قازاق ءتىلى جانە ادەبيەتى ءپانىنىڭ مۇعالىمى ولگا تيم قازاق بالالارىنىڭ بۇگىنگى جاي-كۇيى مەن بولاشاعىنا الاڭدايتىنىن ايتتى، دەپ حابارلايدى “ادىرنا” ۇلتتىق پورتالى الماتى تەلەارناسىنا سىلتەمە جاساپ.
ونىڭ ايتۋىنشا، قازاق ءتىلى اۋەلى قازاقتارعا كەرەك. كوپ قازاق وسىنى تۇسىنبەي ءجۇر.
«قازىرگى تاڭدا ەلىمىزدە قازاق ءتىلىن مەنگەرۋ وتە قيىن بولىپ تۇر. سەبەبى قازاقتار ءوزى انا ءتىلىن بىلمەيدى. كوپ قازاق وسىنى تۇسىنبەي ءجۇر. بىز مەكتەپتە بالالارعا قازاق ءتىلىن ۇيرەتسەك تە، ولار ۇيىندە اتا-اناسىمەن ورىس تىلىندە سويلەسەدى.
سوندىقتان وقۋشىلاردىڭ قازاق ءتىلىن جەتىك مەڭگەرىپ كەتۋى وتە قيىن. مەن بالالاردىڭ بولاشاعىنا الاڭدايمىن. ولار ءوسىپ، اتا-انا بولعاندا بالالارىنا انا ءتىلىن قالاي ۇيرەتەدى؟» – دەيدى ۇستاز بەلگىلى بلوگەر ايسۇلتان جاقىپقا بەرگەن سۇحباتىندا.
ۇستازدىڭ ايتۋىنشا، مەملەكەتتىك ءتىلدى مەڭگەرۋ ءار ازاماتتىڭ بورىشى.
ايتا كەتەيىك، ولگا تيم قازاق بالالارىنىڭ ورتاسىندا وسكەن. مەملەكەتتىك ءتىلدى جەتىك بىلەدى. قازىرگى تاڭدا ق. ي. ساتباەۆ اتىنداعى مەكتەپ-گيمنازياسى ديرەكتورىنىڭ تاربيە ءىسى جونىندەگى ورىنباسارى بولىپ قىزمەت ەتەدى.
