ادىلەت ءمينيسترى قانات مۋسين تىركەۋگە قۇجات تاپسىرعان پارتيالار تۋرالى ايتتى، دەپ حابارلايدى “ادىرنا” ۇلتتىق پورتالى Sputnik قازاقستان سايتىنا سىلتەمە جاساپ.
ء"ۇش پارتيا تىركەۋگە قۇجات تاپسىرعان. El Tiregi, بايتاق، سوسىن تاعى بىرەۋى. بىراق ولاردىڭ قۇجاتتارى بىرنەشە رەت قايتارىلعان", - دەدى مۋسين جۋرناليستەرگە بەرگەن سۇحباتىندا.
ءمينيستردىڭ ايتۋىنشا، پارتيانى ۇيىمداستىرۋ توبىنا كىرەتىن ءاربىر ادامنىڭ جەكە مالىمەتتەرى دە كورسەتىلەدى. بىراق قۇجات تاپسىرعان پارتيالاردىڭ ىشىندە مالىمەتتى دۇرىس كورسەتپەگەندەر بار.
"كەيبىر ادامداردىڭ جەكە سايكەستەندىرۋ ءنومىرى سايكەس كەلمەيدى. سوسىن ۇيىمداستىرۋ توبىنىڭ تىزىمىنە قايتىس بولىپ كەتكەن ادامداردى كىرگىزىپ جىبەرگەن. باسقا پارتيالاردىڭ مۇشەلەرى دە بار. زاڭ بويىنشا ولاردى الدىمەن شىعارۋ قاجەت. ەگەر ولار بارلىق قۇجاتتى دۇرىستاپ تاپسىرسا، تىركەيمىز، ەشقانداي كەدەرگى جوق", - دەپ اتاپ كورسەتتى مۋسين.
وسى ورايدا مينيستر پارتيانى تىركەۋ تالاپتارىنىڭ ءالى وزگەرمەگەنىن ەرەكشە اتاپ ءوتتى.
اتاپ ايتقاندا، ۇيىمداستىرۋ توبىنىڭ قۇرامى ءبىر مىڭ ادام بولۋى كەرەك. ال پارتيا مۇشەلەرىنىڭ سانى 20 مىڭنان كەم تۇسپەۋى شارت.
پرەزيدەنت وسى مەجەنى ايتارلىقتاي تومەندەتۋدى تاپسىردى.
”ادىرنا” ۇلتتىق پورتالى
