Merekelik shara Aqtóbe qalasy men oblystyń barlyq aýdandarynda uıymdastyrylǵan. Oblys ákimi Ońdasyn Orazalın aqtóbeliktermen merekelik qýanyshty bólisti.
Óńir basshysy oblys ortalyǵynda «Ulystyń Uly kúni» mádenı-kópshilik sharalar ótip jatqan birneshe alańǵa bardy.
«Sizderdi uly mereke - Naýryz meıramymen shyn júrekten quttyqtaımyn. Jańa jyldyń bastalýymen biz eń asyl tilekterdi biriktirip, belgili bir maqsattar qoıamyz. Alaıda eshteńe ózdiginen kelmeıdi. Qolaıly ómir naqty is pen tıimdi árekettiń nátıjesi bolyp tabylady. Ózgeris árqaısysymyzdan bastalady, sol úshin sanamyzdy ózgertip, sózden iske kóshkenimiz jón. Memleket basshysy Qasym-Jomart Toqaevtyń Qazaqstan halqyna joldaýynda aldaǵy jańarý men jańǵyrýǵa degen batyl qadamdar kórsetilgen. Memleket basshysy aıqyndaǵan basymdyqtardy qoǵamymyzdy qaıta formattaý, jańa Qazaqstandy qurýdyń negizi retinde qabyldaý kerek. Biz aýqymdy mindetterdi sapaly ári ónimdi oryndaý úshin jumyla qımyldaýymyz qajet. Naýryz ıgi ister men pozıtıvti ózgeristerdiń bastaýy bolsyn! Elimiz ben ár otbasyǵa qut-bereke, kelisim ákelsin!»,- dedi aqtóbelikterdi quttyqtaǵan Ońdasyn Orazalın.
Mádenı-kópshilik sharalar oblys ortalyǵynyń Tuńǵysh Prezıdent atyndaǵy saıabaqta, Qobylandy batyr atyndaǵy ortalyq stadıonda, Eset batyr (Nur Aqtóbe) turǵyn úı alabynda, Abaı býlvarynda, Retroparkte, «Densaýlyq» saıabaǵynda, Qýraıly, Nokın, Jańaqonys, Sazdy turǵyn úı alaptaryndaǵy mádenıet úılerinde, sonymen qatar, «Kerýen sıtı»oıyn-saýyq – saýda ortalyǵynda ótýde.
Kıiz úıler tigilip, teatrlandyrylǵan kórinister, qolónershilerdiń kórme-jármeńkeleri, saýda oryndary, sporttyq oıyndar, altybaqandar, tazy men tóbet ıtterdiń kórmesi jáne t.b. uıymdastyryldy.
Sondaı-aq, halyq dástúrli Naýryz kóje men baýyrsaqtardan aýyz tıdi.
"Adyrna" ulttyq portaly
