مۇعالىم بولىپ جۇمىسقا ورنالاسپاق بولعان قىزىلوردالىق 850 مىڭ تەڭگەسىنەن ايىرىلدى، دەپ حابارلايدى “ادىرنا” ۇلتتىق پورتالى Polisia.kz سايتىنا سىلتەمە جاساپ.
11 ءساۋىر كۇنى الاياقتىڭ قۇربانى بولعان جەرگىلىكتى تۇرعىن قىزىلوردا قالالىق پوليتسيا باسقارماسىنىڭ كەزەكشى بولىمىنە كەلىپ ارىزدانعان. ازاماتشا ءوزىنىڭ ارىزىندا الاياققا الدانعانىن ايتقان.
الاياق ازامات وتكەن جىلدىڭ تامىز ايىندا مۇعالىمدىككە جۇمىسقا ورنالاستىرىپ بەرەمىن دەپ ۋادە بەرگەن. ءسويتىپ جابىرلەنۋشىدەن 850 مىڭ تەڭگە اقشا العان. بىراق كوپ ۇزاماي اقشانى الداپ العان ازامات تەلەفون قوڭىراۋلارىنا جاۋاپ بەرمەي، بۇگىنگى كۇنگە دەيىن ۋادە ەتىلگەن جۇمىسقا ورنالاسۋ ماسەلەسىنىڭ شەشىمىن تاپپاعان.
سونىمەن جابىرلەنۋشى ايەل پوليتسياعا ارىزدانۋعا ءماجبۇر بولدى.
پوليتسيا قىزمەتكەرلەرىمەن جۇرگىزىلگەن جەدەل-ىزدەستىرۋ شارالارىنىڭ ناتيجەسىندە، وبلىس ورتالىعىنىڭ تۇرعىنى ۇستالدى.
اتالعان دەرەك بويىنشا قىلمىستىق كودەكستىڭ 190-بابىنىڭ 1-بولىگى بويىنشا (الاياقتىق) سوتقا دەيىنگى تەرگەپ-تەكسەرۋ ارەكەتتەرى جۇرگىزىلۋدە. كۇدىكتىگە قاتىستى ەشقايدا كەتپەۋ جانە ءتيىستى مىنەز-قۇلىق تۋرالى قولحات تۇرىندە بۇلتارتپاۋ شاراسى تاڭدالدى.
پوليتسەيلەر وقيعانىڭ ءمان-جايىن انىقتاپ جاتىر.
”ادىرنا” ۇلتتىق پورتالى