جەكەمەنشىك مەكتەپتەردىڭ 57 پايىزى تالاپتارعا ساي كەلمەيدى. بۇل تۋرالى ءماجىلىس دەپۋتاتى مۇرات ابەنوۆ ايتتى، دەپ حابارلايدى "ادىرنا".
ول جەكەمەنشىك مەكتەپتەردەگى زاڭبۇزۋشىلىقتار مەن ساپا ماسەلەلەرىنە بايلانىستى ءوز پىكىرىن اشىق ءبىلدىردى. دەپۋتاتتىڭ ايتۋىنشا، جوعارعى اۋديتورلىق پالاتانىڭ تەكسەرىسى جەكەمەنشىك مەكتەپتەردەگى ماسەلەلەردى انىقتاعان. سانيتارلىق نورمالاردىڭ ساقتالماۋى، جەلدەتۋ جۇيەسىنىڭ دۇرىس بولماۋى، تەمپەراتۋرالىق رەجيمنىڭ سايكەس ەمەستىگى، كۇن ساۋلەسىنىڭ جەتكىلىكسىز ءتۇسۋى، ءورت قاۋىپسىزدىگى تالاپتارىنىڭ ورىندالماۋى – باستى پروبلەمالاردىڭ قاتارىندا. سونىمەن بىرگە زەرتحانالار، ارنايى كابينەتتەر مەن كومپيۋتەرلىك تەحنيكا سياقتى وقۋ قۇرال-جابدىقتارىنىڭ دا تاپشىلىعى بايقالعان.
"عيماراتتاردىڭ ساپاسى سايكەس كەلمەيدى، ارنايى سالىنباعان، سانيتارلىق تالاپتار، بالالار وتىراتىن بولمەدە تازا اۋا (ۆەنتيلياتسيا), تەمپەراتۋرالىق نورمالار، كۇن ساۋلەسىنىڭ ءتۇسۋى، ءورت قاۋىپسىزدىگى ساقتالماعان. وقۋ ستاندارتتارى بويىنشا قۇرال-جابدىقتار — لابوراتوريالار، ارنايى كابينەتتەر، كومپيۋتەرلىك تەحنولوگيالار جەتىسپەيدى. مۇعالىمدەردىڭ ءبىلىم دارەجەسى سايكەس ەمەس. وقىماعان بالانى وقىدى دەپ ەسەپ بەرگەن. وكىنىشكە قاراي، سوڭعى جىلدارى اعارتۋ مينيسترلىگى جانىنداعى قارجى ورتالىعى ارقىلى جەكە مەكتەپتەردىڭ قارجىسى تەكسەرىلمەي تولەنگەن.
ارتىق، زاڭسىز كەتكەن قارجى قايتارىلماعان. مەكتەپ يەلەرىنە ءىس قوزعاماعان، ميللياردتاعان ۇرلانعان اقشانى ءالى قايتارماعان", - دەدى دەپۋتات.
وسى ورايدا ابەنوۆ جاڭادان تاعايىندالعان مينيستر جۇلدىز سۇلەيمەنوۆانىڭ باستامالارىن قولدايتىنىن جەتكىزدى.
"جاڭادان كەلگەن مينيستر جۇلدىز سۇلەيمەنوۆا قارجىلىق ءتارتىپتى ورناتۋدى قولعا الدى. ءوزى باتىل جانە تازا ادام. جۇلدىز قارىنداسىمىز ءبىلىم سالاسىنىڭ الاياقتىقپەن نانىن جەپ جۇرگەن قىلمىستىق توپتارىنىڭ ەشقانداي ۇگىت-ناسيحاتىنا كونبەيدى، قورقىتام دەگەندەرگە باس يمەيدى. شانتاج جاساۋدى قويىڭدار. مۇعالىمدەر ارقىلى ايقاي-شۋ شىعارىپ، جاسالماعان جۇمىستار ءۇشىن اقشانى ماجبۇرلەپ تولەتەمىز، باق پەن الەۋمەتتىك جەلى ارقىلى جاۋاپتى تۇلعالاردى قورقىتامىز دەپ ارەكەت جاساعاندار وتپەن ويناماڭدار. جاڭا ءمينيستردىڭ ءتارتىپ ورناتام دەگەن بارلىق تالابىن تولىق قولدايمىز", - دەدى دەپۋتات.
مۇرات ابەنوۆ ءوز تاراپىنان باس پروكۋراتۋرا مەن ۇلتتىق قاۋىپسىزدىك كوميتەتىنە ارنايى تەكسەرىس جۇرگىزۋ تۋرالى تالاپ جولدايتىنىن ايتتى. ول پرەزيدەنت قاسىم-جومارت توقاەۆ ۇستانعان «زاڭ جانە ءتارتىپ» قاعيداسى بار ەكەنىن ەسكە سالىپ، زاڭ بۇزعاندار جازاسىز قالماۋى كەرەك ەكەنىن اتاپ ءوتتى.
دەپۋتاتتىڭ پىكىرىنشە، ءبىلىم بەرۋ سالاسىن بيزنەسكە اينالدىرۋ دۇرىس ەمەس.
«قولىڭنان كەلمەي مە – اينالىسپا. اقشا سالدىم، مىندەتتى تۇردە پايدا تابۋىم كەرەك دەگەن ۇستانىم – قاتە»، –دەيدى ول.
سونىمەن بىرگە ول ساپالى جۇمىس ىستەپ وتىرعان جەكە مەكتەپتەر بار ەكەنىن، ولارعا بۇل سىننىڭ قاتىسى جوق ەكەنىن ايتتى.
