بۇعان دەيىن قىزمەتىنەن بوساتىلعان پاۆلودار اكىمى جاڭا قىزمەتكە تاعايىندالدى، - دەپ حابارلايدى "ادىرنا" ءتىلشىسى.
ەرجان يمانزايىپوۆتىڭ جاڭا قىزمەتكە تاعايىندالعانى تۋرالى اقپاراتتى پاۆلودار وبلىسى اكىمىنىڭ ءباسپاسوز قىزمەتى راستادى. رەسمي دەرەكتەرگە سايكەس، ول پاۆلودار وبلىسىنىڭ كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باسشىسى بولدى.
«ەرجان يمانزايىپوۆ كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باسشىسى بولىپ تاعايىندالدى»، - دەپ حابارلادى وبلىس اكىمىنىڭ ءباسپاسوز قىزمەتى.
سونداي-اق وسى جەردە يمانزايىپوۆتىڭ پاۆلودار قالاسىنىڭ اكىمى قىزمەتىنەن جاعىمسىز سەبەپتەرسىز بوساتىلعانى ناقتىلاندى.
ايتا كەتەيىك، وبلىستىق كاسىپكەرلىك جانە يننوۆاتسيالىق دامۋ باسقارماسىنىڭ جاڭا باسشىسى تۋرالى اقپارات مەملەكەتتىك مەكەمەنىڭ سايتىندا جاريالانعان بولاتىن.
ەستەرىڭىزگە سالا كەتەيىك، 4 قىركۇيەكتە پاۆلودار وبلىسى اكىمىنىڭ وكىمىمەن ەرجان يمانزايىپوۆ پاۆلودار قالاسىنىڭ باسشىسى قىزمەتىنەن بوساتىلعان بولاتىن.
قىركۇيەكتىڭ 1-ءى كۇنى پارلامەنت ءماجىلىسىنىڭ الاڭىندا اساين بايحانوۆ پاۆلودار اكىمىنىڭ قىزمەتىنەن بوساتىلۋى ونىڭ كومەكشىسىنە قاتىستى باستالعان تەرگەۋگە قاتىستى ما دەگەن سۇراققا جاۋاپ بەردى. ول سونداي-اق وبلىستىڭ سىبايلاس جەمقورلىققا قارسى قىزمەتىنىڭ مالىمەتىنشە، ەشكىم قاماۋعا الىنباعانىن ايتتى.
ايتا كەتەيىك، 12 قىركۇيەكتە حاسار حابىلبەكوۆ پاۆلودار قالاسىنىڭ اكىمى بولدى. وسى تاعايىنداۋعا دەيىن ول پاۆلودار وبلىسى اكىمىنىڭ ءبىرىنشى ورىنباسارى قىزمەتىن اتقارعان.
