بۇگىن قازاقستان ينجەنەرلىك-تەحنولوگيالىق ۋنيۆەرسيتەتىنىڭ ۇجىمى مەن ءبىلىم الۋشى جاستارى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ پارلامەنت پالاتالارىنىڭ بىرلەسكەن وتىرىسىندا جاريا ەتكەن قازاقستان حالقىنا جولداۋىن تىڭدادى.
مەملەكەت باسشىسى ساياسي رەفورمالاردىڭ جاڭا باعدارلاماسىن ۇسىنىپ، الەۋمەتتىك-ەكونوميكالىق باعىتتا اتقارىلاتىن ىستەر تۋرالى باياندادى. وسىعان دەيىن ساياسي رەفورمالاردىڭ ءتورت توپتاماسىن ۇسىنعانىن جەتكىزگەن پرەزيدەنت ەلىمىزدىڭ ساياسي جۇيەسىن كەشەندى جاڭعىرتۋ باعدارلاماسىن جاريالايتىنىن مالىمدەدى. «مەن بۇگىن ەلىمىزدىڭ ساياسي جۇيەسىن كەشەندى جاڭعىرتۋ باعدارلاماسىن ۇسىنعالى وتىرمىن. بۇل قۇجات، ەڭ الدىمەن، قوعامنىڭ قاجەتتىلىگىنە جانە سۇرانىسىنا نەگىزدەلگەن»، - دەدى ق. توقاەۆ. سونداي-اق، مەملەكەت باسشىسى بۇل وزگەرىستەردى جۇرتقا جاعىنۋ ءۇشىن جاسامايتىنىن ايتتى. «ءبىز بۇل وزگەرىستەردى جۇرتقا جاقسى كورىنۋ ءۇشىن جاسامايمىز. قاعاز بەتىندە عانا جۇزەگە اسىرىلعان، بىراق شىندىققا ەش جاناسپايتىن جالعان تابىستارعا ماساتتانىپ وتىراتىن زامان كەلمەسكە كەتتى»، - دەدى پرەزيدەنت.
قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گۇلنار سارسەنبەكوۆا بۇل جولداۋدىڭ ساياسي-الەۋمەتتىك ماڭىزى زور ەكەندىگىنە توقتالىپ، جاڭا قازاقستاندى قۇرۋدىڭ جاڭا باس جوسپارى دەپ اتادى. «قاسىم-جومارت توقاەۆ ءوز جولداۋىندا «ءبىز بولاشاقتا قانداي ەل بولاتىنىمىزدى ناقتى بىلەمىز. جاڭا قازاقستاندى ازاماتتىق قوعامى قالىپتاسقان ءتيىمدى مەملەكەتكە اينالدىرامىز. وسىعان وراي، «كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت» قاعيداتىن باسشىلىققا الامىز» دەپ ۇلكەن مىندەت جۇكتەدى. بۇل دامۋدىڭ جاڭا بەلەسىنە باستالعان العاشقى قادام دەپ ەسەپتەيمىن»، - دەيدى رەكتور گ. سارسەنبەكوۆا.
ال الەۋمەتتىك-گۋمانيتارلىق پاندەر كافەدراسىنىڭ مەڭگەرۋشىسى ا.ب.نۇرتازاەۆا: «ەل پرەزيدەنتىنىڭ 2022 جىلعى قاڭتار قاندى وقيعاسىنان كەيىن «جاڭا قازاقستاندى» جانە «قۇلاق اسۋشى مەملەكەتتى» قۇرۋ باعىتىنداعى باستامالارى مەن ۇسىنىستارى شىنىمەن ەلىمىزدىڭ كوركەيۋىنە جانە حالقىمىزدىڭ الەۋمەتتىك-ەكونوميكالىق جاعدايىنىڭ جەتىلۋىنە ۇلكەن سەپتىگىن تيگىزەدى دەپ سەنەمىز. ەڭ باستىسى - ەل پرەزيدەنتى قاسىم-جومارت كەمەلۇلى ايتقانداي، قازاقستاننىڭ ەگەمەندىگى، تاۋەلسىزدىگى مەن تەرريتوريالىق تۇتاستىعى بارلىعىنان قۇندى. ءبىز - قازاقستاننىڭ ءاربىر ازاماتى وسى باعىتتا ايانباي ەڭبەك ەتىپ، پرەزيدەنتىمىزدىڭ باستامالارى مەن ۇسىنىستارىنا تەك قولداۋ كورسەتىپ قانا قويماي، سولاردىڭ جۇزەگە اسۋىنا بەلسەندى ات سالىسۋعا مىندەتتىمىز»، - دەدى.
«قازاقستان رەسپۋبليكاسى پرەزيدەنتىنىڭ حالىققا ارناعان بۇگىنگى جولداۋىندا «قازاقستانداعى باسقارۋ فورماسى وزگەرۋى ءتيىس، پارلامەنت كوپ وكىلەتتىككە يە بولادى. بىزگە قازاقستاننىڭ دامۋىنىڭ ساياسي مودەلىن قايتا قۇرۋ بويىنشا سىندارلى قادامدار قاجەت. بۇل ەڭ الدىمەن سۋپەر پرەزيدەنتتىك باسقارۋ فورماسىنان كۇشتى پارلامەنتى بار پرەزيدەنتتىك رەسپۋبليكاعا تۇپكىلىكتى كوشۋ. مۇنداي جۇيە بيلىك ينستيتۋتتارىنىڭ وڭتايلى تەڭگەرىمىن قامتاماسىز ەتۋگە جانە ەلدىڭ ورنىقتى دامۋىنا ىقپال ەتەتىنىن باسا ايتقان مەملەكەت باسشىسى، باسشىسى بارلىق ازاماتتار ءۇشىن مۇمكىندىكتەردىڭ تەڭدىگىنە كەپىلدىك بەرۋى ءتيىس ەكەنىن اتاپ ءوتتى. قازاقستان ينجەنەرلىك-تەحنولوگيالىق ۋنيۆەرسيتەتىنىڭ وقىتۋشى-پروفەسسورلار قۇرامى مەن ءبىلىم الۋشىلارى پرەزيدەنت جولداۋىن ۇلكەن ىقىلاسپەن قابىل الدى. جاڭا قازاقستان قۇرۋدا جاڭعىرۋ مەن جاڭارۋ جولىنداعى وزگەرىستى ءار ادام وزىنەن باستاۋى كەرەك دەگەن پىكىرىن ءار ازامات وزدەرىنە ارتىلعان سەنىم جانە ۇلكەن جاۋاپكەرشىلىك دەپ تۇسىنەدى» - دەپ پىكىر ءبىلدىردى الەۋمەتتىك – گۋمانيتارلىق پاندەر كافەدراسىنىڭ قاۋىمداستىرىلعان پروفەسسورى ر.ش.ابديسۋلەيمەنوۆا.
«مەملەكەت باسشىسى ەلىمىزدە قاڭتار ايىندا بولعان جاعدايعا توقتالىپ، الداعى ۋاقىتتا جۇزەگە اسىرىلاتىن باعىتتاردى ايقىنداپ بەردى. بارلىق باعىتتاعى وزگەرىستەر «كۇشتى پرەزيدەنت، مىقتى پارلامەنت، ەسەپ بەرەتىن ۇكىمەت» دەگەن ءپرينتسيپتىڭ جۇزەگە اسىرىلۋىنا باعىتتالادى.پرەزيدەنتتىڭ جولداۋىنداعى تىڭ رەفورمالار ەلىمىزدىڭ گۇلدەنۋى مەن ەكونوميكاسىنىڭ دامۋىنا وڭ اسەرىن بەرەدى دەپ سەنەمىن»،- دەپ پىكىر ءبىلدىردى قازيتۋ كوللەدجى ديرەكتورى م.ح.شالاباەۆا.
"ادىرنا" ۇلتتىق پورتالى
