مەملەكەت باسشىسى قاسىم-جومارت توقاەۆ استانا قالاسىنىڭ اكىمى جەڭىس قاسىمبەكتى قابىلدادى. بۇل تۋرالى اقوردا جاريالادى، دەپ حابارلايدى "ادىرنا".
بەلگىلى بولعانداي، پرەزيدەنت قاسىم-جومارت توقاەۆقا ەلوردانىڭ الەۋمەتتىك-ەكونوميكالىق جانە ينفراقۇرىلىمدىق دامۋى تۋرالى مالىمەت بەرىلدى.
«استانادا بارلىق باستى ەكونوميكالىق كورسەتكىش بويىنشا وڭ قارقىن بايقالادى. بيىلعى ءتورت ايدا نەگىزگى كاپيتالعا سالىنعان ينۆەستيتسيا كولەمى 588 ميلليارد تەڭگەنى قۇرادى. بۇل بىلتىرعى وسى كەزەڭمەن سالىستىرعاندا 9,1 پايىز جوعارى. ولاردىڭ اراسىندا وڭدەۋ ونەركاسىبى، ءبىلىم، مەديتسينا، كولىك، ساۋدا، لوگيستيكا سالالارىنا قاتىستى جوبالار بار. ال بۇگىندە Astana LRT جەڭىل رەلستى كولىك جەلىسى تولىق جۇمىس ىستەپ تۇر. ەلوردانىڭ قوعامدىق كولىك جۇيەسىن جانداندىرۋ ماقساتىندا جوبانىڭ ەكىنشى كەزەڭى پىسىقتالىپ وتىر»، – دەلىنگەن اقوردانىڭ حابارلاماسىندا.
قالا باسشىسى پرەزيدەنتكە الەۋمەتتىك نىسانداردىڭ قۇرىلىسى، تۇرعىن ءۇي الاپتارىن كوركەيتۋ جونىندە مالىمەت بەرگەن. جەڭىس قاسىمبەك سوڭعى جىلدارى استانادا 44 مەكتەپ سالىنعانىن، ال جاڭا وقۋ جىلىندا 12 ءبىلىم وشاعى اشىلاتىنىن، سول سياقتى 2 وقۋشىلار سارايى مەن 6 بالاباقشانى ەل يگىلىگىنە بەرۋ جوسپارلانىپ وتىرعانىن تىلگە تيەك ەتتى.
«2028 جىلعا دەيىن 2 پەريناتالدى ورتالىق، كوپبەيىندى اۋرۋحانا جانە دياگنوستيكالىق كەشەننىڭ قۇرىلىسى اياقتالماق. قاسىم-جومارت توقاەۆقا قالانىڭ ينجەنەرلىك-كوممۋنالدىق ينفراقۇرىلىمى، Smart City جوباسىنىڭ ىسكە اسىرىلۋى تۋرالى باياندالدى. 2026 جىلى 173 اۋلا مەن قوعامدىق كەڭىستىكتى اباتتاندىرۋ، 1,1 ميلليون ءتۇپ جاسىل جەلەك ەگۋ كوزدەلگەن»، – دەلىنگەن حابارلامادا.
كەزدەسۋ سوڭىندا قاسىم-جومارت توقاەۆ جەڭىس قاسىمبەكتىڭ قىزمەتىنە وڭ باعا بەرىپ، استانانى ودان ءارى دامىتۋعا قاتىستى بىرقاتار تاپسىرما بەردى.
