قازاقستان قۇرىلىسشىلار وداعى ءوزىنىڭ ساياسي پارتياسىن قۇراتىنىن جاريالادى، دەپ حابارلايدى “ادىرنا” ۇلتتىق پورتالى.
«31 ناۋرىزدا وتكەن ەسەپ بەرۋ كونفەرەنتسياسىندا قۇرىلىسشىلار، جاساۋشىلار، وندىرۋشىلەر – «ەڭبەك» پارتياسىن قۇرۋدى ۇسىندى. ءبىز ەڭبەك ادامدارىمىز، بۇگىنگى قابىلدانىپ جاتقان زاڭدار ءتيىمدى بولىپ، قاراپايىم قازاقستاندىقتار يگىلىگىن كورۋى ءۇشىن بىزگە جۇمىس ىستەۋگە مۇمكىندىك بەرۋ كەرەك»، - دەدى قۇرىلىسشىلار وداعى پرەزيديۋمىنىڭ توراعاسى تالعات ەرعاليەۆ. بۇل تۋرالى سارسەنبى كۇنى ءباسپاسوز ءماسليحاتىندا حابارلادى.
ونىڭ ايتۋىنشا، قازاقستاندا قۇرىلىس سالاسىنىڭ ماسەلەلەرى ۇزاق جىلدار بويى شەشىمىن تاپپاي كەلەدى: قۇرىلىس سالاسى دامىماعان، ەل يمپورتقا تاۋەلدى، قازاقستاندىقتار باسپانامەن قامتاماسىز ەتىلمەگەن. بۇل رەتتە قوعامدىق بىرلەستىك جاعدايدى تۇبەگەيلى وزگەرتە المايدى.
«ءبىز زاڭ شىعارۋ پروتسەسىنە ىقپال ەتۋدى، قولداۋدى، كومەكتەسۋدى، جەدەلدەتۋدى، قاتىسۋدى قالايمىز. ءبىز بيزنەستىڭ ناقتى ءوزىن-ءوزى رەتتەۋىنە قول جەتكىزگىمىز كەلەدى»، - دەدى ەرعاليەۆ پارتيانىڭ قۇرىلۋ سەبەبىن ءتۇسىندىرىپ.
جاڭا پارتيا باعدارلاماسىندا: قولجەتىمدى باسپانا باعاسى; قازاقتار 8-10 جىلدا وتەي الاتىن تومەن پايىزدىق يپوتەكا; ەلدەگى ءوندىرىستى دامىتۋعا جانە ازاماتتاردىڭ ءومىرىن جاقسارتۋعا باعىتتالعان بارلىق رەفورمالار بار.
“ادىرنا” ۇلتتىق پورتالى
