الەۋمەتتىك جەلىدە پسيحولوگ ىزدەگەن ادام بۇگىن جۇزدەگەن ۇسىنىسقا تاپ بولادى. ءبىرى “ىشكى بلوكتاردى اشامىن” دەيدى, ەندى ءبىرى “ءبىر كۋرستا ءومىرىڭ وزگەرەدى” دەپ ۋادە بەرەدى. داعدارىستا جۇرگەن ادام ءۇشىن مۇنداي سوزدەر ءۇمىت سياقتى كورىنۋى مۇمكىن. بىراق پسيحولوگيالىق كومەك پەن ادەمى جارنامانىڭا راسى ءاردايىم بىردەي ەمەس. وسى تۇرعىدا قولعا الىنعان زاڭنامالىق شارالار قانشالىقتى قارىمدى؟
پسيحولوگياعا سۇرانىستىڭ ارتۋى تەك الەۋمەتتىك جەلىدەگى ترەند ەمەس. سوڭعى جىلدارى پسيحيكالىق دەنساۋلىق ماسەلەسى الەمدىك دەڭگەيدە دە، قازاقستاندا دا ءجيى تالقىلانا باستادى. بۇعان پاندەميادان كەيىنگى كۇيزەلىس، جالعىزدىق، مازاسىزدىق، الەۋمەتتىك قىسىم جانە ادامداردىڭ پسيحيكالىق ساۋلىق تۋرالى اشىق ايتا باستاۋى اسەر ەتتى.
جىگىتتەر قىزدارعا قاراعاندا سيرەك
پسيحولوگ، الەۋمەتتىك عىلىمدار ماگيسترى، نازىم بوزىمباەۆا دا قازىرگى تاڭدا پسيحولوگقا جۇگىنەتىندەر از ەمەس ەكەنىن ايتتى.
ء“يا، پسيحولوگيالىق كومەككە جۇگىنەتىندەر سانى از ەمەس، بىراق ءار پسيحولوگتىڭ قابىلدايتىن ادام سانى، ءوز نورماسى بولادى. سونىمەن قاتار ءار پسيحولوگتىڭ اينالىساتىن سۇراقتارى مەن تاقىرىپتارى بولەك. مىسالى، مەنىڭ جۇمىس باعىتىمنان بولەك ماسەلە بولسا، ادامدى باسقا ارىپتەستەرىمە جىبەرەمىن”، -دەيدى.
ماماننىڭ ايتۋىنشا، ونىڭ تاجىريبەسىندە ادامدار كوبىنە قارىم-قاتىناس ماسەلەسىمەن كەلەدى. اسىرەسە تۇرمىس قۇرماعان قىزدار مەن جىگىتتەر ءجيى جۇگىنەدى. بىراق جىگىتتەر قىزدارعا قاراعاندا سيرەك كەلەدى جانە كوبىنە جاعدايى كۇردەلەنگەن كەزدە عانا مامان كومەگىن ىزدەيدى.
“جىگىتتەر كوبىنە كريتيكالىق جاعدايدا كەلەدى. ونداي كەزدە مەن پسيحياترعا جۇگىنۋگە كەڭەس بەرەمىن. قاجەت بولسا, ستاتسيونارلىق ەم العاننان كەيىن عانا پسيحولوگيالىق جۇمىستى باستاۋعا بولاتىنىن ايتامىن”، - دەدى پسيحولوگ.
قازاقستاندا دا پسيحولوگيالىق قولداۋعا جۇگىنەتىندەر سانى از ەمەس. 2025 جىلدىڭ 9 ايىندا ەلىمىزدەگى پسيحولوگيالىق قولداۋ ورتالىقتارى 23 مىڭنان استام ازاماتقا كومەك كورسەتكەن.
سونىمەن قاتار ەلدە 43 جوعارى وقۋ ورنى پسيحولوگ ماماندارىن دايىندايدى, باكالاۆريات، ماگيستراتۋرا جانە دوكتورانتۋرانى قوسقاندا بۇل باعىتتا 17 مىڭ ستۋدەنت ءبىلىم الىپ ءجۇر, ال جىل سايىن شامامەن 3,5-4 مىڭ تۇلەك ديپلوم الادى.
دۇنيەجۇزىلىك دەنساۋلىق ساقتاۋ ۇيىمى COVID-19 پاندەمياسىنىڭ العاشقى جىلىندا الەمدە مازاسىزدىق پەن دەپرەسسيانىڭ تارالۋى 25 پايىزعا وسكەنىن حابارلادى. ددۇ-نىڭ 2025 جىلعى دەرەگىنە سۇيەنسەك، ەلدەردىڭ 80 پايىزىنان استامى توتەنشە جاعدايعا جاۋاپ بەرۋ جۇيەسىنە پسيحيكالىق دەنساۋلىق پەن پسيحوالەۋمەتتىك قولداۋدى ەنگىزگەن، ياعني بۇل سالا جاھاندىق ساياساتتىڭ دا ماڭىزدى باعىتىنا اينالىپ وتىر.
سۇرانىس ارتقان جەردە ۇسىنىس تا كوبەيەدى
پسيحولوگياعا قىزىعۋشىلىق ارتقان سايىن, بۇلتاقىرىپ الەۋمەتتىك جەلىدە دە كەڭ تارالا باستادى. قازىر تسيفرلىق كەڭىستىكتە ءوزىن“پسيحولوگ”، “مەنتور”، “كوۋچ”، “سانانى اشۋشى”، “تراۆما ەمدەۋشى” دەپ تانىستىراتىن ادامدار كوبەيدى. ولاردىڭ كەيبىرى ناقتى كاسىبي ءبىلىمىن كورسەتسە, ەندى ءبىر بولىگى قىسقا كۋرستار مەن جەكە ءتاجىريبەسىن نەگىزگى دالەل رەتىندە ۇسىنادى.
وسى تۇستا “پسەۆدوپسيحولوگ” ۇعىمىن ناقتىلاۋ ماڭىزدى. نازىم التايقىزىنىڭ ايتۋىنشا, مۇنداي ادامدار كوبىنە كاسىبي ءبىلىممەن جەكە ومىرلىك تاجىريبەنىڭ اراسىن اجىراتا بەرمەيدى.
“پسەۆدوپسيحولوگ دەگەنىمىز – ەڭ ءبىرىنشى, جوعارى ءبىلىمى جوق ادام, ياعني وسى ماماندىق اياسىندا باكالاۆر، ماگيستراتۋرا نەمەسە باسقا كءاسىبي ديپلومى جوق ادامدار. ايتىپ وتىرعان پسەۆدوپسيحولوگتار كوبىنە ومىرىندە نەشە ءتۇرلى جاعداي بولىپ, قانداي دا ءبىر ومىرلىك كەزەڭدى باستان كەشىرىپ, «مەنىڭ تاجىريبەم بار، مەن ادامدارعا كەرەكپىن» دەپ ونى الەممەن بولىسكىسى كەلەتىن جانداردىڭ اراسىنان پايدا بولادى. ولار تەك ءبولىسىپ قانا قويماي, پسيحولوگ رەتىندە كونسۋلتاتسيا باستاپ جاتادى. بۇل تۇرمىستىق دەڭگەيدەگى پسيحولوگيا (جيتەيسكايا پسيحولوگيا) دەپ اتالادى. ال مۇنىڭ عىلىمي پسيحولوگيادان ايىرماشىلىعى جەر مەن كوكتەي”، - دەيدى پسيحولوگ.
مامان «بۇل جەردە ادامي فاكتوردان بولەك، قىسقاكۋرستار جاساپ, سەرتيفيكات بەرۋشىلەر سانىنىڭ ارتۋى دا ماسەلەنى ۋشىقتىرىپ تۇر»، - دەيدى.
“بۇدان بولەك، وسىنداي جانداردى قولدايتىن ورتالىقتار، اسسوتسياتسيالار، كۋرستار اشىلىپ جاتىر. مىسالى، “سەرتيفيكاتىڭدى الا عوي، ەندى سەن كوۋچسىڭ’ دەيدى. ال ادام ءبىر ايدا نەمەسە ءبىر جىلدا قانداي مامان بولىپ شىعادى؟ ەشقانداي كۆاليفيكاتسياسى جوق”، – دەدى نازىم التايقىزى.
الەۋمەتتىك جەلىدەگى مۇنداي قىزمەتتەر جەكە كونسۋلتاتسيامەن عانا شەكتەلمەيدى. كەي پاراقشالاردا “رۋحاني پراكتيكا”، “ىشكى ەنەرگيامەن جۇمىس”، “ترانسفورماتسيا”، “جاڭا دەڭگەيگە شىعۋ”، “ىشكى بلوكتاردى اشۋ” سياقتى اتاۋلارمەن ءتۇرلى سەانستار، مارافوندار مەن كۋرستار ۇسىنىلادى.
نازىم التايقىزىنىڭ ايتۋىنشا، مۇنداي ۇسىنىستاردىڭ ىشىندە پسيحولوگيادان گورى فيلوسوفيالىق نەمەسە يدەولوگيالىق باعىتقا جاقىن دۇنيەلەر دە كەزدەسەدى.
“قازىر «باليداعى رۋحاني پراكتيكا» دەگەن سەكىلدى كۋرستار تولىپ كەتتى. كەيدە باسقا ەلدەني دەولوگيالىق, مۇمكىن فيلوسوفيالىق تۇردە قانداي دا ءبىر جاڭا دۇنيەنى بىزگە ءىلىم رەتىندە كورسەتەتىندەر بار”، - دەيءدى پسيحولوگ.
ماماننىڭ ايتۋىنشا, ونىڭ تاجىريبەسىندە كۇماندى سەانستار مەن كۋرستاردان كەيىن جاعدايى ناشارلاعان ادامدار كەزدەسكەن.
“ءوزىم ءبىر وتكەن ترەنينگتى باقىلادىم. ەر ادامدارعا ارنالعان ترەنينگ بولعان. ونداعى تاپسىرمالارى: ءبىر كۇن كوشەدە قايىر سۇراۋ, ادامداردان تاماق الىپ بەرۋىن سۇراۋ نەمەسە ءبىر كۇن دالادا تۇنەۋ سياقتى تاپسىرمالار بولعان. الەۋمەتتىك جەلىدە دە بۇل ترەنينگ تۋرالى جازىلىپ, رەزونانس تۋىنداعان. كەي قاتىسقان ادامدار وسىدان كەيىن پسيحياتريالىق كلينيكاعا جاتىپ قالعان”، -دەدى نازىم التايقىزى.
نازىم التايقىزى مۇنداي فورماتتى پسيحولوگيالىق كومەكپەن شاتاستىرۋعا بولمايتىنىن ايتادى.
“مۇنداي ترەنينگتەردى وتكىزۋگە مۇلدە بولمايدى. بۇل پسيحولوگيانى بيزنەسكە اينالدىرۋدىڭ كورىنىسى دەپ ويلايمىن. سەبەبى ءار ادامنىڭ پسيحيكاسى ءارتۇرلى بولعاندىقتان, بۇل دۇرىس ەمەس. پسيحيكا – اينەك سەكىلدى وتە نازىك. ونىمەن وتە نازىك جۇمىس جاساۋ كەرەك. سوندىقتان قانداي دا ءبىر تەحنيكامەن جۇمىس جاساعان كەزدە ءار ۇساق نارسەنى زەرتتەۋ قاجەت”، -دەپ ءتۇسىندىردى نازىم التايقىزى.
زاڭ جوباسى نەنى رەتتەمەك؟
بۇل ماسەلە مەملەكەتتىك دەڭگەيدە دە كوتەرىلدى. مەملەكەت باسشىسى قاسىم-جومارت توقاەۆ ۇلتتىق قۇرىلتاي وتىرىسىندا حالىقتى الداپ، اقشا تاۋىپ جۇرگەندەردى باقىلاۋعا الۋدى تاپسىرعان.
«قازىر جۇرتقا اقىل ايتىپ، اقشا تاباتىن جالعان پسيحولوگتار مەن “كوۋچتاردىڭ” سانى كوبەيىپ كەتتى. ولارعا سەنىپ، الدانىپ قالعاندار كوپ. ماعان بۇل ماسەلەگە قاتىستى كوپتەگەن شاعىمدار ءتۇستى. جاۋاپتى ورگاندار بۇل ماسەلەنى دە نازارعا الۋى ءتيىس» ، - دەدى پرەزيدەنت.
ەسكەرتۋ كەيىن زاڭنامالىق دەڭگەيدەگى تالقىلاۋعا ۇلاسىپ, 2026 جىلعى 8 ساۋىردە ءماجىلىس «پسيحولوگيالىق قىزمەت تۋرالى» زاڭ جوباسىن بءىرىنشى وقىلىمدا ماقۇلدادى. زاڭ جوباسى بويىنشا ارنايى رەەستر قۇرىلماق. اتالعان تىزىلىمگە ءتيىستى ديپلومى نەمەسە سەرتيفيكاتى بار بىلىكتى پسيحولوگتار ەنگىزىلەدى. زاڭ تالاپتارىنا سايكەس, رەەسترگە ەنبەگەن ماماندار پسيحولوگيالىق قىزمەت كورسەتۋ قۇقىعىنان ايىرىلادى.
بۇل ماسەلەگە قاتىستى ءماجىلىس دەپۋتاتى اسحات ايماعامبەتوۆ پىكىرىن بىلاي ءبىلدىردى.
“مىسال رەتىندە ايتايىن. اجىراسقان، كۇيزەلىستە جۇرگەن ادام، قولىندا بالالارى بار، كومەك ىزدەيدى. ول الەۋمەتتىك جەلىدەن ءوزىن «پسيحولوگ»دەپ تانىستىرعان ادامدى تابادى. ادەمى پاراقشا، بەلگىسىز ونلاين كۋرستاردان الىنعان سەرتيفيكات، مىڭداعان جازىلۋشى. ول مامانعا سوڭعى اقشاسىن بەرىپ، ايلاپ بارادى، بىراق جاعدايى جاقسارۋدىڭ ورنىنا، كەرىسىنشە ناشارلايدى. ەگەر اسپاز ادامدى ۋلاپ قويسا، مەيرامحانا جابىلادى، جاۋاپكەرشىلىك بار، ءىس قوزعالادى. ال ەگەر اتالعان «پسيحولوگ» ادامنىڭ تاعدىرىن، ءومىرىن تاس-تالقان ەتسە شە، كىم وعان جاۋاپتى؟ وسىنداي جاعدايلارعا بايلانىستى ءبىز بۇل زاڭ جوباسىن ادەيى ازىرلەدىك”، – دەدى.
زاڭ جوباسىنا سايكەس رەەسترگە ەنبەسە دە، ءوزىن پسيحولوگ رەتىندە تانىستىرىپ، كۋرس ساتقاندار الاياقتىق بابى بويىنشا جازالانادى. ديپلومى بار ماماندار دا قايتا دايارلاۋ ساباقتارىنان ءوتىپ، كەمى بەس جىلدا ءبىر رەت ەمتيحان تاپسىرۋعا مىندەتتەلەدى. ءتىزىلىم ەلەكتروندى فورماتتا جۇرگىزىلىپ، دەرەكتەردىڭ اشىقتىعى قامتاماسىز ەتىلەدى. پسيحولوگيالىق كومەككە جۇگىنگەن ءاربىر ازامات ماماننىڭ بىلىكتىلىگىن تەكسەرىپ، سەنىمدى ءارى كاسىبي پسيحولوگتى تاڭداي الادى. بۇدان بولەك، پسيحولوگتىڭ كەڭەسىنەن كەيىن كۇيزەلىس ۇدەي تۇسسە، سوتقا جۇگىنۋگە بولادى.
ماڭىزدى نورمالاردىڭ ءبىرى – پسيحولوگتارعا مەديتسينالىق قىزمەت كورسەتۋگە جانە دارىلىك ەم تاعايىنداۋعا تىيىم سالىندى. سونىمەن قاتار قىزمەت ناتيجەسىنە كەپىلدىك بەرۋگە نەمەسە جالعان اقپارات تاراتۋعا جول بەرىلمەيدى. اتالعان ەرەجەلەردى بۇزعانى ءۇشىن جەكە اكىمشىلىك جاۋاپكەرشىلىك ەنگىزۋ جانە ايىپپۇل سانكتسيالارىن قاراستىراتىن تۇزەتۋلەر دە تالقىلانىپ جاتىر.
پسيحولوگ نازىم التايقىزى زاڭ جوباسىن ءالى دە ناقتىلاۋدى قاجەت ەتەتىن قۇجات دەپ سانايدى.
“شىنىمدى ايتسام، بۇل زاڭناما ءالى شيكى ماتەريال سياقتى. پسيحولوگيا ءبىر باعىتتا عانا جۇمىس جاسامايدى، ونىڭ باعىتتارى وتە كوپ. ارقايسىسى ءارتۇرلى دەڭگەيدە جۇمىس ىستەيدى. سوندىقتان ءبارىن ءبىر جالپى تالاپپەن رەتتەۋ قيىن. رەەسترگە كەلسەك، ول جەردە بارلىق اقپاراتتىڭ اشىق بولۋى قانشالىقتى دۇرىس؟ بۇل جەكە اقپارات قوي.
ەكىنشى ماسەلە – مەملەكەت ونى قالاي رەتتەيدى؟ ديپلوم العان ادامنىڭ ءبارى كەرەمەت پسيحولوگ بولىپ كەتپەيدى. كەيبىر مامان تەرەڭ تەراپيادان وتپەگەن، سۋپەرۆيزيا الماعان نەمەسە ناقتى تاجىريبەسى از بولۋى مۇمكىن. ەگەر پسيحولوگتار ەمتيحان تاپسىرۋى كەرەك بولسا، ول ەمتيحاندى كىم جانە قالاي باقىلايدى؟ ءار پسيحولوگيالىق باعىت بويىنشا بولەك كاسىبي كوميسسيا قاجەت بولۋى مۇمكىن. سوندىقتان قازىرگى زاڭ جوباسى تىم جالپىلاما كورىنەدى. كەيىن ناقتى جاعدايلارعا كەلگەندە ءتۇرلى قايشىلىقتار پايدا بولۋى ابدەن مۇمكىن”، – دەدى نازىم التايقىزى.
پسيحولوگ بۇل رەتتە كورشى قىتاي ەلىنىڭ تاجىريبەسىن ەسكەرۋىمىز قاجەت دەيدى.
“مىسال رەتىندە قىتاي تاجىريبەسىن ايتۋعا بولادى. وندا الەۋمەتتىك جەلىدە بەلگىلى ءبىر تاقىرىپتا بلوگ جۇرگىزۋ ءۇشىن سول سالاعا قاتىستى ءبىلىمىڭىزدى دالەلدەيتىن قۇجات قاجەت. ەگەر ادام فۋد-بلوگەر بولسا، تاماقتانۋ نەمەسە تاعام قاۋىپسىزدىگى سالاسىندا بەلگىلى ءبىر ءبىلىمى بولۋى كەرەك دەگەن تالاپتار تالقىلانعان. تالاپقا ساي كەلمەسە پاراقشاسىن بۇعاتتايدى. وسىنداي ءتاسىلدى الەۋمەتتىك جەلىدەگى پسەۆدوماماندارعا قاتىستى دا قولدانۋعا بولادى ”، – دەدى.
زاڭناما تۇرعىسىنان ماسەلە تەك پاراقشانى بۇعاتتاۋمەن شەكتەلمەيدى. پسيحولوگ اتاۋىن كىم قولدانا الادى، ماماننىڭ بىلىكتىلىگى قالاي تەكسەرىلەدى جانە كليەنت قۇقىعى قالاي قورعالادى دەگەن سۇراقتار دا ماڭىزدى. وسى تۇرعىدان شەتەلدەگى تىركەۋ، ليتسەنزيالاۋ جانە كاسىبي اتاۋلاردى قورعاۋ تاجىريبەسى نازار اۋدارتادى.
اۆستراليادا ءوزىن “psychologist” رەتىندە تانىستىرىپ، وسى اتاۋمەن كاسىبي قىزمەت كورسەتۋ ءۇشىن مامان رەسمي تىركەۋدەن ءوتۋى كەرەك. رەسمي دەرەكتە جالپى تىركەۋگە ۇمىتكەر مامان ادەتتە التى جىلدىق ءبىلىم مەن كاسىبي دايىندىقتان وتەتىنى كورسەتىلگەن: ءتورت جىل اككرەديتتەلگەن پسيحولوگيا باعدارلاماسى جانە ودان كەيىن ەكى جىل بەكىتىلگەن كاسىبي دايىندىق. كەيبىر جاعدايدا ۇلتتىق پسيحولوگيا ەمتيحانىن تاپسىرۋ دا تالاپ ەتىلەدى.
ۇلىبريتانيادا جالپى “psychologist” ءسوزى بارلىق جاعدايدا تولىق رەتتەلەتىن اتاۋ ەمەس. بىراق “clinical psychologist”، “counselling psychologist”، “forensic psychologist”، “educational psychologist” سياقتى ناقتى كاسىبي باعىتتار بويىنشا ءوزىن مامان رەتىندە تانىستىرۋ ءۇشىن ادام ارنايى رەەستردە بولۋى كەرەك. بۇل قازاقستان ءۇشىن ماڭىزدى ەسكەرتۋ: ەگەر زاڭ تەك ءبىر اتاۋدى عانا رەتتەسە، پسەۆدوماماندار باسقا اتاۋمەن قىزمەتىن جالعاستىرۋى مۇمكىن
اقش-تا پسيحولوگتاردى ليتسەنزيالاۋ شتاتتار ارقىلى جۇرگىزىلەدى. مىسالى، نيۋ-يورك شتاتىندا پسيحولوگ رەتىندە ليتسەنزيا الۋ ءۇشىن دوكتورانتۋرا دەڭگەيىندەگى ءبىلىم، باقىلاۋمەن وتكەن كاسىبي تاجىريبە جانە ەمتيحان تالاپ ەتىلەدى. ال كاليفورنيادا پسيحولوگ ليتسەنزياسى ءۇشىن 3000 ساعات باقىلاۋداعى كاسىبي تاجىريبە قاجەت، ونىڭ 1500 ساعاتى دوكتورلىق دەڭگەيدەن كەيىن جينالۋعا ءتيىس.
كاناداداعى ونتاريو پروۆينتسياسىندا ادام ءوزىن “psychologist” نەمەسە “psychological associate” رەتىندە تانىستىرىپ، پسيحولوگيالىق قىزمەت ۇسىنۋى ءۇشىن ارنايى كاسىبي كوللەدجگە تىركەلۋى قاجەت. رەسمي زاڭنامادا بۇل اتاۋلاردىڭ قىسقارتىلعان نەمەسە باسقا تىلدەگى بالاماسىن دا تىركەلمەگەن ادامنىڭ پايدالانۋىنا شەكتەۋ قويىلعان.
“ءبىز كوبىنە ءوزىمىزدى امەريكا نەمەسە ەۋروپامەن سالىستىرامىز. امەريكادا پسيحولوگقا بارۋ قالىپتى جاعداي, ادامدار مەنتالدىق ساۋلىققا كوبىرەك ءمان بەرەدى. بىراق سالىستىرۋ كەزىندە ءارەلدىڭ دامۋ دەڭگەيىن, مادەنيەتىن جانە قوعامداعى پسيحولوگيالىق ساۋات دەڭگەيىن ەسكەرۋ كەرەك. سوندىقتان شەتەل تاجىريبەسىن تولىق كوشىرىپ الۋ ەمەس, قازاقستان جاعدايىنا بەيىمدەپ قولدانۋ ماڭىزدى”، – دەپ ءتۇسىندىردى پسيحولوگ.
پسيحولوگ تاڭداعاندا نەنى ەسكەرۋ كەرەك؟
پسيحولوگ تاڭداۋدا تەك الەۋمەتتىك جەلىدەگى پاراقشاعا, پىكىرلەرگە نەمەسە سەرتيفيكاتتارعا سۇيەنۋ جەتكىلىكسىز. نازىم التايقىزىنىڭ ايتۋىنشا, ەڭ الدىمەن ادام سەانستان كەيىنگى ىشكى كۇيىنە نازار اۋدارعانى دۇرىس.
“پسيحولوگيالىق ءبىلىمى جوق ادامعا پسيحولوگتىڭ قانشالىقتى بىلىكتى ەكەنىن بىردەن ءتۇسىنۋ قيىن. مەنىڭ ويىمشا, ەڭ ءبىرىنشى بەلگى — ادامنىڭ سەانستان كەيىنگى ىشكى كۇيى. ەگەر ادام پسيحولوگتىڭ ءبىر سەانسىنان كەيىن از دا بولسا جەڭىلدىك سەزىنبەسە, كەرىسىنشە, ودان سايىن اۋىر ويلارعا باتىپ, ءوزىن قيىن سەزىنسە, بۇل دۇرىس ەمەس بەلگى دەپ ويلايمىن. بىلىكتى پسيحولوگ سۇراقتاردى وتە مۇقيات قويۋى كەرەك. ءار ايتقان ءسوزىن سۇزگىدەن وتكىزۋى قاجەت. ەگەر پسيحولوگ ادامعا: «سىزدىكى دۇرىس ەمەس», «وسى جاعدايدا ءسىز بىلاي ىستەۋىڭىز كەرەك ەدى» نەمەسە «سەنىڭ پروبلەماڭ پروبلەما ما؟» دەگەن سياقتى سوزدەر ايتسا، مۇنداي پسيحولوگتان قاشۋ كەرەك”، – دەيءدى.
نازىم التايقىزى پسيحولوگ تاڭداعاندا ماماننىڭ ءبىلىمى مەن تاجىريبەسىن تەكسەرۋدەن ۇيالماۋ كەرەك ەكەنىن ايتادى.
اسىلجان ەربولاتقىزى
