بۇرىنعى دەنساۋلىق ساقتاۋ ۆيتسە-ءمينيسترى ولجاس ابىشەۆ ەلدەگى زاڭسىزدىقتار مەن تەرگەۋ يزولياتورىنداعى ازاپتاۋلار تۋرالى اشىق ايتتى، دەپ حابارلايدى «ادىرنا» ءتىلشىسى Ulysmedia.kz-كە سىلتەمە جاساپ.
قازىرگى تاڭدا ۇيقاماقتا وتىرعان بۇرىنعى دەنساۋلىق ساقتاۋ ءمينيسترى ەلجان ءبىرتانوۆ ءوزىنىڭ بۇرىنعى ورىنباسارى ولجاس ابىشەۆتىڭ سوت وتىرىسىندا سويلەگەن ءسوزىن الەۋمەتتىك جەلىدەگى پاراقشاسىندا ءبولىستى.
ولجاس ابىشەۆ ءبىرتانوۆتى جاقتاۋشى تاراپتى، ادۆوكاتتى جانە ءبىرتانوۆتىڭ سوزدەرىن تولىق قولدايتىنىن جەتكىزدى.
“189 باپقا بايلانىستى “وزگەنىڭ مۇلكىن زاڭسىز يەلەنۋ” دەرەگى انىقتالسا، ول 2 جىلدا انىقتالاتىن ەدى. وسى باپقا قاتىستى كىنانى انىقتاي الماسا، دەمەك قىلمىس جاسالعان جوق. سوتقا دەيىنگى تەرگەۋ امالدارىنان بولەك، 2019 جىلعى 130 توم ماتەريالدا كورسەتىلگەن دەرەكتەردى ايتپاعاندا، سول ۋاقىتتا قارجىلىق مونيتورينگى اگەنتتىگى دەپ اتالعان مەكەمە وكىلدەرى مەنىڭ بارلىق تەلەفون قوڭىراۋلارىم مەن حاتتارىمدى تىڭداپ، وقىپ وتىردى. ولار سول ۋاقىتتان باستاپ ىلىك ىزدەپ، زاڭسىز ارەكەتتى انىقتاي المادى. مەن وزىمە تاپسىرىلعان قىزمەتتى اسىرا پايدالانعان جوقپىن. مەنىڭ بارلىق ارەكەتىم مەملەكەت ەمەس، حالىق ءۇشىن جاسالدى”، – دەدى ول.
سونداي-اق ول قازاقستاننىڭ ءدارىسى وزبەكستانعا ساتىلىپ، ءوز حالقىمىزدىڭ نەسيەگە ءدارى الۋعا ءماجبۇر بولعانىن ايتتى.
“بۇل حالىققا جاسالعان قاستاندىق. قىلمىس. ەگەر بيلىكتەگىلەر لاۋازىمدى تۇلعالاردىڭ ورنىن اۋىستىرعىسى كەلسە، قارسىلىعىم جوق. بىراق، مەنىڭ ارىم تازا. بىردە-ءبىر ادامنان كوك تيىن دا العان جوقپىن. مەن كونستيتۋتسيا ەرەجەلەرىنە ساي جۇمىس ىستەدىم”، – دەدى ولجاس ابىشەۆ.
ول تەرگەۋدە كورگەن ازاپتاۋلارى تۋرالى ايتا كەلىپ، قۇقىق قورعاۋ ورگاندارىنىڭ ارقايسىسى قويدىڭ تەرىسىن جامىلعان قاسقىر سەكىلدى دەپ باعالادى.
“100 كۇن قاماۋدا وتىرۋ، مورالدىق جانە فيزيكالىق تۇرعىداعى زورلىق وڭايعا تيگەن جوق. بۇل جايلى باس پروكۋراتۋراعا دا ايتىلدى. ەشكىم ساۋساعىن دا قيمىلداتقان جوق. قارجىلىق مونيتورينگ اگەنتتىگىنىڭ قىزمەتكەرلەرى كۇندە كەلىپ، قانشا ساعات بويى تەرگەۋ جۇرگىزىپ، قورلىق كورسەتتى. بۇل ءىستى ادۆوكاتسىز جۇرگىزدى. ءتىپتى كۋاگەرلەر شاقىرتىلعان جوق. تەرگەۋ، تەكسەرۋ، قىلمىسقا قاتىستى باس پروكۋراتۋرا رەاكتسيا دا بىلدىرگەن جوق. زاڭعا باعىنىشتى ادامدارعا زاڭسىز قورلىق كورسەتۋ، ۇرىپ-سوعۋ، تەرگەۋ جۇرگىزۋ – ەلىمىزدە قالىپتى جاعداي سەكىلدى. مەن وڭتۇستىك كورەيادا 6 جىل تۇردىم. كەيىن ەلىمە ورالدىم. كورەياداعى سەكىلدى حالىققا قولايلى ءارى ىڭعايلى جاعداي جاساعىم كەلدى. بىراق ءدال وسىنداي جاعدايعا دۋشار بولعانىما تاڭقالىپ وتىرمىن. بۇل تۋرالى مەن ءوز ۇرپاعىما، بالالارىما، نەمەرەلەرىمە ءاردايىم ايتىپ وتىرامىن. مۇندايدى ەشقاشان ۇمىتۋ مۇمكىن ەمەس. بۇل ەلدەگى جەمقورلىق پەن زاڭسىزدىقتى جەڭۋ مۇمكىن ەمەس. مەن اتاپ وتكەن ورگانداردىڭ ارقايسىسى قويدىڭ تەرىسىن جامىلعان قاسقىر سەكىلدى”، – دەدى ەكس-ۆيتسە-مينيستر.
