الماتى وبلىسى، رايىمبەك اۋدانىنا قاراستى قىزىلشەكارا اۋىلىنىڭ تۇرعىندارى اۋىلداعى جالعىز ءبىلىم وشاعىنىڭ جاعدايىنا الاڭداپ وتىر. «ادىرنا» ۇلتتىق پورتالىنا حابارلاسقان تۇرعىنداردىڭ ايتۋىنشا، كودەك بايشىعانۇلى اتىنداعى مەكتەپ 1979 جىلى سالىنعاننان بەرى تولىق جوندەۋدەن وتپەگەن جانە قازىرگى تاڭدا عيماراتتىڭ جاعدايى اپاتتى دەڭگەيگە جەتكەن.
اۋىل تۇرعىندارى مەكتەپتىڭ قابىرعالارى اجىراپ، ەدەندەرى ءشىرىپ، كەيبىر سىنىپ بولمەلەرىندە ورتاسى وپىرىلىپ تۇسكەنىن ايتادى. سونىمەن قاتار، سپورت زالدىڭ ەدەنىندە ساڭىراۋقۇلاق پايدا بولىپ، بۇل بالالاردىڭ دەنساۋلىعىنا تىكەلەي قاۋىپ ءتوندىرىپ وتىر دەگەن ۋايىمدارىن جەتكىزدى.
قازىرگى تاڭدا بۇل مەكتەپتە شامامەن 250 بالا ءبىلىم الادى. اتا-انالار اسىرەسە ءبىرىنشى سىنىپقا باراتىن بالالاردىڭ قاۋىپسىزدىگىنە قاتتى الاڭداۋلى. ولار بىرنەشە رەت اۋداندىق ءبىلىم بولىمىنە جانە ءتيىستى ورگاندارعا جۇگىنگەنىمەن، ماسەلە ءالى ناقتى شەشىمىن تاپپاعانىن ايتادى.
تۇرعىنداردىڭ سوزىنشە، جەرگىلىكتى بيلىك وكىلدەرى مەكتەپتىڭ كەلەسى جىلدارى كۇردەلى جوندەۋگە ەنگىزىلەتىنىن ايتقان. الايدا ۋاقىت وتكەن سايىن عيماراتتىڭ جاعدايى جاقسارۋدىڭ ورنىنا ناشارلاپ بارا جاتقان كورىنەدى. قاۋىمداستىق وكىلدەرى ءوز كۇشىمەن جۇرگىزىلىپ جاتقان اعىمداعى اكتەۋ مەن سىرلاۋ جۇمىستارى ماسەلەنى تۇبەگەيلى شەشە المايتىنىن العا تارتادى.
اتا-انالاردىڭ الاڭداۋشىلىعىن كۇشەيتىپ وتىرعان تاعى ءبىر جايت – وڭىردەگى ينفراقۇرىلىمدىق باسىمدىقتار. تۇرعىندار اۋداننىڭ 90 جىلدىق مەرەيتويىنا ارنالعان ءىس-شارالارعا قوماقتى قاراجات ءبولىنىپ جاتقانىن، ال بالالار وقيتىن قاۋىپسىز مەكتەپ ماسەلەسىنە قارجى تابىلماي وتىرعانىنا نارازى.
«ەگەر جەر سىلكىنىسى نەمەسە تابيعي اپات بولسا، 250 بالانىڭ قاۋىپسىزدىگىنە كىم جاۋاپ بەرەدى؟ تويعا اقشا تابىلادى، مەكتەپتى جوندەۋگە جوق؟» - دەيدى اۋىل تۇرعىندارى.
قىزىلشەكارا حالقى بيلىكتەن مەكتەپ عيماراتىن شۇعىل تەكسەرىپ، ونى تولىق قايتا جاڭعىرتۋ نەمەسە جاڭا ءبىلىم ورداسىن سالۋ ماسەلەسىن تەز ارادا شەشۋدى تالاپ ەتىپ وتىر. ولاردىڭ ايتۋىنشا، بالالاردىڭ قاۋىپسىزدىگى كەز كەلگەن مەرەكەلىك ءىس-شارادان دا جوعارى تۇرۋى ءتيىس.
تۇرعىنداردىڭ شاعىمىنا اۋدان اكىمدىگى جەلىدە رەسمي جاۋاپ بەردى. دەگەنمەن، ولاردىڭ ايتۋىنشا، جاۋاپكەرشىلىك وزدەرىندە ەمەس.
«2026 جىلى مەكتەپتىڭ كۇردەلى جوندەۋ جۇمىستارىن جۇرگىزۋ ءۇشىن وبلىستىق قۇرىلىس باسقارماسىنىڭ تەڭگەرىمىنە وتكىزىلىپ بەرىلدى. كۇردەلى جوندەۋ جۇمىستارىن جۇرگىزۋ وبلىستىق قۇرىلىس باسقارماسىنىڭ قۇزىرىندا ەكەنىن حابارلايمىز»، دەپ حابارلاعان اكىمدىك.
