ەنەرگەتيكا ءمينيسترى ەرلان اقكەنجەنوۆتىڭ توراعالىعىمەن قاشاعان كەن ورنىندا قۋاتتىلىعى جىلىنا 2,5 ملرد تەكشە مەتر گاز وڭدەۋ زاۋىتىن سالۋ جوباسىن ىسكە اسىرۋ ماسەلەلەرى بويىنشا كەڭەس ءوتتى.
ايتا كەتۋ كەرەك، قازىرگى ۋاقىتتا قاشاعان كەن ورنىندا قۋاتتىلىعى جىلىنا 1 ملرد تەكشە مەتر بولاتىن گاز وڭدەۋ زاۋىتىنىڭ قۇرىلىسى قارقىندى جۇرگىزىلۋدە.
كەڭەسكە «QazaqGaz» ۇك» اق، «PSA» جشس، NCOC كومپانياسى اكتسيونەرلەرىنىڭ باسشىلىعى، سونداي-اق جوبانى ىسكە اسىرۋعا قاتىساتىن وزگە دە مۇددەلى ۇيىمداردىڭ وكىلدەرى قاتىستى.
ەنەرگەتيكا ءمينيسترى ەرلان اقكەنجەنوۆ قاشاعانداعى قۋاتتىلىعى 2,5 ملرد تەكشە مەتر بولاتىن گاز وڭدەۋ زاۋىتىن سالۋ جوباسى ناقتى ىسكە اسىرۋ كەزەڭىنە وتكەنىن اتاپ ءوتتى.
كەڭەس بارىسىندا جوبانىڭ اعىمداعى جاي-كۇيى، مۇددەلى تاراپتار اراسىنداعى ۇيلەستىرۋ ماسەلەلەرى، سونداي-اق نىساندى بەلگىلەنگەن مەرزىمدە پايدالانۋعا بەرۋدى قامتاماسىز ەتۋگە باعىتتالعان شارالار تالقىلاندى.
مينيستر گاز وڭدەۋ زاۋىتىن سالۋ جوباسىنىڭ ەلىمىزدىڭ گاز سالاسىن دامىتۋ ءۇشىن ستراتەگيالىق ماڭىزعا يە ەكەنىن جانە مەملەكەت باسشىسى مەن ۇكىمەتتىڭ ەرەكشە باقىلاۋىندا تۇرعانىن اتاپ ءوتتى.
سونىمەن قاتار، ۇكىمەتتىڭ قاۋلىسىمەن جوبانىڭ EPC-مەردىگەرى رەتىندە China National Chemical Engineering Sixth Construction Company Kazakhstan Branch جانە China Wuhuan Engineering Corporation Ltd كومپانيالارىنان قۇرالعان كونسورتسيۋم ايقىندالعانى اتاپ ءوتىلدى.
كەڭەس قورىتىندىسى بويىنشا ەرلان اقكەنجەنوۆ جوباعا قاتىسۋشى بارلىق تاراپتارعا جۇمىستاردى ءتيىمدى ۇيلەستىرۋدى جانە جوبانى ىسكە اسىرۋ مەرزىمدەرىن ساقتاۋ ءۇشىن سىندارلى ءوزارا ءىس-قيمىلدى قامتاماسىز ەتۋدى تاپسىردى.
سونداي-اق «QazaqGaz» ۇك» اق-نا جوبانى ىسكە اسىرۋ بارىسى، قابىلدانىپ جاتقان شارالار جانە تۋىنداعان ماسەلەلەر تۋرالى اقپاراتتى جەدەل تۇردە شەشۋگە ىقپال ەتۋ ماقساتىندا قازاقستان رەسپۋبليكاسى ەنەرگەتيكا مينيسترلىگىنە اي سايىن ۇسىنىپ وتىرۋ تاپسىرىلدى.
