بۇگىن قر پرەمەر-ءمينيسترى ءاليحان سمايىلوۆ پەن قر پرەزيدەنتى اكىمشىلىگىنىڭ باسشىسى مۇرات نۇرتىلەۋ وبلىستىق ءماسليحاتتىڭ كەزەكتەن تىس سەسسياسىندا دەپۋتاتتاردىڭ كەلىسىمىمەن قىزىلوردا وبلىسىنىڭ جاڭا اكىمى نالىباەۆ نۇرلىبەك ماشبەكۇلىن تانىستىردى.
ايماق حالقى ءۇشىن نۇرلىبەك نالىباەۆ ەتەنە تانىس تۇلعا. بۇعان دەيىن ايماعىمىزدا بىرقاتار جاۋاپتى قىزمەتتەردى اتقارعان.
اسىرەسە 2013-2021 جىلدارى قىزىلوردا قالاسىنىڭ اكىمى رەتىندە ابىرويلى قىزمەت ەتىپ، ءوڭىردىڭ الەۋمەتتىك-ەكونوميكالىق جانە كوممۋنالدىق ماسەلەلەرىن شەشۋ، جول-كولىك ينفراقۇرىلىمىن دامىتۋ، تۇرعىن ءۇي قۇرىلىسىن ارتتىرۋ سەكىلدى ماڭىزدى باستامالار مەن اۋقىمدى جوبالارى ارقىلى جەرگىلىكتى تۇرعىنداردىڭ قولداۋىنا يە بولعان.
بۇگىنگى جاڭا تاعايىنداۋدى دا سىر جۇرتى ەركشە ىقىلاسپەن قابىلداۋدا. ونى الەۋمەتتىك جەلىلەردەگى جازبالار مەن قۇتتىقتاۋلاردان انعارۋعا بولادى.
قر پرەمەر-ءمينيسترى ءاليحان سمايىلوۆتىڭ قاتىسۋىمەن وتكەن كەزەكتەن تىس سەسسيا بارىسىندا مەملەكەت جانە قوعام قايراتكەرى باقبەرگەن سارسەنۇلى دوسمامبەتوۆ: «ايماقتىڭ جاعدايىمەن جاقسى تانىس جانە بارلىق ماسەلەلەردى ءوز كوزىمەن كورىپ، قولىمەن ۇستاپ كورگەن تاجىريبەلى ازامات، ونىڭ ۇستىنە وسى جەردىڭ تۋماسى ن.نالىباەۆتى وبلىس اكىمى قىزمەتىنە تاعايىنداعانى ءۇشىن مەملەكەت باسشىسىنا العىس ايتامىز، ءبىز قولداۋعا دايىنبىز» - دەپ، جاڭا اكىمنىڭ قىزمەتىنە ابىروي تىلەدى.
ايتا كەتۋ كەرەك، ن.نالىباەۆ ەڭبەك جولىندا 1997 جىلدان - 2005 جىلعا دەيىنگى ارالىقتا ءارتۇرلى باسشىلىق قىزمەتتەر اتقارعان.
2005-2007 جىلدارى قىزىلوردا قالاسى اكىمىنىڭ ورىنباسارى، ءبىرىنشى ورىنباسارى بولعان. 2007-2008 جىلدارى قىزىلوردا وبلىسى اكىمىنىڭ اپپاراتىن باسقارعان. 2008-2013 جىلدارى قىزىلوردا وبلىسى شيەلى اۋدانىنىڭ اكىمى، 2013-2021 جىلدارى قىزىلوردا قالاسىنىڭ اكىمى بولعان.
2021 جىلعى ساۋىردەن باستاپ بۇگىنگى كۇنگە دەيىن قازاقستان رەسپۋبليكاسى پرەمەر-ءمينيسترى كەڭسەسىنىڭ وڭىرلىك دامۋ ءبولىمىنىڭ مەڭگەرۋشىسى قىزمەتىن اتقارعان.
