«حالىق جۇمىلماي، قازاقستان جاڭا بولا المايدى. حالىق قولداماي، بىردە-ءبىر باسشىنىڭ جوسپارى جۇزەگە اسپايدى». بۇل – بەلگىلى تاريحشى عالىم حانگەلدى ءابجانوۆتىڭ بۇگىن الماتى قالاسىندا وتكەن ميتينگتە ايتقان ءسوزى.
بەيبىت ميتينگكە قاتىسقان قر ۇلتتىق عىلىم اكادەمياسىنىڭ اكادەميگى، تاريح عىلىمدارىنىڭ دوكتورى، پروفەسسور حانكەلدى ءابجانوۆ بابالارىمىز بىرلىكتىڭ قۇدىرەتىن، ونى ساقتاۋدىڭ شارتىن وسىدان مىڭ جىل بۇرىن تاسقا جازىپ كەتكەنىن ايتتى.
«كۇلتەگىننىڭ تاسىندا بىلاي دەيدى: «بەكتەرى، حالقى ءتۇزۋ، ادال بولماعاندىقتان، تابعاچ حالقىنىڭ الداۋىنا سەنگەندىكتەن، ارباۋىنا كونگەندىگىنەن، بەكتەرى مەن حالىقتىڭ ىمىراسىزدىعىنان تۇرىك حالقى ەلدىگىنەن، ەلىنەن ايىرىلدى». ەلدىگى دەگەن مەملەكەتتىگى دەگەن ءسوز. ال ەندى وسىنداي امانات قالدىرعان بابالاردىڭ ءداستۇرىن جالعاستىرعان اباي، «بىرلىك مالعا ساتىلسا، ول انتۇرعاننىڭ باسى» دەيدى. كەشەگى قاڭتار قاسىرەتى – سول مالعا، اقشاعا ساتىلعانداردىڭ ءىسى. وندايلارعا قازاقستان، قازاقتىڭ جەرى، ءتىلى كەرەك ەمەس. ولاردىڭ كوزدەگەنى تەك مال، اقشا، بايلىق قانا. ال ءبىزدىڭ ازاتتىعىمىز الەمنىڭ بايلىعىنان دا قىمبات»، - دەگەن عالىم قاڭتار وقيعاسىنان ساباق الىپ، قازاقستاننىڭ ءاربىر ازاماتىن وتە ساق، بەلسەندى، ىجداقاتتى جۇمىس ىستەۋگە ۇندەدى.
سونداي-اق، ول جاڭارۋ مەن جاڭعىرۋعا باعىتتالعان مەملەكەت باسشىسى جولداۋىنىڭ وزەكتىلىگىنە توقتالدى.
«كەشەگى پرەزيدەنتىمىزدىڭ جولداۋى – بۇل جاڭا قازاقستاندى قۇرۋدىڭ باعدارلاماسى. مۇنداعى باستامالار، اسىرەسە، ساياسي رەفورمالار قالىڭ قازاقتى، قاراپايىم حالىقتى بيلىككە تارتۋعا، ولاردى بەلسەندى قوعام قۇرۋشىعا اينالدىرۋعا باعىتتالعان. حالىق جۇمىلماي، قازاقستان جاڭا بولا المايدى. حالىق قولداماي، بىردە-ءبىر باسشىنىڭ جوسپارى جۇزەگە اسپايدى. ءاردايىم ساق بولىپ، الداعى ءىسىمىزدى جاسامپازدىقپەن ساپالى اتقارايىق»، - دەدى حانكەلدى ءابجانوۆ.
ەسكە سالا كەتەيىك، بۇگىن الماتىلدا بەيبىت ميتينگ ءوتتى. ونى «AMANAT» پارتياسىنىڭ الماتى قالالىق فيليالى مەملەكەت باسشىسى قاسىم-جومارت توقاەۆتىڭ جولداۋىنداعى ساياسي رەفورمالاردى قولداۋ ماقساتىندا ۇيىمداستىردى.
