ءاربىر قازاقستاندىق الۋى ءتيىس 10 سوتىق جەردى الۋ پروتسەسى بارىنشا اشىق بولادى. ال اۆتوماتيزاتسيا ارقاسىندا بۇل پروتسەسكە 5 مينۋت جەتكىلىكتى. بۇل تۋرالى تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
قىزمەتتى پايدالانۋ ءۇشىن eGov.kz پورتالىنا كىرىپ، «جىلجىمايتىن مۇلىك» – «جەر قاتىناستارى» بولىمىنەن «جەكە تۇرعىن ءۇي قۇرىلىسىنا جەر ۋچاسكەسىن (10 سوتىق جەر) الۋعا كەزەكتى قاراۋ نەمەسە كەزەككە تۇرۋ» قىزمەتىن تاڭداۋ قاجەت.
ءارى قاراي ءوتىنىش ءتۇرىن تاڭداۋ كەرەك. بۇگىندە پورتالدا ءوتىنىشتىڭ ءۇش ءتۇرى بار:
– كەزەككە قويۋ;
دەرەكتەردى وزەكتەندىرۋ;
– كەزەكتەن شىعارۋ.
ەگەر ءسىز جەر ۋچاسكەسىن الۋ ءۇشىن كەزەككە العاش رەت ءوتىنىش ءبىلدىرىپ تۇرساڭىز، وندا ءوزىڭىز جەر الۋدى قالايتىن ايماقتى تاڭدايسىز.
ەگەر ءسىز بۇدان بۇرىن جەر كەزەگىنە تۇرعان بولساڭىز، بىراق ول تۋرالى اقپارات تاپپاساڭىز، وندا «وزەكتەندىرۋ» ءوتىنىش ءتۇرىن تاڭداۋىڭىز قاجەت.
كەزەك العانىڭىزدى راستاۋ ءۇشىن قولىڭىزدا بار قۇجاتتى (تالوننىڭ سكان-نۇسقاسى، ءوتىنىشتىڭ، جەكە كۋالىكتىڭ جانە ت.ب. كوشىرمەلەرى) جۇكتەۋ قاجەت. سونداي-اق كەزەك رەتىن www.map.gov4c.kz/egkn/ سايتىندا ەتسق ارقىلى اۆتوريزاتسيادان ءوتىپ، باقىلاپ وتىرۋعا بولادى.
بۇدان بۇرىن العان جەر كەزەگىنەن باس تارتۋ ءۇشىن «شىعارۋ» ءوتىنىش ءتۇرىن تاڭداۋ قاجەت.
ەگەر ازامات بۇدان بۇرىن مەملەكەتتەن تەگىن جەر تەلىمىن العان بولسا نەمەسە ەلدىمەكەندە جتق ءۇشىن بوس جەر تەلىمى بولماسا، جەر كەزەگىنە ءوتىنىش بەرە المايدى. بوس ۋچاسكەلەردى بەرۋ جونىندەگى شەشىمدى اكىمدىكتەر قابىلدايدى. ۋچاسكەلەر الاڭداردىڭ دايىن بولۋىنا قاراي نەمەسە ەلدىمەكەننىڭ باس جوسپارىنا سايكەس، بوس اۋماقتار بولعان جاعدايدا بەرىلەتىن بولادى.
ەگەر بۇرىن ءبىر وڭىردە جەر تەلىمىنە كەزەككە تۇرعان بولساڭىز، ال قازىر وزگە ايماقتان جەر الۋعا نيەتتەنسەڭىز، 10 سوتىققا كەزەك رەتى ەرتەرەك كەلگەن وڭىردەن جەر ءبىر رەت قانا بەرىلەتىنىن، قالعان وتىنىشتەردىڭ كۇشى جويىلاتىنىن ەسكەرۋ قاجەت.
ەستەرىڭىزگە سالا كەتەيىك، بۇرىن قازاقستاندىقتار جتق ءۇشىن جەر ۋچاسكەسىن الۋ كەزەگىنە تۇرۋ ءۇشىن جەرگىلىكتى اتقارۋشى ورگاندارعا، ياعني اكىمدىكتەرگە جۇگىنەتىن. ولار تەك ءوز ايماعىنىڭ جەرلەرىن تاڭداي الاتىن. كەزەكتە تۇرعانداردىڭ ءتىزىمى دە تەك اكىمدىكتەردە ساقتالاتىن.
قر جەر كودەكسىنىڭ 50-بابىنا سايكەس، قازاقستاننىڭ ءاربىر ازاماتى جەكە تۇرعىن ءۇي قۇرىلىسى ءۇشىن جەر ۋچاسكەسىن (10 سوتىق جەر) تەگىن الۋعا قۇقىلى.
“ادىرنا” ۇلتتىق پورتالى
ۇقساس جاڭالىقتار
