بىرنەشەۋى ءىستى بولعان: جاڭا سايلانعان اكىمدەردىڭ وتكەنى قانداي؟

3622
Adyrna.kz Telegram
فوتو: inform.kz
فوتو: inform.kz

بيىلعى جىل ەلىمىز ءۇشىن اۋىر قاسىرەتپەن باستالدى. «قاڭتار وقيعاسى بۇكىل قوعامدى ءدۇر سىلكىندىرىپ، حالقىمىز بۇرىن-سوڭدى بولماعان قاۋىپ-قاتەرمەن بەتپە-بەت كەلدى. مەملەكەتىمىزدىڭ تۇتاستىعى مەن ەگەمەندىگىمىزگە زور قاۋىپ ءتوندى" دەگەن ەدى ەل پرەزيدەنتى قاسىم-جومارت توقاەۆ. ارتىنشا مەملەكەت باسشىسى وبلىس، قالا اكىمدەرىن «جاناما سايلاۋ» ارقىلى اۋىس-ءتۇيىس جاسادى. بىزگە بەلگىلى بولعان جاڭا اكىمدەردىڭ وتكەنى قانداي، نەمەن ەستە قالدى؟

جەڭىس قاسىمبەك – قاراعاندى وبلىسىنىڭ اكىمى

جامبىل وبلىسى، شۋ قالاسىنىڭ تۋماسى. 1997 جىلى قازاق مەملەكەتتىك ساۋلەت-قۇرىلىس اكادەمياسىن «ساۋلەتشى-ديزاينەر» ماماندىعىن ءتامامداپ، 2001 جىلى ل.گۋميلەۆ اتىنداعى ەۋرازيا مەملەكەتتىك ۋنيۆەرسيتەتىن «مەملەكەتتىك جانە جەرگىلىكتى باسقارۋ سالاسىندا ماماندانعان ەكونوميست» ماماندىعىمەن اياقتاعان.

2019 جىلدىڭ اقپان ايىنان قر پرەمەر-ءمينيسترىنىڭ ورىنباسارى قىزمەتىن اتقاردى. اكىمدىك قىزمەتكە كەلمەستەن بۇرىن جەڭىس ماحمۇدۇلى «قۇرمەت» وردەنىمەن، «قازاقستان رەسپۋبليكاسىنىڭ تاۋەلسىزدىگىنە 10 جىل»، «استانانىڭ 10 جىلدىعى»، II دارەجەلى «ەۋرازيالىق ەكونوميكالىق وداقتى قۇرۋعا قوسقان ۇلەسى ءۇشىن» (05.08.2015) جانە تاۋەلسىز مەملەكەتتەر دوستاستىعى قۇرمەت گراموتاسىمەن ناگرادتالعان. (17.07.2017 ج.)

دەرەكتەرگە سۇيەنسەك وبلىس اكىمى بۇرىندارى جەكە تۇلعالاردان سالىق جانە بيۋدجەتكە تولەنەتىن باسقا دا مىندەتتى تولەمدەر بويىنشا بەرەشەكتى جانە ءوسىمپۇلدى، سونداي-اق كەدەندىك تولەمدەر، سالىقتار مەن ءوسىمپۇلدار بويىنشا بەرەشەكتى ءوندىرىپ الۋ تۋرالى ازاماتتىق ىسكە قاتىسى بولعان. ازاماتتىق ءىس نۇر-سۇلتان قالاسىنىڭ ەسىل اۋداندىق سوتىندا قارالدى.

 

دانيال احمەتوۆ – شقو اكىمى

پاۆلودار قالاسىندا دۇنيەگە كەلگەن. 1976 جىلى پاۆلودار يندۋستريالدى ينستيتۋتىن «قۇرىلىسشى ينجەنەر» ماماندىعىمەن اياقتاعان. ۆەلوسپورتتان سپورت شەبەرى. قازىرگى تاڭدا ەكونوميكا عىلىمدارىنىڭ دوكتورى، قازاقستان رەسپۋبليكاسى مينەرالدىق رەسۋرستار اكادەمياسىنىڭ اكادەميگى سىندى اتاقتارى بار. شىعىس قازاقستان وبلىسىنا اكىمدىككە كەلمەس بۇرىن قازاقستان جەڭىل اتلەتيكا فەدەراتسياسىنىڭ پرەزيدەنتى قىزمەتىن اتقاردى.

2-دارەجەلى «بارىس» (2004), 3-دارەجەلى «بارىس» (1999), «قۇرمەت وردەنى» (1986); «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ» وردەندەرىمەن ماراپاتتالعان (2012). «استاناعا 10 جىل» مەرەيتويلىق مەدالى (01.07.2008), «ەۋرازيالىق ەكونوميكالىق وداقتىڭ دامۋىنا قوسقان ۇلەسى ءۇشىن» (29.05.2019); باۋىرجان مومىشۇلىنىڭ 90 جىلدىعىنا ارنالعان مەرەكەلىك قۇرمەت بەلگىسىمەن (20.02.2008 ج.) ماراپاتتالعان.

 

ەربولات دوساەۆ – الماتى قالاسىنىڭ اكىمى

الماتى قالاسىندا دۇنيەگە كەلگەن. 1993 جىلى الماتى ەنەرگەتيكا ينستيتۋتىن، باۋمان اتىنداعى ماسكەۋ مەملەكەتتىك تەحنيكالىق ۋنيۆەرسيتەتىن بىتىرگەن. قازاقستان رەسپۋبليكاسى ەنەرگەتيكا، يندۋستريا جانە ساۋدا ۆيتسە-ءمينيسترى، قازاقستان رەسپۋبليكاسى پرەمەر-ءمينيسترىنىڭ ورىنباسارى جانە وزگە دە بەدەلدى قىزمەتتەر اتقارعان. اكىمدىككە دەيىن ەربولات اسقاربەكۇلى قازاقستان رەسپۋبليكاسى ۇلتتىق بانكىنىڭ توراعاسى بولعان.

دوساەۆ تالاي قىزمەت اۋىستىرىپ، ەل اراسىندا «ءار ءىستىڭ باسىن شالعان» دەگەن اتقا قالعان. 2012 جىلى كۇزدە دوساەۆ ۇكىمەتكە – ەكونوميكا ءمينيسترى قىزمەتىنە قايتا ورالدى. مينيسترلىك بىرنەشە رەت اتاۋىن وزگەرتەدى، مينيستر قايتا تاعايىندالادى. دوساەۆ 2016 جىلدىڭ مامىر ايىنا دەيىن تۇراقتى تۇردە حالىق شارۋاشىلىعىن باسقاردى. ودان كەيىن كۆازيمەملەكەتتىك سەكتورعا – «بايتەرەك» ۇلتتىق باسقارۋشى حولدينگى» اق باسقارما توراعاسى قىزمەتىنە اۋىسادى. ال 2017 جىلدىڭ تامىزىندا ۇكىمەتكە ۆيتسە-پرەمەر دارەجەسىندە كەلەدى. 2019 جىلدىڭ اقپان ايىنا دەيىن ۇكىمەتتە قىزمەت ىستەپ، سودان كەيىن ۇلتتىق بانك توراعاسى بولادى.

 

بەردىبەك ساپارباەۆ – جامبىل وبلىسىنىڭ ەكس-اكىمى

قىزىلوردا وبلىسىن، جاڭاقورعان اۋدانىندا دۇنيەگە كەلگەن. 1977 جىلى الماتى حالىق شارۋاشىلىعى ينستيتۋتىن تامامداعان.

پاراسات (12.2007), «قۇرمەت» (1999),  «استاناعا 10 جىل» مەرەيتويلىق مەدالى (01.07.2008 ج.), وڭتۇستىك قازاقستان وبلىسىنىڭ قۇرمەتتى ازاماتى، قىزىلوردا وبلىسىنىڭ قۇرمەتتى ازاماتى: «ۇزدىك الەۋمەتتiك ارiپتەس» توسبەلگiسiمەن (08.2019 ج.) ماراپاتتالعان. جامبىل وبلىسىن باسقارماس بۇرىن قازاقستان رەسپۋبليكاسى پرەمەر-ءمينيسترىنىڭ ورىنباسارى، اقتوبە وبلىسىنىڭ اكىمى، قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ ءمينيسترى سىندى قىزمەتتەردى اتقاردى.

 

نۇرجان نۇرجىگىتوۆ – جامبىل وبلىسىنىڭ اكىمى

1991 جىلى لەنينگراد اۋىل شارۋاشىلىعى ينستيتۋتى «ينجەنەر-مەحانيك» ماماندىعىمەن اياقتادى. 2008 جىلى جامبىل گۋمانيتارلىق تەحنيكالىق ۋنيۆەرسيتەتى وقىپ ءبىتىردى. تەحنيكالىق عىلىمداردىڭ كانديداتى اتاعى بەرىلگەن. وبلىس اكىمى بولعانعا دەيىن سول جامبىل وبلىسىنىڭ اۋداندارىن، ءتۇرلى مەكەمەلەردى باسقارعان. جامبىل وبلىسى اكىمدىگىنىڭ اۋىل شارۋاشىلىعى باسقارماسىنىڭ باسشىسى، جامبىل وبلىسى اكىمدىگىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى جانە بايساق اۋدانىنىڭ اكىمى بولدى. سونان سوڭ ورىنباسارلىق قىزمەتتەن وبلىس اكىمىنە اۋىستى.

"ادىرنا" ۇلتتىق پورتالى

 

 

پىكىرلەر