ورتالىق سايلاۋ كوميسسياسى وسك توراعاسى نۇرلان ءابدىروۆتىڭ باسشىلىعىمەن ۆينسەنت پيكەت باستاعان ەقىۇ دياقب قۇرىلتاي دەپۋتاتتارىن سايلاۋدى بايقاۋ جونىندەگى ميسسياسىنىڭ مۇشەلەرىمەن قورىتىندى كەزدەسۋ وتكىزدى. بۇل تۋرالى بۇگىن، 9 قىركۇيەكتە وسك-ءنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«شاقىرۋىمىزدى قابىل الىپ، قىسقا مەرزىمدى، سونداي-اق ۇزاق مەرزىمدى بايقاۋشىلاردى جىبەرگەندەرىڭىز ءۇشىن العىسىمىزدى بىلدىرەمىز. سايلاۋ ناۋقانى بارىسىندا مەنىڭ جانە ورتالىق سايلاۋ كوميسسياسى مۇشەلەرىنىڭ ولارمەن پىكىر الماسۋعا مۇمكىندىگىمىز بولدى. قر وسك نەگىزگى مىندەتى - داۋىس بەرۋ كۇنىن ۇيىمداستىرۋدىڭ جوعارى دەڭگەيىن قامتاماسىز ەتۋ. سايلاۋ كوميسسيالارىنا قويىلعان باستى تالاپ داۋىس بەرۋ راسىمدەرىنىڭ بارىنشا اشىقتىعى مەن وبەكتيۆتىلىگىن قامتاماسىز ەتۋ بولدى. سىزدەردىڭ ميسسيالارىڭىزدىڭ، سونداي-اق بارلىق باسقا حالىقارالىق ميسسيالاردىڭ جانە باسقا ەلدەردىڭ ورتالىق سايلاۋ ورگاندارىنداعى ارىپتەستەرىمىزدىڭ سايلاۋ پروتسەسىن ۇيىمداستىرۋعا بەرگەن وڭ باعاسىنا قاناعاتتانامىز», - دەپ اتاپ ءوتتى نۇرلان ءابدىروۆ.
ميسسيانىڭ ارالىق ەسەبى جانە سايلاۋدىڭ الدىن الا ناتيجەلەرى مەن قورىتىندىلارى تۋرالى مالىمدەمەسىن تالقىلاۋ بارىسىندا ورتالىق سايلاۋ كوميسسياسىنىڭ توراعاسى بىرقاتار ماسەلەگە نازار اۋداردى. اتاپ ايتقاندا، وسك باسشىسى قۇرىلتايدىڭ جاڭا ساياسي ينستيتۋت ەكەنىن اتاپ ءوتىپ، وسىعان بايلانىستى وتكەن سايلاۋ ميسسيانىڭ قۇجاتتارىندا كورسەتىلگەندەي، «مەرزىمىنەن بۇرىن وتكىزىلگەن پارلامەنتتىك سايلاۋ» ەمەستىگىن جانە ونى بەلگىلەنگەن مەرزىمنەن بۇرىن وتكىزىلدى دەپ ەسەپتەۋگە بولمايتىنىن ايتتى. سونىمەن قاتار قازاقستان پرەزيدەنتىنىڭ سايلاۋدى وتكىزۋ تۋرالى جارلىققا قول قويعان كۇنى داۋىس بەرۋ كۇنىنە ءبىر جىلعا جۋىق ۋاقىت قالعاندا باستالعان اشىق كونستيتۋتسيالىق پروتسەستىڭ سوڭعى قۇقىقتىق كەزەڭى بولعانى اتاپ ءوتىلدى. ول مەملەكەت باسشىسى العاش رەت ءبىر پالاتالى پارلامەنتكە كوشۋ تۋرالى باستامانى 2025 جىلعى 8 قىركۇيەكتە قازاقستان حالقىنا جولداۋىندا ۇسىنعانىن ەسكە سالدى. وسى ساتتەن باستاپ اتالعان باستامانى ىسكە اسىرۋ بويىنشا جۇيەلى جۇمىس جۇرگىزىلگەن.
ءوز كەزەگىندە ۆينسەنت پيكەت بايقاۋشىلاردىڭ جۇمىسىنا جاعداي جاساعانى، سونداي-اق اشىقتىق پەن ورتالىق جانە وڭىرلىك دەڭگەيدە بايقاۋشىلارعا ءتيىستى اقپاراتتى ۇسىنۋعا ۇنەمى دايىن بولعانى ءۇشىن قازاقستان تاراپىنا ريزاشىلىعىن ءبىلدىردى.
«ەقىۇ دياقب ميسسياسىنىڭ الدىن الا مالىمدەمەسىندە ءبىز ورتالىق سايلاۋ كوميسسياسى اتقارعان جۇمىستىڭ ءتيىمدى بولعانىن جانە جوعارى تەحنيكالىق دەڭگەيدە ورىندالعانىن مويىندايمىز. سىزدەردىڭ وڭىرلىك جانە جەرگىلىكتى سايلاۋ ۋچاسكەلەرىن، سونداي-اق ۋچاسكەلىك جانە اۋماقتىق سايلاۋ كوميسسيالارىن دايىنداۋ بارىسىندا قولدانعان دايەكتى تاسىلدەرىڭىزدى اتاپ وتەمىز. ءبىز بۇكىل ەل بويىنشا سايلاۋ كوميسسيالارىنىڭ 70 مىڭ قىزمەتكەرىن كاسكادتى وقىتۋعا، سونداي-اق سايلاۋشىلاردى اقپاراتتاندىرۋعا قانشالىقتى كۇش جۇمسالعانىن تۇسىنەمىز. ميسسيانىڭ قورىتىندى ەسەبى جاريالانعاننان كەيىن، وندا قامتىلعان ۇسىنىمدار مەن قورىتىندىلاردى زەردەلەۋگە مۇمكىندىكتەرىڭىز بولادى دەپ ۇمىتتەنەمىن», - دەپ اتاپ ءوتتى ول.
