8 qaraşa künı Şotlandiianyŋ Glazgo qalasynda äielder arasynda tennisten komandalyq älem chempionaty – Billi Djin King kubogy bastaldy. Atalǧan saiysta el namysyn Iаroslava Şvedova bastaǧan Qazaqstan qūramasy qorǧaidy.
Qazaqstandyqtar S tobynda Ūlybritaniia jäne İspaniia komandalarymen baq synaidy. Oiyndar 8 200 körermen siiatyn Emirates Arena stadionynyŋ hard tösenınışındegı kortynda ötedı.
Qazaqstan qūramasy sapynda biylǧy Uimbldon turnirınıŋ jeŋımpazy Elena Rybakina, Iýliia Putinseva, Anna Danilina jäne Jıbek Qūlambaeva bar.
Match aldynda ötken baspasöz mäslihatynda qūrama kapitany Iаroslava Şvedova qazaqstandyq qyzdardyŋ mūndai deŋgeidegı jarysqa alǧaş ret qatysatynyna qaramastan, olarǧa senetının mälımdedı.
«Bızdıŋ komanda myqty, tek Zarina Diias jetıspeidı, degenmen Jıbek Qūlambaeva qosyldy. Qyzdar bar yqylasymen daiyndalyp jatyr, qarsylasty da zertteudemız. Ädettegıdei matchqa äzırlenudemız. Aziia – Tynyq mūhity aimaǧynda osyndai tūrpatta oinaǧandyqtan, būl bızge taŋsyq emes. Jeŋıs üşın bar küşımızdı salamyz», - dedı Iа.Şvedova.
Qūrama köşbasşysy Elena Rybakina Glazgoǧa älemnıŋ myqty komandalarynyŋ jinalǧanyn, olardyŋ ärqaisysynyŋ jeŋısten ümıttı ekendıgın jetkızdı.
«Qazaqstan qūramasy üşın būl älem chempionatynyŋ alǧaşqy finaly bolmaq. Är qūrama küştı bolǧandyqtan, bäseke oŋaiǧa tüspeidı. Jyldyŋ aiaǧy bolǧanyna qaramastan, qai-qaisysy da el namysy üşın aianbaidy», - dedı 23 jastaǧy sportşy.
Qazaqstannyŋ ekınşı raketkasy Iýliia Putinseva mūndai dodalarda reitingtıŋ pälendei röl atqarmaitynyn aitty.
«Billi Djin King kubogynda reiting eşteŋenı şeşpeidı. Keide üşınşı nemese törtınşı jüzdıkke kıretın oiynşy üzdık 20, 50 nemese 100 tennisşınıŋ deŋgeiınde öner körsetıp, qarsylasyn jeŋıp ketıp jatady. Sondai-aq keide reitingısı joǧary sportşylar ūlttyq qūrama üşın bäsekede joǧary nätije körsete almaidy. Tek mūnda kortqa şyǧyp, bar şeberlıgıŋdı sarp etıp, öz komandaŋa ūpai alyp berudı ǧana oilau kerek», - dedı Iý.Putinseva.
Qazaqstannyŋ jūptyq syndaǧy bırınşı raketkasy Anna Danilina AQŞ-ta ötken WTA qorytyndy turnirıne qatysqandyqtan, Glazgoǧa keiın ūşyp keldı. Ol mūndaǧy aua raiy men kortqa tez beiımdelu qajettıgın aitty.
«Ūlttyq qūramanyŋ turnirdıŋ finaldyq kezeŋıne ötkenıne quanyştymyn. Men ekınşı ret el namysyn qorǧamaqşymyn. Komandaǧa kömektesemın dep ümıttenemın», - dedı qūramanyŋ eŋ jas oiynşysy Jıbek Qūlambaeva.
Komandany älem chempionatynda qoldau üşın Qazaqstan tennis federasiiasynyŋ prezidentı Bolat Ötemūratov arnaiy keldı.
Billi Djin King kubogynyŋ Glazgodaǧy finaldyq kezeŋı 8-13 qaraşa aralyǧynda ötedı. Qazaqstan bügın Ūlybritaniiamen, erteŋ İspaniia qūramasymen synǧa tüsedı.
