«Halyq jumylmaı, Qazaqstan jańa bola almaıdy. Halyq qoldamaı, birde-bir basshynyń jospary júzege aspaıdy». Bul – belgili tarıhshy ǵalym Hangeldi Ábjanovtyń búgin Almaty qalasynda ótken mıtıngte aıtqan sózi.
Beıbit mıtıngke qatysqan QR Ulttyq ǵylym akademııasynyń akademıgi, tarıh ǵylymdarynyń doktory, professor Hankeldi Ábjanov babalarymyz birliktiń qudiretin, ony saqtaýdyń shartyn osydan myń jyl buryn tasqa jazyp ketkenin aıtty.
«Kúlteginniń tasynda bylaı deıdi: «Bekteri, halqy túzý, adal bolmaǵandyqtan, tabǵach halqynyń aldaýyna sengendikten, arbaýyna kóngendiginen, bekteri men halyqtyń ymyrasyzdyǵynan túrik halqy eldiginen, elinen aıyryldy». Eldigi degen memlekettigi degen sóz. Al endi osyndaı amanat qaldyrǵan babalardyń dástúrin jalǵastyrǵan Abaı, «birlik malǵa satylsa, ol anturǵannyń basy» deıdi. Keshegi qańtar qasireti – sol malǵa, aqshaǵa satylǵandardyń isi. Ondaılarǵa Qazaqstan, qazaqtyń jeri, tili kerek emes. Olardyń kózdegeni tek mal, aqsha, baılyq qana. Al bizdiń azattyǵymyz álemniń baılyǵynan da qymbat», - degen ǵalym qańtar oqıǵasynan sabaq alyp, Qazaqstannyń árbir azamatyn óte saq, belsendi, yjdaqatty jumys isteýge úndedi.
Sondaı-aq, ol jańarý men jańǵyrýǵa baǵyttalǵan Memleket basshysy Joldaýynyń ózektiligine toqtaldy.
«Keshegi Prezıdentimizdiń Joldaýy – bul Jańa Qazaqstandy qurýdyń baǵdarlamasy. Mundaǵy bastamalar, ásirese, saıası reformalar qalyń qazaqty, qarapaıym halyqty bılikke tartýǵa, olardy belsendi qoǵam qurýshyǵa aınaldyrýǵa baǵyttalǵan. Halyq jumylmaı, Qazaqstan jańa bola almaıdy. Halyq qoldamaı, birde-bir basshynyń jospary júzege aspaıdy. Árdaıym saq bolyp, aldaǵy isimizdi jasampazdyqpen sapaly atqaraıyq», - dedi Hankeldi Ábjanov.
Eske sala keteıik, búgin Almatylda beıbit mıtıng ótti. Ony «AMANAT» partııasynyń Almaty qalalyq fılıaly Memleket basshysy Qasym-Jomart Toqaevtyń Joldaýyndaǵy saıası reformalardy qoldaý maqsatynda uıymdastyrdy.
