قازىرگى قوعامدا باسەكەگە قابىلەتتى، كاسىبي شەبەرلىگى جوعارى جۇمىسشى ماماندارعا سۇرانىس ارتا ءتۇستى.
وسى ماقساتتا يساتاي ابدىكارىموۆ اتىنداعى قىزىلوردا پوليتەحنيكالىق جوعارى كوللەدجى جۇمىسشى ماماندىقتارىنىڭ بەدەلىن كوتەرىپ، ستۋدەنتتەردىڭ پراكتيكالىق داعدىلارىن جەتىلدىرۋگە باعىتتالعان اۋقىمدى ءىس-شارالاردى قولعا الۋدا.
سونىڭ جارقىن دالەلى - كوللەدج باستاماسىمەن وتكەن بۇگىنگى ءباسپاسوز تۋرى.
شارا بارىسىندا قاتىسۋشىلار الدىمەن كوللەدج تاريحىمەن تانىسىپ، مۇراجاي ەكسپوزيتسياسىن ارالاپ، وقۋ ورنىنىڭ 95 جىلدىق تاريحى مەن سەرىكتەستەر كارتاسىن تاماشالادى.
سونىمەن قاتار، ستۋدەنتتەردىڭ ساباقتان تىس بەلسەندى ءومىرى - سپورتتىق، شىعارماشىلىق ۇيىرمەلەر مەن «جاس سارباز» جوباسىنىڭ جۇمىسى كورسەتىلدى. كوللەدج ديرەكتورىنىڭ مىندەتىن اتقارۋشى ەرمۇحان باۋىرجان وقۋ ورنىنىڭ ميسسياسى، دايارلاۋ باعىتتارى، دۋالدى وقىتۋ جۇيەسىنىڭ ارتىقشىلىقتارى، حالىقارالىق اككرەديتاتسيادان ءوتۋى جانە شەتەلدىك ارىپتەستىك بايلانىستار جايلى كەڭىنەن اڭگىمەلەپ بەردى.
بۇدان كەيىن ءباسپاسوز-تۋر قاتىسۋشىلارى وندىرىستىك تاجىريبە الاڭدارىنا بارىپ، ستۋدەنتتەردىڭ ناقتى جۇمىس بارىسىنداعى ارەكەتتەرىن كورۋ مۇمكىندىگىنە يە بولدى.
مۇندا جاستار ۆاگون جوندەۋ دەپوسىندا دوڭگەلەك جۇپتارىن جوندەۋ ىسىنە تىكەلەي ارالاسىپ، تەمىرجول سالاسىنىڭ قىر-سىرىن ۇيرەنىپ جاتقانىن كورسەتتى. سونداي-اق ولار كۇرىش وڭدەۋ الاڭىندا بولىپ، ءونىمدى قابىلداۋ، وڭدەۋ، سۇرىپتاۋ جانە قاپتاۋ پروتسەسىنىڭ بارلىق كەزەڭدەرىن باقىلاپ، اۋىل شارۋاشىلىعى ءوندىرىسىنىڭ تولىق تسيكلىن زەردەلەدى. بۇل تاجىريبە ستۋدەنتتەرگە تەك تەوريالىق ءبىلىمدى بەكىتۋگە عانا ەمەس، اۋىل شارۋاشىلىعى مەن ونەركاسىپ اراسىنداعى ءوزارا بايلانىستى تەرەڭ تۇسىنۋگە مۇمكىندىك بەردى.
سونىمەن قاتار، جاستار قالاداعى زاماناۋي «Toyota» ورتالىعىندا اۆتوكولىك دياگنوستيكاسى مەن جوندەۋ جۇمىستارىن مەڭگەرىپ، قوزعالتقىش، ەلەكتر جۇيەلەرى جانە قوسالقى بولشەكتەردى اۋىستىرۋ سياقتى ناقتى وندىرىستىك پروتسەستەرگە قاتىستى.
شارا سوڭىندا تابىستى تۇلەكتەرمەن كەزدەسۋ ۇيىمداستىرىلىپ، ءوز كاسىبىن اشقان كاسىپكەرلەر مەن كوللەدجدە قىزمەت ەتىپ جۇرگەن جاس ماماندار تاجىريبەلەرىمەن ءبولىستى. ولار ستۋدەنتتەردى ۇزدىكسىز ىزدەنۋگە، بىلىكتى مامان بولۋعا جانە ەڭبەك نارىعىندا سۇرانىسقا يە بولۋعا شاقىردى.
مەملەكەت باسشىسى جاريالاعان «جۇمىسشى ماماندىقتار جىلى» اياسىندا وتكىزىلگەن بۇل ءىس-شارا جاستاردىڭ كاسىبي الەۋەتىن ارتتىرىپ، ەڭبەك نارىعىنا سەنىمدى قادام جاساۋىنا جول اشتى.
وسىنداي تاجىريبە الاڭى ستۋدەنتتەردىڭ كاسىبي ماشىعىن شىڭداپ قانا قويماي، ەڭبەك مادەنيەتىن قالىپتاستىرۋعا، جۇمىسقا دەگەن جاۋاپكەرشىلىك سەزىمىن ارتتىرىپ، ءوڭىر ەكونوميكاسىنا دا سەرپىن بەرەرى ءسوزسىز.
