ءبىر توپ زيالى قاۋىم وكىلى ءماجىلىس دەپۋتاتتارىنا مەملەكەتتىك تىلدە زاڭجوبا ازىرلەۋ بويىنشا ۇسىنىس-ۇندەۋ جولدادى، دەپ حابارلايدى «ادىرنا» ءتىلشىسى.
ايتۋلارىنشا، ەلدە مەملەكەتتىك تىلدە زاڭجوبا ازىرلەۋدىڭ تەتىگى جوق.
«قۇرمەتتى ءماجىلىس دەپۋتاتتارى! سىزدەردىڭ بارلىعىڭىز دا مەملەكەتتىك تىلدە زاڭجوبا جاساۋدى قولدايسىزدار جانە بۇل ماسەلەنى كوپشىلىگىڭىز سايلاۋالدى باعدارلامالارىڭىزعا دا ارقاۋ ەتتىڭىزدەر. الايدا، بۇل تۇيتكىلدى شەشۋگە ءالى كۇنگە باستاپقى قادام دا بولماي وتىر. ويتكەنى، قازاق تىلىندە زاڭجوبانى دا، ءىرىلى-ۇساقتى نورماتيۆتىك اكت قۇجاتتارىن جاساقتاۋعا دا العىشارت جاسالماۋدا. اتاپ ايتقاندا، ۇكىمەتتە دە، پارلامەنت اپپاراتىندا دا زاڭجوبا ازىرلەۋگە دەگەن ەشبىر عىلىمي-ينتەللەكتۋالدىق رەسۋرس جاساقتالماعان. ونداي الەۋەتسىز جوعارى دەڭگەيلى مەملەكەتتىك مارتەبەلى قۇجاتتاردىڭ جوباسىن ازىرلەۋ مۇلدەم مۇمكىن ەمەس. مەملەكەتتىك ورگاندارداعى اۋدارما بولىمدەرى عىلىمي-لينگۆيستيكالىق جانە زاڭدامالىق مازمۇنداعى ەشبىر قۇزىر پەن قۇزىرەتكە دە، رەسۋرسقا دا يە بولا الماي كەلەدى.
قر ۇكىمەتى جانىنداعى مەملەكەتتىك تەرمينولوگيالىق كوميسسيانىڭ شىن مانىندە قوعامدىق سيپاتى باسىم، اندا-ساندا باس قوسىپ، دايىندالعان تەرميندەر تىزبەگىن بەكىتەتىن رەسمي-قوعامدىق القا عانا. ءتىپتى ەلىمىزدەگى احمەت بايتۇرسىنۇلى اتىنداعى ىرگەلى لينگۆيستيكا ماسەلەلەرىمەن اينالىساتىن ءتىل ءبىلىمى ينستيتۋتىندا دا پراكتيكالىق ومىرشەڭ لينگۆيستيكالىق تالاپتاردىڭ شەشىمىن تابۋعا مۇمكىندىك پەن رەسۋرس قاراستىرىلماعانى راس بولسا، ال شايسۇلتان شاياحمەتوۆ اتىنداعى ۇلتتىق عىلىمي-پراكتيكالىق «تىلقازىنا» ورتالىعىنىڭ قاۋقارى اتالمىش مىندەتتى اتقارۋعا ارنالماعان. وسى احۋالدى ەسكەرە ءارى قاراستىرا وتىرىپ، تاياۋ ۋاقىتتا قازاق تىلىندە زاڭجوبا مەن نورماتيۆتىك اكت جوبالارىن ازىرلەۋ مۇمكىندىگى جوعارى مەملەكەتتىك ورگانداردا ءتيىستى دارەجەدە قالىپتاسپاعان دەگەن قورىتىندىعا كەلىپ وتىرمىز»،—دەلىنگەن ۇندەۋدە.
ولار بۇل تۇيتكىلدى شەشۋ ءۇشىن قۇقىقتىق-لينگۆيستيكالىق ورتالىعىن قۇرۋ كەرەك دەپ ەسەپتەيدى.
«پارلامەنت اپپاراتى جانىنداعى اۋدارما ءبولىمىنىڭ نەگىزىندە مەملەكەتتىك تىلدەگى نورماتيۆ اكتىلەرىن ازىرلەۋدىڭ قۇقىقتىق-لينگۆيستيكالىق ورتالىعىن قۇرۋ كەرەك. بۇنداي ورتالىقتا تەرمينولوگيا مەن لەكسيكولوگيا، اۋىزەكى جانە جازباشا اۋدارما، زاڭدامالىق رەداكتسيا بولىمدەرى اشىلۋى قاجەت.
بۇل ۇسىنىستى بىلدىرە وتىرىپ، جۋىق ارادا وسى تاقىرىپقا ارنالعان پارلامەنتتە قوعامدىق تىڭدالىم وتكىزگەن ماقۇل جانە كەلەسى جىلعى مەملەكەتتىك بيۋدجەتكە اتالمىش ورگاندى قۇرۋ بويىنشا ناقتى جوبا ازىرلەنگەنى ابزال دەگەن ۇسىنىم قىلامىز.
ۇسىنىس بىلدىرۋشىلەر:
سەرىك ەرعالي ابدىرەشۇلى، حالىقارالىق «قازاق ءتىلى» قوعامى ورتالىق كەڭەسىنىڭ مۇشەسى;
ەرجان زەمفيرا مەلسقىزى، ونەرتانۋشى، الەۋمەتتىك عىلىمدار ماگيسترى;
باكىرۇلى ءابدىراشيت، فيلوسوف عالىم، پۋبليتسيست;
ق.س.قالىباەۆا، اباي اتىنداعى قازۇپۋ-دىڭ پروفەسسورى. فيلولوگيا عىلىمدارىنىڭ دوكتورى;
بورباسوۆا قارلىعاش مولداعاليقىزى، ءال-فاريبي اتىنداعى قازۇۋ پروفەسسورى، فيلوسوفيا عىلىمدارىنىڭ دوكتورى;
لاريسا الدابەرگەن، حالىقارالىق "قازاق ءتىلى" قوعامى استانالىق فيليال باسشىسى»،—دەدى زيالى توپ.
