18 شىلدەدە قازاقستاننىڭ دەنساۋلىق ساقتاۋ ءمينيسترى اقمارال ءالنازاروۆا ەلىمىزدىڭ بارلىق تۇرعىندارىنا ۇندەۋ جاسادى، دەپ حابارلايدى “ادىرنا”.
ول ءوزىنىڭ Instagram پاراقشاسىندا جاقىندا مەديتسينا قىزمەتكەرلەرىنە جاسالعان شابۋىلعا قاتىستى پىكىر ءبىلدىردى.
"قۇرمەتتى قازاقستاندىقتار! سىزدەرگە پەرزەنتحانادا مەيىرگەر، بالالار اۋرۋحاناسىنىڭ قابىلداۋ بولىمىندە كەزەكشى جانە ورديناتور دارىگەر بولىپ جۇمىس ىستەگەن مامان رەتىندە ءۇن قاتقىم كەلەدى: مەديتسينا قىزمەتكەرلەرىنە قارسى زورلىق-زومبىلىقتى توقتاتىڭىزدار”، دەدى اقمارال ءالنازاروۆا
قاراعاندىدا مەدبيكەگە شابۋىل جاسالعان جانە قوستانايداعى ەكى شابۋىلعا مينيستر وسىلاي جاۋاپ بەردى. مينيستر قىركۇيەكتە مەديتسينا قىزمەتكەرلەرىنە شابۋىل جاساعانى ءۇشىن جازانى قاتايتاتىن زاڭنامالىق تۇزەتۋلەر پارلامەنتكە ەنگىزىلەتىنىن ەسكە سالدى.
ء"بىز تاعى دا قاراعاندى مەن قوستانايدا ورىن العان ەكى سوراقى جاعدايعا كۋا بولىپ وتىرمىز. قاراعاندىدا جەكە كلينيكانىڭ مەيىرگەرىنە شابۋىل جاسالدى. قوستاناي وبلىستىق اۋرۋحاناسىندا ۋرولوگيا ءبولىمىنىڭ جاس حيرۋرگى قاتىگەزدىكپەن سوققىعا جىعىلدى. پاتسيەنت ءوز كەزەگىن كۇتكىسى كەلمەگەندىكتەن، دارىگەردى ءبىر ۇرىپ، ەسىنەن تاندىرعان. قازىر دارىگەر رەانيماتسيادا. جاعدايى – اۋىر. ادام ءومىرىن اراشالاپ جۇرگەن جانعا قول كوتەرۋ ءۇشىن ادام قانشالىقتى دەڭگەيدە قاتىگەز جانە مەيىرىمسىز بولۋى كەرەك؟” دەدى اقمارال ءالنازاروۆا.
بەيبىت ۋاقىتتا دارىگەرلەردىڭ ءوز جۇمىس ورنىندا ومىرىنە قاۋىپ ءتونىپ وتىرۋى – اقىلعا قونبايتىن، مۇلدە
"بۇل – تەك ءبىر دارىگەرگە جاسالعان شابۋىل ەمەس. بۇل – ونداعان پاتسيەنتتىڭ قاراۋسىز قالۋى، ونداعان وپەراتسيانىڭ كەيىنگە شەگەرىلۋى. بۇل – بۇكىل دەنساۋلىق ساقتاۋ جۇيەسىنە تونگەن تىكەلەي سوققى. شابۋىل جاسالعان قابىلداۋ بولىمدەرى – ونسىز دا قاۋىپى جوعارى ايماقتار.
مەديتسينا قىزمەتكەرلەرىنە قارسى زورلىق-زومبىلىقتىڭ جيىلەپ كەتۋىنە بايلانىستى ىشكى ىستەر مينيسترىمەن بىرلەسىپ، شۇعىل تۇردە ۋرگەنتتىك ستاتسيونارلاردىڭ، بالالار جانە پەريناتالدىق ورتالىقتاردىڭ قابىلداۋ بولىمدەرىندە تاۋلىك بويى كۇزەت پوستتارىن كۇشەيتۋ تۋرالى شەشىم قابىلداندى", – دەپ ويىن جەتكىزدى ءالنازاروۆا.
سونداي-اق، ول بارلىق مەديتسينالىق ۇيىمدار بەينەباقىلاۋ جۇيەسىمەن، كۇزەتپەن جانە دابىل باتىرمالارىمەن قامتاماسىز ەتىلۋى ءتيىس ەكەنىن ايتا كەتتى.
"تاعى دا بارشاڭىزدى بارلىق دەڭگەيدە وركەنيەتتى قارىم-قاتىناس مادەنيەتىن ساقتاۋعا شاقىرامىن. ءبىز بالالارعا جاس كەزىنەن مەديتسينا قىزمەتكەرلەرىنىڭ ەڭبەگىن قۇرمەتتەۋدى، العىس ايتۋ مادەنيەتىن ۇيرەتۋىمىز كەرەك. جاپا شەككەن ارىپتەسىمىزدىڭ ءومىرىن ساقتاۋ ءۇشىن دەنساۋلىق ساقتاۋ مينيسترلىگى بارلىق قاجەتتى ءارى باتىل شارالاردى قابىلدايتىن بولادى”، دەدى اقمارال ءالنازاروۆا
ەرتەڭ دارىگەر سانيتاريالىق اۆياتسيامەن ۇلتتىق شۇعىل مەديتسينانى ۇيلەستىرۋ ورتالىعىنا جەتكىزىلىپ، بىلىكتى مامانداردىڭ قاتىسۋىمەن ءارى قاراي ەم قابىلدايدى.