مەرەكەلىك شارا اقتوبە قالاسى مەن وبلىستىڭ بارلىق اۋداندارىندا ۇيىمداستىرىلعان. وبلىس اكىمى وڭداسىن ورازالين اقتوبەلىكتەرمەن مەرەكەلىك قۋانىشتى ءبولىستى.
ءوڭىر باسشىسى وبلىس ورتالىعىندا «ۇلىستىڭ ۇلى كۇنى» مادەني-كوپشىلىك شارالار ءوتىپ جاتقان بىرنەشە الاڭعا باردى.
«سىزدەردى ۇلى مەرەكە - ناۋرىز مەيرامىمەن شىن جۇرەكتەن قۇتتىقتايمىن. جاڭا جىلدىڭ باستالۋىمەن ءبىز ەڭ اسىل تىلەكتەردى بىرىكتىرىپ، بەلگىلى ءبىر ماقساتتار قويامىز. الايدا ەشتەڭە وزدىگىنەن كەلمەيدى. قولايلى ءومىر ناقتى ءىس پەن ءتيىمدى ارەكەتتىڭ ناتيجەسى بولىپ تابىلادى. وزگەرىس ارقايسىسىمىزدان باستالادى، سول ءۇشىن سانامىزدى وزگەرتىپ، سوزدەن ىسكە كوشكەنىمىز ءجون. مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا الداعى جاڭارۋ مەن جاڭعىرۋعا دەگەن باتىل قادامدار كورسەتىلگەن. مەملەكەت باسشىسى ايقىنداعان باسىمدىقتاردى قوعامىمىزدى قايتا فورماتتاۋ، جاڭا قازاقستاندى قۇرۋدىڭ نەگىزى رەتىندە قابىلداۋ كەرەك. ءبىز اۋقىمدى مىندەتتەردى ساپالى ءارى ءونىمدى ورىنداۋ ءۇشىن جۇمىلا قيمىلداۋىمىز قاجەت. ناۋرىز يگى ىستەر مەن ءپوزيتيۆتى وزگەرىستەردىڭ باستاۋى بولسىن! ەلىمىز بەن ءار وتباسىعا قۇت-بەرەكە، كەلىسىم اكەلسىن!»،- دەدى اقتوبەلىكتەردى قۇتتىقتاعان وڭداسىن ورازالين.
مادەني-كوپشىلىك شارالار وبلىس ورتالىعىنىڭ تۇڭعىش پرەزيدەنت اتىنداعى ساياباقتا، قوبىلاندى باتىر اتىنداعى ورتالىق ستاديوندا، ەسەت باتىر (نۇر اقتوبە) تۇرعىن ءۇي الابىندا، اباي بۋلۆارىندا، رەتروپاركتە، «دەنساۋلىق» ساياباعىندا، قۋرايلى، نوكين، جاڭاقونىس، سازدى تۇرعىن ءۇي الاپتارىنداعى مادەنيەت ۇيلەرىندە، سونىمەن قاتار، «كەرۋەن سيتي»ويىن-ساۋىق – ساۋدا ورتالىعىندا وتۋدە.
كيىز ۇيلەر تىگىلىپ، تەاترلاندىرىلعان كورىنىستەر، قولونەرشىلەردىڭ كورمە-جارمەڭكەلەرى، ساۋدا ورىندارى، سپورتتىق ويىندار، التىباقاندار، تازى مەن توبەت يتتەردىڭ كورمەسى جانە ت.ب. ۇيىمداستىرىلدى.
سونداي-اق، حالىق ءداستۇرلى ناۋرىز كوجە مەن باۋىرساقتاردان اۋىز ءتيدى.
"ادىرنا" ۇلتتىق پورتالى
