەن شاكىرتتەرىنىڭ دە قابىرعاسىن قايىستىرارى ءسوزسىز.
ابايمەن تانىستىعىمىز ءال-فارابي اتىنداعى قازۇۋ حالىقارالىق قاتىناستار فاكۋلتەتىندە باستالدى. ماعان قر ۇقك اكادەمياسىنا جوو بىتىرۋشىلەر اراسىنان پەداگوگيكالىق قىزمەتكە ۇزدىك ستۋدەنتتەردى اسكەري قىزمەتكە ىرىكتەۋگە تاپسىرما بەرىلدى.
قازۇۋ-ءدىڭ حالىقارالىق قاتىناستار فاكۋلتەتىنىڭ دەكانىنان ۇزدىك ستۋدەنتتەردىڭ ءتىزىمىن سۇراعانىمدا، ون شاقتى ادامنىڭ ءتىزىمىن بەردى. سول ءتىزىمنىڭ ىشىندە اباي ءبىرىنشى بولىپ تۇر ەدى. كەيىن ابايمەن سۇحباتتاسقانىمىزدا دەكانىنىڭ ماقتاعانىنداي، جان-جاقتى ساۋاتتى، ادەپتى، الدىنا ماقسات قويا بىلەتىن جاس ەكەنىنە كوزىمىز جەتتى.
بىراق كەيبىر دالەلسىز سەبەپتەرگە وراي ابايدىڭ قۇجاتتارىن رەسىمدەۋ پروتسەسى ەكى جىلعا سوزىلىپ، كەيىن ءوزىم اسكەري ينستيتۋتقا پەداگوگيكالىق قىزمەتكە اۋىسقاندا ونى اسكەري فورمادا جولىقتىردىم.
ول ءوز ماقساتىنا جەتۋ ءۇشىن ەشتەڭەدەن كوڭىلى قالماي، ينستيتۋتتىڭ شەت تىلدەرى كافەدراسىندا پەداگوگيكالىق قىزمەتپەن اينالىسىپ جۇرگەنىن ءبىلدىم.
وسى كەزەڭنەن باستاپ ابايدىڭ ومىرىندەگى ءاربىر ءساتى، قۋانىشى، رەنىشى، ت.ب. كوز الدىمدا ءوتتى (اديۋنكتۋراعا ءتۇسۋى، عىلىمي ەڭبەكتەرىن جارىققا شىعارۋى، وتباسىن قۇرۋى، بالالى بولۋى، ت.ب.).
اباي تەك پەداگوگيكالىق قىزمەتىن جەتىلدىرىپ قانا قويماي، اسكەري عىلىمعا دا وزىندىك ۇلەسىن قوستى. ول ءاردايىم ءوزىنىڭ بويىنداعى بار بىلىمىنە قاناعاتتانباي، جان-جاقتى ىزدەنىپ جۇرەتىن.
شەكارا قىزمەتى وفيتسەرلەرىن دايارلاۋ ءىسى ماسەلەسى بويىنشا عىلىمي زەرتتەۋ جۇمىستارىن جۇرگىزىپ، 2010 جىلى اسكەري پەداگوگيكا عىلىمدارىنىڭ كانديداتى عىلىمي اتاعىن الىپ، كەيىن «پروفەسسور» عىلىمي دارەجەسىنە يە بولدى.
2008 جىلى ءۇش ايعا جۋىق اقش-تىڭ نيۋ-مەكسيكا قالاسىندا شەكارالىق باقىلاۋ كۋرسىنان ءوتىپ، بىلىكتىلىگىن جەتىلدىردى.
سونداي-اق، 2011 جىلى رەسەيدىڭ فەدەرالدى قاۋىپسىزدىك قىزمەتى اكادەمياسىندا بىلىكتىلىكتى كوتەرۋ كۋرسىنان ءوتىپ، تمد ەلدەرى اراسىنداعى اسكەري قىزمەتشىلەردىڭ ديپلومدىق جۇمىستار سايىسىندا ۇزدىك عىلىمي جۇمىس جازعانى ءۇشىن ءبىرىنشى جۇلدەلى ورىندى يەلەنىپ، ەلىمىزدىڭ بەدەلىن كوتەردى.
اباي بولاتۇلىنىڭ قالامىنان 100-دەن اسا عىلىمي ماقالالار، 6 عىلىمي ەڭبەك (وقۋ قۇرالدارى، جيناقتار، انىقتامالىقتار) جارىق كوردى.
ءاربىر وتكىزگەن كۇنىن باقىت دەپ سانايتىن، ءاربىر ادامدى، ادامدارمەن قارىم-قاتىناستى دا سول سەبەپتەن باعالايتىن. بىرەۋگە دورەكى سويلەپ، ەشقاشان رەنجىتپەيتىن، سوندىقتان دا ەلگە سىيلى بولاتىن.
جاراتىلىسىنان جانى نازىك بولعاندىقتان ول قاراپايىم ادام كورە بىلمەيتىن ادەمىلىكتى، اسەمدىكتى كورەتىن ازامات ەدى.
ادامدارمەن قارىم-قاتىناس جاساعاندا ءار ادامنىڭ كوزىنە قاراپ، ونىڭ ويىن، سەزىمىن، كوزقاراسىن بىردەن بايقاپ، سول ادامعا سول مەزەتتە جانىنا سايا بولاتىنداي ءسوز ايتىپ، كوڭىلىن كوتەرە بىلەتىن.
ەشكىمگە جالپاقتاپ، وتىرىكتى بوسەتىن ادام ەمەس ەدى، اششى شىندىقتى دا ادامنىڭ كوڭىلىن قالدىرماي، وزىنە سىني كوزقاراسپەن قارايتىنداي ەتىپ جەتكىزە بىلەتىن. سوندىقتان بولار، ابايدىڭ جاۋى، وشتەسكەن قارسىلاسى، كۇندەسى بولمايتىن.
كەز-كەلگەن ورتادا سىيىمدى، قانداي دا اداممەن ءتىل تابىسا بىلەتىن جايدارلى ازامات ەدى.
ءوزىنىڭ شاعىن عانا سانالى عۇمىرىندا ۇنەمى بارلىعىن ۇلگەرۋگە اسىعىپ جۇرەتىن.
ول ءوزىنىڭ ءومىرىنىڭ اقىرى جاقىنداپ قالعانىن ىشتەي سەزىنەتىندىكتەن ادەمى ءومىر سۇرۋگە، قورشاعانداردان ادەمىلىكتى كورۋگە، قاسىنداعىلارعا قۋانىش سىيلاۋعا تىرىساتىن.
اسىرەسە اباي ءۇشىن وتباسى، جورا-جولداستارى، ارىپتەستەرى، قىزمەتتەستەرى قىمبات جاندار ەدى.
ول اتا-اناسىنىڭ ءۇمىتىن اقتاي بىلگەن ۇل، سۇيىكتى جار، قامقور اكە، باۋىرمال ءىنى، سىرلاس جانە سەنىمدى دوس بولا ءبىلدى. ونىڭ بويىندا جالپى ادامزاتقا ءتان جامان قاسيەتتەر تابىلمايتىن.
عۇمىرى پىشاقتىڭ سابىنداي قىسقا بولسا دا ارتىندا قالعان قىزى مەن ۇلىنا جاقسى ەسىمىن قالدىردى.
بۇگىندە اباي بولاتۇلىنىڭ ارتىندا قالعان ومىرلىك جۇبايى بيلدەباەۆا اسەل سەرىكقىزى قر ۇقك شەكارا اكادەمياسى كادرلار باسقارماسىنىڭ ينسپەكتورى. اسكەري شەنى مايور.
ۇلى الىشەر الماتى قالاسىنداعى ءبىلىم ينوۆاتسيا ليتسەيىنىڭ 8 سىنىپ وقۋشىسى. اكەگە قاراپ ۇل وسەر دەمەكشى، اكەسى سياقتى ول دا عىلىم-بىلىمعا جانى قۇمار اعىلشىن ءتىلىن جەتىك مەڭگەرگەن. قىزى السۋ قالاداعى مەكتەپتەردىڭ بىرىندە 1 سىنىپتا وقيدى.
اسەلدىڭ ايتۋىنشا، ولار 2006 جىلى شەكارا اكادەمياسىندا تانىسقان.
ول كەزدە اسەل سەرىكقىزى شەكارا اكادەمياسىنىڭ ءبىر جىلدىق كۋرسىن وقىپ جۇرگەن بولاتىن. جىل سوڭىندا اباي بولاتۇلى اسەلدەن اعىلشىن ءتىلى بويىنشا سىناق قابىلداعان.
سودان كوزىنە شوقتاي باسىلعان سۇلۋ قىز جايلى اينالاسىنداعىلاردان سۇراستىرا باستاعان. كەيىننەن، سەزىمىن ءبىلدىرىپ ەكى جارتى، ءبىر ءبۇتىن بولايىق دەپ ءوز ويىن بىلدىرگەن ەكەن.
اباي، باۋىرىم، جارىعىم! سەنىڭ قىرشىن ءومىرىڭ بارلىعىمىزدىڭ قابىرعامىزدى قايىستىرىپ، جانارىمىزدى جاسقا جۋدى. سەنىڭ جاقسى ءىسىڭ كەلەشەك ۇرپاققا ۇلگى بولسىن، جاقسى اتىڭ بالالارىڭنىڭ توبەسىن كوككە جەتكىزسىن، ال جارقىن بەينەڭ ماڭگىلىك ءبىزدىڭ – ارىپتەستەرىڭنىڭ ەسىندە قالادى. جاتقان جەرىڭ جايلى، توپىراعىڭ تورقا، يمانىڭ سالامات بولسىن!
پودپولكوۆنيك گ.ماماەۆا،
14-كافەدرانىڭ پروفەسسورى
