«Tıl-Qazyna» ūlttyq ǧylymi-praktikalyq ortalyǧy köru qabıletı tömen azamattarǧa arnalǧan ekran diktory jobasyn tanystyrdy. Elımızde qazaq tılınde alǧaş ret jasalǧan bıregei joba zaǧip jandarǧa jaŋa mümkındıkterdıŋ kökjiegın aşady.
Bügın Astana qalasynda «Ekrandyq diktor» jobasynyŋ tanystyrylymy öttı. «Tıl-Qazyna» ūlttyq ǧylymi-praktikalyq ortalyǧynyŋ direktory Maqpal Jūmabai qonaqtarǧa ekran diktordy tanystyryp, jalpy onyŋ qajettılıgı men maŋyzyna toqtaldy.
– Ekran diktory qyzmetı älemde ekı myŋynşy jyldardan berı qoldanylady. Al qazaq tılındegı qosymşa alǧaş ret äzırlenıp, köru mümkındıgı şekteulı adamdarǧa ūsynylǧaly otyr. Qajettı aprobasiiadan ötkızdık. Qazaq tılındegı osy tektes alǧaşqy joba bolǧandyqtan barlyq mümkındıkterdı qarastyryp, jyldamdyqqa, dauys maqamyna, yrǧaqqa, naqtylyqqa, dizainǧa bas män berıp, tūtynuşylar üşın yŋǧaily boluyn nazarǧa aldyq. TTS, iaǧni mätındı dybysqa türlendıretın tehnologiia arqyly Android smartfondarǧa arnalǧan qosymşa äzırlendı. Aldaǧy uaqytta IOS üşın arnaiy qosymşa ıske qosylady, – dedı.
Jiyn barysynda QR Mäjılıs deputaty Kenjeǧūl Seiıtjan jobanyŋ testıleuıne qatysqandyǧyn aitty.
– Qosymşanyŋ jūmys ısteu jyldamdyǧy, yrǧaq, tıptı dauysty taŋdau batyrmasynyŋ boluy, dybysty ūlǧaitu ne azaitu funksiialary tūtynuşynyŋ tözımıne, jeke qabyldau qabıletı men sezımderın oilastyryp jasalǧan. Qazaq tılındegı kez kelgen mälımettı mültıksız oqyp tūr. Qosymşany qoldanu üşın jaŋa bır dünienı üirenu de qajet emes. Men Android-ta köp jasamaityn bolǧandyqtan, IOS-taǧy nūsqasyn asyǧa kütemın. Jalpy osy jobany jüzege asyrǧan «Tıl-Qazyna» ūjymyna alǧysymdy bıldıremın, – dedı ol.
Köz aurulary qazaq ǧylymi zertteu institutynyŋ mälımetıne süiensek, Qazaqstanda 85 myŋnan astam zaǧip jan bar. Al olardyŋ 18 myŋy – balalar. Sondyqtan ıske qosylǧaly tūrǧan būl joba mümkındıgı şekteulı azamattar üşın mol mümkındık bolmaq. Endı köz janary naşar köretın, mülde körmeitın qazaqtıldı otandastarymyz qosymşa kömegımen eşkımge täueldı bolmastan aqparatty öz betterımen oqidy, tūtynady, kädege jaratady. Sondai-aq būl joba qoldanbaly bılım beru aspektısıne de oŋ äserın tigızedı. Köru qabıletı tömen oquşylar men studentterdı oqytu barysynda qosymşany tūraqty kömekşı qūral retınde paidalanuǧa bolady. Jalpy būl innovasiialyq qūral mümkındıgı şekteulı azamattardyŋ ömır sapasyn arttyryp, aqparatqa qoljetımdılıktı, äleumettık belsendılıktı qamtamasyz etedı.
Qosymşaǧa sılteme arqyly ötuge bolady.
Aita keteiık, şaraǧa QR Ǧylym jäne joǧary bılım vise-ministrı Dinara Şeglova, inkliuzivtı bılım beru mamany Ziiat Äbdıqaiymov, qoǧam qairatkerlerı Orazgül Asanǧazy, Almagül İsina, Rinat Kertaev, «Mügedek jastar qoǧamy» qoǧamdyq bırlestıgınıŋ basşysy Mūrat Äbdımomynov, Tıl saiasaty komitetınıŋ ökılderı, sondai-aq taǧy basqa ǧalymdar men joba avtorlary, qoǧam belsendılerı, men jurnalister qatysty.
