الماتى اۋەجايىندا شەتەلدىكتەر جالعان پاسپورتپەن ۇستالدى. ولار قازاقستان ارقىلى ءوتۋ ءۇشىن 10 مىڭ دوللارعا جالعان پاسپورت ساتىپ العان. بۇل تۋرالى ۇلتتىق قاۋىپسىزدىك كوميتەتى جاريالادى، دەپ حابارلايدى “ادىرنا”.
“6 ءساۋىر كۇنى الماتى قالاسىنىڭ اۋەجايىندا پاسپورتتىق باقىلاۋدان ءوتۋ كەزىندە جالعان قۇجاتتار ۇسىنعان ورتالىق ازيا ەلدەرىنىڭ 4 ازاماتى ۇستالدى", - دەلىنگەن ۇقك ءباسپاسوز قىزمەتىنىڭ حابارلاماسىندا.
جۇكتەرىن تەكسەرۋ كەزىندە ولاردىڭ شىن پاسپورتتارى تابىلدى.
الدىن الا دەرەك بويىنشا، ولار جالعان قۇجاتتاردى قازاقستان رەسپۋبليكاسى ارقىلى ترانزيتپەن ءوتۋ ءۇشىن ساتىپ العان. ءبىر جالعان تولقۇجاتتىڭ قۇنى 10 مىڭ اقش دوللارعا باعالانعان.
جالعان قۇجاتتار تاركىلەندى. ولاردى ەلدەن دەپورتاتسيالاۋ ماسەلەسى شەشىلىپ جاتىر.
“ادىرنا” ۇلتتىق پورتالى
