تاريحي جەڭىس! قازاق بالۋانى ەرسىن بالتاعۇل جاپونياداعى سۋمو كۇرەسىنەن بيىلعى حارۋ باشيودا ماكۇشيتا ديۆيزيونى بويىنشا 7:0 ەسەبىمەن ۇلكەن سپورتتاعى العاشقى جەڭىسىنە قول جەتكىزدى. ال جوعارعى ديۆيزيون بويىنشا سەكيۆاكە ۆاكاتاكاكا چەمپيون اتاندى.
سۋموشى ەرسىن بالتاعۇل بۇعان دەيىن 2019 جىلعى 18 قاراشادا جاپونيادا جاستار اراسىندا وتكەن دودادا سۋمو چەمپيونى اتانعان بولاتىن. ودان كەيىن كوپكە دەيىن وتانداسىمىز مۇلدە كورىنبەي، كوڭىلىمىزدى كۇپتى قىلىپ قويعان ەدى. بۇل جولعى باشيودا جارق ەتىپ كوزگە ءتۇستى.
ەرسىن بالتاعۇل توكيوعا الماتىدان 18 جاسىندا اتتانعان. ول بالا كۇنىندە قازاق جانە جۋدو كۇرەسىمەن اينالىسقان. ەرسىننىڭ سۋمو كۇرەسىنە كەلۋىنە جول اشقان – ايگىلى موڭعول بالۋانى سۋمو كۇرەسىنىڭ چەمپيونى (يوكوزۋنا) اساشيوري داگۆادورج. ول قازاق جىگىتىنىڭ ەرەكشە دەنە بىتىمىنە نازارى ءتۇسىپ، ونىڭ جاپونيادا وقۋىنا قولعابىس جاساعان ەدى.
بۇگىندە ەرسىن نيحون ۋنيۆەرسيتەتىندە ءۇش باپكەردەن (وياكاتا) ءتالىم الادى. ول وقۋعا بارعاندا سالماعى 130 كەلى تارتسا، قازىر 190 كەلىگە دەيىن جەتكەن. ەرسىننىڭ سۋموداعى لاقاپ اتى – كينبوزان، قازىرگى دارەجەسى – Ms34.
باقىتبەك قادىر
