Qazaqstan Auǧanstan aumaǧynda salynatyn Tūrǧūndi – Gerat temırjolynyŋ qarjylandyru qūrylymyn pysyqtady, dep habarlaidy "Adyrna" ūlttyq portaly.
Būl turaly vise-ministrı Maqsat Qaliaqparov Ükımet otyrysynda mälımdedı.
Onyŋ aituynşa, ūzyndyǧy 120 şaqyrym bolatyn joba 2026–2027 jyldary jüzege asyrylmaq. Qazır qarjylandyru tetıkterı naqtylanyp, investisiia tartu baǧytynda jūmys jürıp jatyr.
«Temırjol jelısın ıske qosu Qazaqstannan Auǧanstanǧa jük eksporttau men tranzittık tasymaldy arttyruǧa mümkındık beredı. Sonymen qatar, joba arqyly Päkıstan men Ündıstan naryqtaryna şyǧu közdelgen», — dedı Qaliaqparov.
Eske sala ketsek, şılde aiynda Qazaqstan premer-ministrı Oljas Bektenov XVII Ekonomikalyq yntymaqtastyq ūiymynyŋ sammitı aiasynda Auǧanstan ükımetınıŋ ökılderımen kezdesu barysynda jobany qarjylandyruǧa daiyn ekenın mälımdegen edı. Keiın «Bahtar» memlekettık agenttıgı Qazaqstan temırjol qūrylysyna 500 mln dollar investisiia salatynyn habarlady.
Būl aqparatty tamyz aiynda vise-premer, ūlttyq ekonomika ministrı Serık Jūmanǧarin de rastaǧan. Onyŋ aituynşa, atalǧan qarajat jobanyŋ alǧaşqy kezeŋıne bölınedı.
