استانا قالاسىنىڭ قىلمىستىق ىستەر جونىندەگى اۋدانارالىق سوتى بالاباقشادا تاربيەلەنۋشىگە كۇش قولدانعان ايەلدى قىلمىستىق كودەكستىڭ 140-بابى 2-بولىگى بويىنشا كىنالى دەپ تانىپ، 80 ساعات قوعامدىق جۇمىسقا تارتۋ جازاسىن تاعايىندادى، دەپ حابارلايدى "ادىرنا".
ء ىس ماتەريالدارىنا سايكەس، 2025 جىلعى قاڭتار–اقپان ايلارىندا تاربيەشى رەتىندە جۇمىس ىستەگەن ايەل بىرنەشە رەت بالاعا كۇش كورسەتكەن. بەينەباقىلاۋ جازبالارىنان بالانى ۇرۋ، يتەرۋ جانە وزگە دە دورەكى ارەكەتتەر انىق كورىنىس تاپقان. بۇل ونىڭ فيزيكالىق اۋىرسىنۋىنا جانە جىلاۋىنا سەبەپ بولعان.
"سوتتا ايىپتالۋشىنىڭ كىناسى كۋاگەرلەردىڭ ايعاقتارىمەن، ساراپتاما قورىتىندىسىمەن جانە بەينەماتەريالدارمەن دالەلدەندى. سوتتالۋشى كىناسىن تولىق مويىنداپ، سوتتان جەڭىل جازا تاعايىنداۋدى سۇرادى.
مەملەكەتتىك ايىپتاۋشى 80 ساعات قوعامدىق جۇمىس تاعايىنداپ، امنيستيانى قولدانۋدى جانە بالالارمەن جۇمىس ىستەۋ قۇقىعىنان ايىرۋدى سۇرادى. ال جابىرلەنۋشى تاراپ ءىستى نەعۇرلىم اۋىر باپپەن قاراۋدى جانە مورالدىق زياننىڭ وتەلۋىن تالاپ ەتتى", - دەلىنگەن اقپاراتتا.
سوت ايىپتالۋشىنىڭ كامەلەتكە تولماعان بالاسى بار ەكەنىن جانە وڭ مىنەزدەمەسىن جەڭىلدەتەتىن ءمان-جاي رەتىندە ەسكەرىپ، قوعامدىق جۇمىس تۇرىندەگى جازا تاعايىندادى.
الايدا، 2025 جىلعى 23 ماۋسىمداعى «قازاقستان رەسپۋبليكاسى كونستيتۋتسياسىنىڭ وتىز جىلدىعىنا بايلانىستى راقىمشىلىق جاساۋ تۋرالى» زاڭعا سايكەس، ايەل تاعايىندالعان جازادان بوساتىلدى.
جابىرلەنۋشى تاراپتىڭ مورالدىق زياندى وتەۋ تۋرالى ازاماتتىق تالابى ءىشىنارا قاناعاتتاندىرىلدى.
