وسكەمەن قالاسىنىڭ تۇرعىنى «قازمىرىش» كاسىپورنىندا بولعان اپاتتان كەيىن حالىقتى دەر كەزىندە حاباردار ەتپەگەنى ءۇشىن قالا اكىمىن سوتقا بەردى، دەپ حابارلايدى "ادىرنا" ۇلتتىق پورتالى.
شقو مامانداندىرىلعان اۋدانارالىق اكىمشىلىك سوتىنىڭ دەرەگىنشە، اكىمدىك توتەنشە جاعداي كەزىندە تۇرعىنداردى اقپاراتتاندىرۋدىڭ ارنايى ءتارتىبىن ازىرلەۋگە مىندەتتەلدى.
تالاپكەردىڭ ايتۋىنشا، 2026 جىلعى 5 مامىردا «قازمىرىشتىڭ» مەتاللۋرگيالىق الاڭىندا بولعان جارىلىستان كەيىن تۇرعىندارعا اپاتتىڭ قاۋىپتىلىگى جانە مۇنداي جاعدايدا قالاي ارەكەت ەتۋ قاجەتتىگى تۋرالى رەسمي اقپارات ۋاقىتىلى بەرىلمەگەن.
وسىعان بايلانىستى ول وسكەمەن قالاسىنىڭ اكىمىنەن تەحنوگەندىك سيپاتتاعى توتەنشە جاعدايلار كەزىندە حالىقتى حاباردار ەتۋدىڭ ناقتى ءتارتىبىن بەكىتۋدى تالاپ ەتكەن. سوت تالقىلاۋى باستالعانعا دەيىن تاراپتار داۋدى بىتىمگەرشىلىك جولىمەن شەشۋگە كەلىستى. كەلىسىمگە سايكەس، قالا اكىمى 2026 جىلعى 30 شىلدەگە دەيىن قاۋىپتى وندىرىستىك نىساندارداعى اپاتتار كەزىندە تۇرعىنداردى اقپاراتتاندىرۋدىڭ ارنايى رەگلامەنتىن ازىرلەپ، بەكىتۋگە مىندەتتەندى.
قۇجاتتا تۇرعىندارعا وقيعا تۋرالى كىمنىڭ جانە قانداي مەرزىمدە حابارلايتىنى، اقپاراتتىڭ جاڭارتىلۋ ءتارتىبى، قايتا حابارلاۋ مەرزىمدەرى، سونداي-اق رەسمي اقپارات تاراتىلاتىن بايلانىس ارنالارى مەن بۇقارالىق اقپارات قۇرالدارىن پايدالانۋ ءتارتىبى ايقىندالۋى ءتيىس.
اكىمدىك بۇل مىندەتتەمەنى قابىلداعاننان كەيىن تالاپكەر وزگە تالاپتارىنان باس تارتتى. وسىعان بايلانىستى سوت تالاپ ارىزدى كەرى قايتاردى.
