«ءتىل-قازىنا» ۇلتتىق عىلىمي-پراكتيكالىق ورتالىعى كورۋ قابىلەتى تومەن ازاماتتارعا ارنالعان ەكران ديكتورى جوباسىن تانىستىردى. ەلىمىزدە قازاق تىلىندە العاش رەت جاسالعان بىرەگەي جوبا زاعيپ جاندارعا جاڭا مۇمكىندىكتەردىڭ كوكجيەگىن اشادى.
بۇگىن استانا قالاسىندا «ەكراندىق ديكتور» جوباسىنىڭ تانىستىرىلىمى ءوتتى. «ءتىل-قازىنا» ۇلتتىق عىلىمي-پراكتيكالىق ورتالىعىنىڭ ديرەكتورى ماقپال جۇماباي قوناقتارعا ەكران ديكتوردى تانىستىرىپ، جالپى ونىڭ قاجەتتىلىگى مەن ماڭىزىنا توقتالدى.
– ەكران ديكتورى قىزمەتى الەمدە ەكى مىڭىنشى جىلداردان بەرى قولدانىلادى. ال قازاق تىلىندەگى قوسىمشا العاش رەت ازىرلەنىپ، كورۋ مۇمكىندىگى شەكتەۋلى ادامدارعا ۇسىنىلعالى وتىر. قاجەتتى اپروباتسيادان وتكىزدىك. قازاق تىلىندەگى وسى تەكتەس العاشقى جوبا بولعاندىقتان بارلىق مۇمكىندىكتەردى قاراستىرىپ، جىلدامدىققا، داۋىس ماقامىنا، ىرعاققا، ناقتىلىققا، ديزاينعا باس ءمان بەرىپ، تۇتىنۋشىلار ءۇشىن ىڭعايلى بولۋىن نازارعا الدىق. TTS, ياعني ءماتىندى دىبىسقا تۇرلەندىرەتىن تەحنولوگيا ارقىلى Android سمارتفوندارعا ارنالعان قوسىمشا ازىرلەندى. الداعى ۋاقىتتا IOS ءۇشىن ارنايى قوسىمشا ىسكە قوسىلادى، – دەدى.
جيىن بارىسىندا قر ءماجىلىس دەپۋتاتى كەنجەعۇل سەيىتجان جوبانىڭ تەستىلەۋىنە قاتىسقاندىعىن ايتتى.
– قوسىمشانىڭ جۇمىس ىستەۋ جىلدامدىعى، ىرعاق، ءتىپتى داۋىستى تاڭداۋ باتىرماسىنىڭ بولۋى، دىبىستى ۇلعايتۋ نە ازايتۋ فۋنكتسيالارى تۇتىنۋشىنىڭ توزىمىنە، جەكە قابىلداۋ قابىلەتى مەن سەزىمدەرىن ويلاستىرىپ جاسالعان. قازاق تىلىندەگى كەز كەلگەن مالىمەتتى مۇلتىكسىز وقىپ تۇر. قوسىمشانى قولدانۋ ءۇشىن جاڭا ءبىر دۇنيەنى ۇيرەنۋ دە قاجەت ەمەس. مەن Android-تا كوپ جاسامايتىن بولعاندىقتان، IOS-تاعى نۇسقاسىن اسىعا كۇتەمىن. جالپى وسى جوبانى جۇزەگە اسىرعان «ءتىل-قازىنا» ۇجىمىنا العىسىمدى بىلدىرەمىن، – دەدى ول.
كوز اۋرۋلارى قازاق عىلىمي زەرتتەۋ ينستيتۋتىنىڭ مالىمەتىنە سۇيەنسەك، قازاقستاندا 85 مىڭنان استام زاعيپ جان بار. ال ولاردىڭ 18 مىڭى – بالالار. سوندىقتان ىسكە قوسىلعالى تۇرعان بۇل جوبا مۇمكىندىگى شەكتەۋلى ازاماتتار ءۇشىن مول مۇمكىندىك بولماق. ەندى كوز جانارى ناشار كورەتىن، مۇلدە كورمەيتىن قازاقتىلدى وتانداستارىمىز قوسىمشا كومەگىمەن ەشكىمگە تاۋەلدى بولماستان اقپاراتتى ءوز بەتتەرىمەن وقيدى، تۇتىنادى، كادەگە جاراتادى. سونداي-اق بۇل جوبا قولدانبالى ءبىلىم بەرۋ اسپەكتىسىنە دە وڭ اسەرىن تيگىزەدى. كورۋ قابىلەتى تومەن وقۋشىلار مەن ستۋدەنتتەردى وقىتۋ بارىسىندا قوسىمشانى تۇراقتى كومەكشى قۇرال رەتىندە پايدالانۋعا بولادى. جالپى بۇل يننوۆاتسيالىق قۇرال مۇمكىندىگى شەكتەۋلى ازاماتتاردىڭ ءومىر ساپاسىن ارتتىرىپ، اقپاراتقا قولجەتىمدىلىكتى، الەۋمەتتىك بەلسەندىلىكتى قامتاماسىز ەتەدى.
قوسىمشاعا سىلتەمە ارقىلى وتۋگە بولادى.
ايتا كەتەيىك، شاراعا قر عىلىم جانە جوعارى ءبىلىم ۆيتسە-ءمينيسترى دينارا ششەگلوۆا، ينكليۋزيۆتى ءبىلىم بەرۋ مامانى زيات ابدىقايىموۆ، قوعام قايراتكەرلەرى ورازگۇل اسانعازى، الماگۇل يسينا، رينات كەرتاەۆ، «مۇگەدەك جاستار قوعامى» قوعامدىق بىرلەستىگىنىڭ باسشىسى مۇرات ءابدىمومىنوۆ، ءتىل ساياساتى كوميتەتىنىڭ وكىلدەرى، سونداي-اق تاعى باسقا عالىمدار مەن جوبا اۆتورلارى، قوعام بەلسەندىلەرى، مەن جۋرناليستەر قاتىستى.
