ۇلىبريتانيا پارسى شىعاناعى ەلدەرىنە يراندىق درون شابۋىلدارىنا تويتارىس بەرۋگە كومەكتەسۋ ءۇشىن ۋكراينالىق جانە بريتاندىق ساراپشىلاردى جىبەرەدى. بۇل تۋرالى ەلدىڭ پرەمەر-ءمينيسترى كير ستارمەر ايتتى، دەپ حابارلايدى «ادىرنا» ءتىلشىسى.
ء«بىز ۋكراينا ساراپشىلارىن ءوز ماماندارىمىزبەن بىرگە پارسى شىعاناعىنداعى سەرىكتەستەرىمىزگە ولاردى شابۋىلداپ جاتقان يراندىق ۇشقىشسىز اپپاراتتاردى اتىپ تۇسىرۋگە كومەكتەسۋ ءۇشىن جىبەرەمىز»، – دەدى ۇكىمەت باسشىسى الەۋمەتتىك جەلىدەگى پاراقشاسىندا.
سونداي-اق ول ۇلىبريتانيانىڭ كيپردەگى اسكەري بازالارىن اقش-قا پايدالانۋعا رۇقسات بەرگەنىن مالىمدەدى. ايتۋىنشا، اقش اسكەري نىسانداردى «ناقتى ءارى شەكتەۋلى قورعانىس ماقساتى» ءۇشىن پايدالانۋعا رۇقسات سۇراعان.
«قاۋىپتى توقتاتۋدىڭ جالعىز جولى – قويمالارداعى زىمىرانداردى نەمەسە ولاردى ۇشىرۋعا ارنالعان قوندىرعىلاردى جويۋ. ءبىز بۇل ءوتىنىشتى ماقۇلدادىق»، – دەدى ستارمەر.
ول ۇلىبريتانيانىڭ يرانعا قارسى سوققىلارعا تىكەلەي قوسىلمايتىنىن جەتكىزدى.
ء«بىز يرانعا جاسالعان باستاپقى سوققىلارعا قاتىسقان جوقپىز جانە قازىر دە شابۋىل ارەكەتتەرىنە قوسىلمايمىز»، – دەپ تۇيىندەدى باسشى.
