North Caspian Operating Company (NCOC) كومپانياسىنان مەملەكەت پايداسىنا قاراجات ءوندىرىپ الۋ جۇمىستارى جالعاسۋدا. بۇل تۋرالى بۇگىن، 9 قىركۇيەكتە ادىلەت مينيسترلىگى ايتتى، دەپ حابارلايدى «ادىرنا» ءتىلشىسى.
قازىرگى ۋاقىتتا NCOC كومپانياسى مەملەكەتتىك سوت ورىنداۋشىسىنىڭ ارەكەتتەرىنە شاعىم تۇسىرۋىنە بايلانىستى اتىراۋ وبلىسىنىڭ مامانداندىرىلعان اۋدانارالىق اكىمشىلىك سوتى اتقارۋشىلىق ءىس جۇرگىزۋ ماتەريالدارىن سۇراتقان.
زاڭعا سايكەس، سوت اتقارۋشىلىق ءىس جۇرگىزۋدى تالاپ ەتكەن جاعدايدا، اتقارۋشىلىق ءىس جۇرگىزۋ ونى سوت قايتارعانعا دەيىن توقتاتىلا تۇرادى.
«وسىلايشا، NCOC كومپانياسىنان مەملەكەت پايداسىنا قاراجات ءوندىرىپ الۋ بويىنشا جۇمىس زاڭدا بەلگىلەنگەن تارتىپپەن جالعاساتىنىن حابارلايمىز»،– دەپ ءتۇسىندىردى مينيسترلىك.
بۇعان دەيىن قازاقستان NCOC-تان وندىرىلمەك بولعان 2,3 ترلن (شامامەن $5 ملرد) تەڭگە كولەمىندەگى ەكولوگيالىق ايىپپۇلدى ءوندىرىپ الۋ جونىندەگى اتقارۋشىلىق ءىس جۇرگىزۋدى ۋاقىتشا توقتاتتى دەگەن اقپارات تاراعان ەدى.
