ىشكى ىستەر مينيسترلىگىنىڭ باسشىسى استانادا تۇنگى 23.00-دەن كەيىن بارلار مەن تۇنگى كلۋبتار، الكوگولدى ىشىمدىكتەردى ساتاتىن ويىن-ساۋىق مەكەمەلەرىنىڭ جۇمىس ىستەۋىنە تىيىم سالۋدى ۇسىندى. بۇل تۋرالى قازاقستان رەسپۋبليكاسىنىڭ ىشكى ىستەر ءمينيسترى مارات احمەتجانوۆ ايتتى، دەپ حابارلايدى “ادىرنا” ءتىلشىسى.
مينيستر ەگەر مەكەمەلەر تۇرعىن ۇيلەردە ورنالاسسا، ولاردىڭ جۇمىسى ساعات 23.00-گە دەيىن، ال جەكەلەگەن عيماراتتاردا بولسا - 2.00-گە دەيىن شەكتەلۋى كەرەك، دەپ ەسەپتەيدى.
سونداي-اق، ول الكوگولدى باقىلاۋسىز ساتۋ استاناداعى قىلمىستىق احۋالعا اسەر ەتكەنىن ايتتى.
قالادا مىڭداعان ءدامحانالار، بارلار، تۇنگى كلۋبتار بار. بۇل بيزنەستىڭ ماڭىزدى سالاسى. سونىمەن قاتار، ولاردىڭ يەلەرىنىڭ بارلىعى ءوز كليەنتتەرىنە قاۋىپسىز جاعداي جاساي بەرمەيدى. قىلمىس پەن قۇقىق بۇزۋشىلىق ءجيى ورىن الادى. مەن كۇندەلىكتى تىنىشتىقتى بۇزۋدى ايتىپ وتىرعان جوقپىن. وتكەن جىلى پوليتسەيلەر وسىنداي 13 مىڭ حابارلاماعا بارعان. بيىل – 4,5 مىڭ»، - دەدى مارات احمەتجانوۆ ەلوردا اكىمدىگىندە وتكەن جيىندا.
مينيسترلىك باسشىسى مىسال رەتىندە ساعات 00.30-دا بارلاردىڭ بىرىندە كەلۋشىنىڭ پىشاق جاراقاتىن العانىن ايتتى. وتكەن قاراشا ايىندا تاڭعى ساعات 5:30-دا ءبىر توپ ماس كەلۋشىلەر قوعامدىق ءتارتىپتى بۇزۋدى توقتاتپاق بولعان سوبر قىزمەتكەرىنە قارسىلىق كورسەتكەن.
ءمينيستردىڭ ايتۋىنشا، ءبىرىنشى ماسەلە، بارلار مەن كلۋبتاردىڭ يەلەرى قاۋىپسىزدىكتى قاداعالاماي، كەزدەيسوق ادامداردى كەلىسىم-شارتسىز جۇمىسقا الادى. مۇنداي قىزمەتكەرلەردە قاجەتتى داعدىلار جوق. ەكىنشى ماسەلە – ۋاقىت شەكتەۋىنىڭ جوقتىعى.
قازىر قالادا قۇقىق بۇزۋشىلىقتىڭ 80%-عا جۋىعى ءتۇن ورتاسىنان كەيىن جاسالادى. سوندىقتان تۇرعىن ۇيلەردەگى الكوگولدى ىشىمدىكتەردى ساتاتىن ويىن-ساۋىق مەكەمەلەرىنىڭ جۇمىس ۋاقىتىن ساعات 23.00-گە دەيىن، جەكەلەگەن عيماراتتاردا - 2.00-گە دەيىن شەكتەۋدى ۇسىنامىز. ول ءۇشىن بۇل نورمانى ەلوردا اۋماعىن اباتتاندىرۋ ەرەجەلەرىنە بەكىتۋ كەرەك ارينە، بۇل نورما بيزنەستىڭ مۇددەسىن قوزعايدى، — دەدى مارات احمەتجانوۆ.
مينيسترلىكتىڭ حابارلاۋىنشا، سوڭعى ءۇش جىلدا ءتۇن ورتاسىنا دەيىن جۇمىس ىستەپ تۇرعان مەكەمەلەردەن پوليتسياعا ءتارتىپ بۇزعانى تۋرالى بىردە-ءبىر حابارلاما تۇسپەگەن.
