تاجىكستان سىرتقى ىستەر مينيسترلىگى ماسكەۋدەگى وقۋشى ولىمىنە قاتىستى مالىمدەمە جاسادى، دەپ حابارلايدى "ادىرنا" ۇلتتىق پورتالى.
فەرعانا مالىمەتىنشە، ودينتسوۆو قالاسىندا مەكتەپ وقۋشىسىنىڭ قازا تابۋىنا بايلانىستى مالىمدەمە جاساپ، رەسەي بيلىگىن كىنالىلەردى جاۋاپكەرشىلىككە تارتۋعا شاقىردى. ۆەدومستۆونىڭ مالىمدەمەسى ءسىم-ءنىڭ رەسمي سايتىندا جاريالاندى.
مينيسترلىك اتالعان قىلمىستىڭ ۇلتارالىق وشپەندىلىك نەگىزىندە جاسالعانىن اتاپ ءوتتى. قايتىس بولعان بالا ماسكەۋ وبلىسى ودينتسوۆو قالالىق وكرۋگىنە قاراستى گوركي-2 كەنتىندەگى ۋسپەن ورتا مەكتەبىندە وقىعان. 4-سىنىپ وقۋشىسى - كوبيلجون اليەۆ. ول تاجىكستان مەن رەسەيدىڭ قوس ازاماتتىعىنا يە بولعان.
مالىمدەمەدە تاجىكستان رەسپۋبليكاسىنداعى رەسەي فەدەراتسياسىنىڭ ەلشىسى سەرگەي گريگورەۆتىڭ تاجىكستان ءسىم-نە شاقىرىلعانى جانە وعان رەسمي نوتا تاپسىرىلعانى ايتىلدى. وندا رەسەي تاراپىنان بۇل وقيعانى جەدەل، وبەكتيۆتى جانە بەيتاراپ تەرگەۋ، سونداي-اق كىنالىلەردى زاڭ اياسىندا قاتاڭ جاۋاپكەرشىلىككە تارتۋ تالاپ ەتىلگەن.
سىرتقى ىستەر مينيسترلىگى قازا تاپقان بالانىڭ وتباسىنا كوڭىل ايتىپ، تاجىكستاننىڭ رەسەيدەگى ەلشىلىگىنە مارقۇمنىڭ تۋىستارىمەن تۇراقتى بايلانىستا بولىپ، ءىستى باقىلاۋدا ۇستاۋ تاپسىرىلعانىن حابارلادى.
وقيعا 2025 جىلدىڭ 16 جەلتوقسانىندا بولعان. الدىن الا مالىمەتكە سايكەس، 15 جاستاعى ۋسپەن مەكتەبىنىڭ وقۋشىسى پىشاق پەن گاز باللونىن پايدالانىپ، وقۋ ورنىنىڭ كۇزەتشىسىن جارالاپ، 10 جاستاعى ءتورتىنشى سىنىپ وقۋشىسىن ولتىرگەن. كەيىن ول ءبىر سىنىپقا بەكىنىپ، وقۋشىلاردىڭ ءبىرىن كەپىلگە العان. وقيعا ورنىنا كەلگەن كۇشتىك قۇرىلىم وكىلدەرى ءجاسوسپىرىمدى ۇستادى.
رەسەيدىڭ تەرگەۋ كوميتەتى ادام ءولتىرۋ جانە ادام ولتىرۋگە وقتالۋ باپتارى بويىنشا قىلمىستىق ءىس قوزعادى. ەگەر سوت-پسيحياتريالىق ساراپتاما ءجاسوسپىرىمدى ەسى دۇرىس دەپ تانىسا، وعان تاربيەلىك كولونيادا 10 جىلعا دەيىن باس بوستاندىعىنان ايىرۋ جازاسى قولدانىلۋى مۇمكىن.
بولجامداردىڭ بىرىنە سايكەس، قىلمىسقا ءجاسوسپىرىمنىڭ كسەنوفوبيالىق كوزقاراستارى سەبەپ بولعان. كۋاگەرلەردىڭ ايتۋىنشا، ول شابۋىل الدىندا وقۋشىلاردان ۇلتىن سۇراپ، بۇعان دەيىن سىنىپتاستارىنا ءتۇرلى ۇلتتار مەن ءدىني توپتارعا قارسى اگرەسسيۆتى مازمۇنداعى جازبالار تاراتقان. باسقا دەرەك بويىنشا، ونىڭ نەگىزگى نىساناسى ماتەماتيكا ءپانىنىڭ مۇعالىمى بولعان جانە ول قولدان جاسالعان جارىلعىش زات دايىنداۋى مۇمكىن دەگەن بولجام بار.
مارقۇم بالانىڭ اناسى وسى مەكتەپتە ەدەن جۋشى بولىپ جۇمىس ىستەگەن. اقپاراتقا سايكەس، ول كۇيەۋى قايتىس بولعاننان كەيىن ەكى بالانى جالعىز ءوزى تاربيەلەپ كەلگەن.
