Búgin QR Premer-Mınıstri Álıhan Smaıylov pen QR Prezıdenti Ákimshiliginiń basshysy Murat Nurtileý oblystyq máslıhattyń kezekten tys sessııasynda depýtattardyń kelisimimen Qyzylorda oblysynyń jańa ákimi Nálibaev Nurlybek Mashbekulyn tanystyrdy.
Aımaq halqy úshin Nurlybek Nálibaev etene tanys tulǵa. Buǵan deıin aımaǵymyzda birqatar jaýapty qyzmetterdi atqarǵan.
Ásirese 2013-2021 jyldary Qyzylorda qalasynyń ákimi retinde abyroıly qyzmet etip, óńirdiń áleýmettik-ekonomıkalyq jáne kommýnaldyq máselelerin sheshý, jol-kólik ınfraqurylymyn damytý, turǵyn úı qurylysyn arttyrý sekildi mańyzdy bastamalar men aýqymdy jobalary arqyly jergilikti turǵyndardyń qoldaýyna ıe bolǵan.
Búgingi jańa taǵaıyndaýdy da Syr jurty erkshe yqylaspen qabyldaýda. Ony áleýmettik jelilerdegi jazbalar men quttyqtaýlardan anǵarýǵa bolady.
QR Premer-Mınıstri Álıhan Smaıylovtyń qatysýymen ótken kezekten tys sessııa barysynda memleket jáne qoǵam qaıratkeri Baqbergen Sársenuly Dosmambetov: «Aımaqtyń jaǵdaıymen jaqsy tanys jáne barlyq máselelerdi óz kózimen kórip, qolymen ustap kórgen tájirıbeli azamat, onyń ústine osy jerdiń týmasy N.Nálibaevty oblys ákimi qyzmetine taǵaıyndaǵany úshin Memleket basshysyna alǵys aıtamyz, biz qoldaýǵa daıynbyz» - dep, jańa ákimniń qyzmetine abyroı tiledi.
Aıta ketý kerek, N.Nálibaev eńbek jolynda 1997 jyldan - 2005 jylǵa deıingi aralyqta ártúrli basshylyq qyzmetter atqarǵan.
2005-2007 jyldary Qyzylorda qalasy ákiminiń orynbasary, birinshi orynbasary bolǵan. 2007-2008 jyldary Qyzylorda oblysy ákiminiń apparatyn basqarǵan. 2008-2013 jyldary Qyzylorda oblysy Shıeli aýdanynyń ákimi, 2013-2021 jyldary Qyzylorda qalasynyń ákimi bolǵan.
2021 jylǵy sáýirden bastap búgingi kúnge deıin Qazaqstan Respýblıkasy Premer-Mınıstri Keńsesiniń Óńirlik damý bóliminiń meńgerýshisi qyzmetin atqarǵan.
