بۇگىن بۇكىل ەل بويىنشا «جەر ساعاتى»حالىقارالىق ەكولوگيالىق اكتسياسى وتۋدە. 2026 جىلى اكتسيانىڭ تاقىرىبى ەلىمىزدە ەكوتۋريزمنىڭ دامۋى بولىپ جاريالاندى.
جەرگىلىكتى ۋاقىت بويىنشا ساعات 20:30-دا بۇكىل ەلدەگى ۇيلەردە، كەڭسەلەردە جانە كوشەلەردە عيماراتتاردىڭ جارىقتاندىرۋى ءبىر ساعاتقا ءسوندى.
ەستەرىڭىزگە سالا كەتەيىك، «جەر ساعاتى» اكتسياسى – دۇنيەجۇزىلىك جابايى تابيعات قورىنىڭ (بۇدان ءارى-WWF) قامقورلىعىمەن وتكىزىلەتىن جىل سايىنعى حالىقارالىق وقيعا. اكتسيا بارىسىندا WWF پلانەتانىڭ بولاشاعىنا بەي-جاي قاراماي، جارىق پەن تۇرمىستىق ەلەكتر قۇرالدارىن ءبىر ساعاتقا وشىرۋگە شاقىرادى; سونىمەن بىرگە الەمدەگى ەڭ تانىمال عيماراتتار مەن ەسكەرتكىشتەردىڭ جارىۇتاندىرۋى سونەدى.
قازاقستان بۇل شاراعا 17-ءشى رەت قوسىلىپ وتىر جانە بيىلعى جىلى شاراعا ەلىمىز بويىنشا 500-دەن استام نىسان: اقوردا رەزيدەنتسياسى، «بايتەرەك» مونۋمەنتى، تاۋەلسىزدىك سارايى، «ازىرەت سۇلتان» مەشىتى، سپورت نىساندارى، وقۋ ورىندارى، وندىرىستىك مەكەمەلەر جانە ت.ب. عيماراتتار قوسىلدى.
«جەر ساعاتى» - بۇل پلانەتاداعى ەڭ ءىرى ەكولوگيالىق ناۋقان. وعان دۇنيە جۇزىندە 2 ميللياردتان استام ادام قاتىسادى، 180 ەلدەگى 7000 قالانىڭ تۇرعىندارى شاراعا قوسىلدى. 2026 جىلى «جەر ساعاتى» حالىقارالىق اكتسياسى 19-شى رەت وتكىزىلدى.
ءىس-شارانىڭ ماقساتى - تابيعات پەن پلانەتا رەسۋرستارىنا جاۋاپكەرشىلىكپەن قاراۋ قاجەتتىلىگىنە نازار اۋدارۋ
