قازاقستاندىق عالىم وركەن مامىرباەۆ قازاق تىلىندەگى داۋىستىق حابارلامالاردى ماتىنگە اۋىستىراتىن جۇيەنى ويلاپ تاپتى، دەپ حابارلايدى “ادىرنا” ۇلتتىق پورتالى ءبىلىم مينيسترلىگىنە سىلتەمە جاساپ.
ءو. مامىرباەۆ – قر بعم عىلىم كوميتەتىنىڭ اقپاراتتىق جانە ەسەپتەۋىش تەحنولوگيالار ينستيتۋتىنىڭ عىلىمي قىزمەتكەرى.
«Kazak ASR» زياتكەرلىك جۇيەسى Telegram الەۋمەتتىك جەلىسىندە چات-بوت رەتىندە قازىردىڭ وزىندە جۇمىس ىستەيدى. جوبا سونىمەن قاتار تانىمال نيدەرلاندتىق Philips كومپانياسىنىڭ ونىمدەرىنە بىرىكتىرىلىپ، جاقىن ارادا نارىققا شىقپاق.
«Kazak ASR» داۋىستىق سيگنالداردى تانىپ قانا قويماي، سونداي-اق ولاردى ماتىنگە اينالدىرادى. ازىرلەنگەن جۇيە Telegram-دا چات-بوت رەتىندە جۇمىس ىستەيدى. جۇيەنى تەكسەرۋ ءۇشىن داۋىستىق حابارلاما تۇيمەسىن باسىپ تۇرۋ كەرەك. جازۋ اياقتالعاننان كەيىن بوت ءسىزدىڭ داۋىستىق سيگنالدارىڭىزدى ماتىنگە اينالدىرادى. سونىمەن قاتار كومانداممەن بىرگە جينالىس نەمەسە كەزدەسۋ كەزىندە قوسۋعا بولاتىن دىبىس جازۋ قۇرىلعىسىن ازىرلەدىك. جينالىس اياقتالعاننان كەيىن قۇرىلعى قازاق تىلىندە حاتتاما دايىندايدى»، دەدى ءو. مامىرباەۆ.
قازىر Philips ونىمدەرىنە قازاق تىلىندە سويلەۋدى تانۋ تەحنولوگياسىن ەنگىزۋ بويىنشا قۇجات ازىرلەنىپ جاتىر.
«Philips كومپانياسى سەرىكتەستىك پەن ءونىمدى ودان ءارى جەتىلدىرۋدى ۇسىندى. ەگەر الگوريتم تۋرالى كەزەڭ-كەزەڭىمەن ايتاتىن بولساق، الدىمەن باعدارلاما كومپيۋتەرگە جۇكتەلەدى. سودان كەيىن ميكروفوندى قوسامىز. ءسويتىپ سويلەي باستايمىز. قۇرىلعى ەكى ءتۇرلى داۋىستى اۆتوماتتى تۇردە تانيدى جانە ەكى بولىكتە قازاق تىلىندەگى ءماتىنىن كورسەتەدى. مۇنداي ميكروفون اقپاراتتى ءماتىن تۇرىندە ساقتاۋ قاجەت بولۋى مۇمكىن جينالىستار كەزىندە حاتتامالار تولتىرۋ ءۇشىن پايدالى»، دەپ تولىقتىردى عالىم.
“ادىرنا” ۇلتتىق پورتالى
