جامبىل وبلىسى، تۇرار رىسقۇلوۆ اۋدانىنىڭ تۇرعىنى سوتقا قىز جاساۋىنداعى مۇلكىن قايتارىپ الۋ تالابىمەن جۇگىنگەن، دەپ جازادى "ادىرنا" ۇلتتىق پورتالى. بۇل تۋرالى جامبىل وبلىستىق سوتى حابارلادى.
2021 جىلدىڭ ماۋسىم ايىندا تالاپ قويۋشى جاۋاپكەرمەن مۇسىلماندىق نەكەگە تۇرعان. تويدان كەيىن قالىڭىقتىڭ تۋىستارى ءداستۇر بويىنشا قىز جاساۋىن سىيلاعان. الايدا وتباسىندا ورىن العان تۇسىنىسپەۋشىلىكتەردىڭ سالدارىنان ەرلى-زايىپتىلار اجىراسقان. كۇيەۋ جىگىتتىڭ تۋىستارىنىڭ قىز جاساۋىن قايتارۋدان باس تارتۋىنان كەيىن، قالىڭدىق اتالعان مۇلىكتى قايتارىپ الۋ تۋرالى سوتقا جۇگىنگەن.
ء"ىستى قاراۋ بارىسىندا سوت مەدياتسياسىن جۇرگىزۋ جولىمەن تاراپتار داۋدى بىتىمگەرلىكپەن شەشۋ تۋرالى كەلىسىم جاسادى. ونىڭ شارتتارىنا سايكەس، جاۋاپكەرلەر 2022 جىلدىڭ 14 ساۋىرىنە دەيىن تالاپ قويۋشىعا تىزىمگە سايكەس قىز جاساۋىن ءوز ەرىكتەرىمەن قايتارۋعا مىندەتتەندى. ال تالاپ قويۋشى بەلگىلەنگەن مەرزىمدە مۇلىكتى تيەپ، اكەتۋگە مىندەتتەندى", - دەلىنگەن حابارلامادا.
سوتپەن مەدياتيۆتىك كەلىسىمدى بەكىتۋ مەن ءىستى توقتاتۋ سالدارى ءتۇسىندىرىلدى. مەدياتيۆتىك كەلىسىمدى بەكىتۋ تۋرالى سوت ۇيعارىمى زاڭدى كۇشىنە ەندى.
"ادىرنا" ۇلتتىق پورتالى
